Athaona 45

¹ Chatawhcha Zawsi cha a kiahpâh liata a duahpa zydua hmiakô liata a sohsi thei khao leipa ta; “Chyhsa zydua kei tawhtapa he papua khai teh,” tahpa ta awh ta. Zawsi a unawhpazy hnohta a pahnosa chhôh zydua a kiahpâh liata ahyhmah a duah leipa ei ta.

² Chatawhcha thata cha ta. Izi sahlao ta thei ei ta. Phirao chhôhkhazy chhaota thei hra ei ta.

³ Chatawhcha Zawsi chata a uhnawhpazy hnohta, “Zawsi kha ei châ; ei pâ cha a hroh thlâh ha mâ,” tah ta. Châhraala a unawhpazy chata a chhy thei leipa ei ta, a hmiakô liata nôpo ngaitapa ta ama y.

⁴ Zawsi ta a unawhpazy hnohta, “Ngiachhiepa ta nâ hnia teh u,” tah ta. Chatanachata a kei hnia ei ta, ano chata, “Nama unawhpa Zawsi, Izi liata a ngiakhei awpa ta eina zuapa vâna chi heta,

⁵ pachârôhpa ta y kha u, nâmo a hao hra khah u; chyhsazy hrona pachha awpa ta Khazohpa ta nama hmia lâta eina vaw tuapa a châ hih.

⁶ He kô no chhôh heta he râh liana heta chakâhna vaw y haw ta; kô pangawh a bâh ta, cha chhôh zydua alei paliepa he y leipa aw ta, sâhriana chhao y hra aw vei.

⁷ Chatanachata alei liana heta, chi pathlazy cha pahlôhpa awpa nata pachhana rôhnah ngaitapa ta hropa ta ei cha paysa theina awpa ta Khazohpa ta nama hmia lâna heta eina vaw tuah.

⁸ Chatanachata he liata na pakiasatuhpa he, nâmo châ leipa eichi ta, Khazohpa tlao a châ; ano chata Phirao paw ta nata a chhôhkha zydua nata Izi râh zydua ryureituhpa ta na tao haw ta.

⁹ A chatliepa ta ei pâ lâta sie ula, na sawchapawpa Zawsi chata, he tana heta a tah, ‘Khazohpa ta Izi râh zydua hyutuhpa ta eina tao haw, kei lâta a zu mawh sy, vaw hawh kha sy.

¹⁰ Kôse râh liata y aw chi ta, ei kiahpâh liana tlai heta na y aw, nâ nata na sawzy nata na samohzy nata na mietahkupa zawzy nata na viahchao hrizy nata na hneipa zydua chhaota;

¹¹ cha liana chata keima ta ei cha pasa aw, chakâh awpa kô pangawh y chy tlôh ta; chata leipa ta la riepatheipa ta na y pathlei aw na, nâ nata na chhôhkhazy nata na hneipa zydua chhao khata,’ kaw tah muh vy.

¹² Chatawhcha nâmo tlai nata ei nawhta Benzami moh tlaita, keima pakah tlaita a reipa he nama hmô.

¹³ Izi liata ei rôhnahna zydua kyh nata hmo nama hmôpa zydua kyh he, ei pâ chho aw eichi ta. Ei pâ cha a chatliepa ta he liata nama zâ chhi awpa a châ,” tah ta.

¹⁴ Chatawhcha a nawhta Benzami cha a pyhpahlypa ta chakheipa ta cha ta; Benzami chhaota a hniehpa ta cha hra ta.

¹⁵ Chatawhcha a unawhpa zydua cha sy ta, cha thlu chyu hra ta; chatawhna chata a unawhpazy chata bielôhawhpa ta reikhei ei ta.

¹⁶ “Zawsi unawhpazy amâ vy,” tahpa cha, Phirao o liana chata vaw pahno haw ei ta, cha chata Phirao nata a chakaopazy cha palysa kaw ta.

¹⁷ Chatawhcha Phirao ta Zawsi hnohta, “Na unawhpazy hnohta, ‘He tana heta tah teh, nama sâhzy cha sâh paphaosa ula, Kana râh lâta sie teh u;

¹⁸ chatawhcha nama paw nata nama chhôhkhazy cha a zâ chhi ula, kei lâna heta a zu teh u, chatanachata Izi râh liata hmo phapazy he cha pie aw ei na ta, he râh liata hmo a ypa a pha chaipazy he nie vâ eichi,’ tah teh.

¹⁹ Bie ei cha pie, ‘He tana heta tah teh u, nama sawnawh chyhpatazy châta nata nama lahpinôzy châta Izi râh tawhna heta talailizy cheih ula, nama paw a chhipa ta a vy teh u.

²⁰ Nama hmodâh chhao pachâ kha u, Izi râh zydua liata hmo phapa maih he, nama eih châ tlôh ta,’” tah ta.

²¹ Izarel sawzy chata cha hawhna chata tao ei ta; chatawhcha Zawsi ta Phirao bie piepa hawhna chata talailizy ama hnohta pie ta, lâpi châta niepa pie hra ta.

²² Âmo zydua hnohta chysia a patlypazy pie chyu ta; Benzami hnohta chhochhi cha, tâkâ za thôh nata chysia a patlypa zo pangawh pie ta.

²³ A paw hnohna chata he hawhna heta paphao ta; alâ pô hrawh Izi liata hmo phapa phaohpa ta nata alâ chanôhpa pô hrawh lâpi liata a paw châta sa nata viahchhâ nata niepa a phaohpa paphao ta.

²⁴ Chatanachata a unawhpazy cha pasiesa haw ei ta; chatawhcha ano chata ama hnohta, “Lâpi liata a hryuh lei awpa ta a chado teh u,” tah ta.

²⁵ Izi tawhtapa cha khy ei ta, Kana râh liata ama paw Zakaw hnohna cha kaw tlô ei ta.

²⁶ Chatawhcha a hnohta, “Zawsi kha hroh thlâh ha ta, Izi râh zydua ryureituhpa a châ,” tahpa ta chho ei ta. Chatawhcha a pahlaw ta, ama bie cha zo tlôh va.

²⁷ Ama hnohta Zawsi bie reipa zydua chho ei ta, chatawhcha a kiana awpa ta talaili Zawsi ta a paphaopazy cha a hmô nata, ama paw Zakaw pathipalôh cha thadâh ngaitapa ta y ta.

²⁸ Izarel chata, “Â daih na, ei sawchapawpa Zawsi cha a hroh thlâh ha na, ei thi hlâta ano ei zâ hmô aw,” tah haw ta.