Puasaina 39

¹ Chatawhcha pala nohpa zy, a nohsaihpapa zy, a sailawpa zy, hmâpa ta supathaihpa chakaona awpata chysia a ngia ngaitapazy tao ei ta; Arawna châta chysia pathaihpazy tao hra ei ta; ABEIPA ta Mawsi bie a piepa hawhna khata.

² Chatawhcha ngôh ri zy, pala nohpa zy, a nohsaipâpa zy, a sailawpa zy, pala ri di ngaitapa pabaohpa zy hmâpa ta theihthaipa viahpakao cha tao ta.

³ Ngôh cha â pa ngaitapa ta paphia ei ta, pala nohpa zy, a nohsaihpâpa zy, a sailawpa zy, pala ri di ngaitapa zy ta chyhsa a thai ngaitapa ta kiky a paky awpa ta vaw tao ei ta.

⁴ A ngiatlâh ri bie pâpata tao ei ta, a pawhmao rairieh bie pâpa a châ,

⁵ cha viahpakao chô liata chaisaih awpa zôthai ngaitapa ta sapa cha, cha viahpakao chi ualuapa sai châ ta, ngôh ri zy, pala nohpa zy, a nohsaihpâpa zy, a sailawpa zy, pala ri di ngaitapa pabaohpa zy ta sapa a châ; ABEIPA ta Mawsi bie a piepa hawhna khata.

⁶ Izarel pathlazy moh hawh lymâ ta, moh chahnaona liata ropa hawhta pachohsana ngôh patusana liata bôpa bery lôzy liana chata roh ei ta.

⁷ Izarel pathlazy pahno thlâh hana alô châta theihthaipa viahpakao ngiatlâh baipa liana chata bai ta; ABEIPA ta Mawsi bie a piepa hawhna khata.

⁸ Chachôhna baipa cha, theihthaipa viahpakao taopa hawh hra ta, chyhsa a thai ngaitapa taopa hawhta, ngôh ri zy, pala nohpa zy, a sailawpa zy, pala ri di ngaitapa pabaohpa zy hmâpa ta tao ta.

⁹ Cha cha ki palih a hneipa châ ta; cha chachôhna baipa cha patho ei ta, a doh lâ cha kha kha châ ta, a hâ lâ cha kha kha châ hra ta, pathopa a châ.

¹⁰ Cha liana chata alôsôhpazy tlâh palih ta tao ei ta; tlâh khana cha sadi zy, tôpazi zy, kubuni zy châ ta;

¹¹ tlâh nona cha emyra zy, saphai zy, sadoni zy châ ta;

¹² tlâh thôhna cha chhina zy, akate zy, amethy zy châ ta;

¹³ tlâh palihna cha bery zy, bery lôsôhpa zy, zaspy zy châ ta; ngôh patusanazy liata bôpa a chô.

¹⁴ Alôzy cha Izarel pathlazy moh hawh lymâ ta miahrawhleino a châ, ama moh hawh lymâ ta châ ta; moh chahnaona liata a chohpa hawhta, pho to ama moh hawh lymâ ta pho hrawhleino châta a châ.

¹⁵ Chatawhcha chachôhna baipa chô liana chata khawhri charipa hawhta bâliazy, ngôh suapa charipa tao ei ta;

¹⁶ ngôh patuna miano nata ngôh tiaki miano tao ei ta, chatanachata chachôhna baipa tlâh pawhmao rairieh liata tiaki zy cha patao ei ta;

¹⁷ chatawhcha ngôh bâlia charipa miano cha chachôhna baipa tlâh pawhmao rairieh liata tiaki miano liana chata bu ei ta.

¹⁸ Bâlia charipa pawhmao hiakhalâ miano zy cha ngôh patuna miano liana chata pazao ei ta, cha cha theihthaipa viahpakao hmia lâta baina liana chata bu ei ta.

¹⁹ Chatawhcha ngôh tiaki miano tao ei ta, chazy cha chachôhna baipa ki miano theihthaipa viahpakao a daipa chho lâchhâh liana chata patao ei ta.

²⁰ Chatawhcha ngôh tiaki miano tao ei ta, chazy cha a hmia lâta theihthaipa viahpakao baina miano ry lâchhh a pazaona rachhôh theihthaipa viahpakao hraina zôthai ngaitapa ta sapa chô lâna chata patao ei ta.

²¹ Chatawhcha theihthaipa viahpakao liata tiakizy liana chata, chachôhna baipa liata tiakizy cha ri nohpa ta pazao ei ta, zôthai ngaitapa ta sapa theihthaipa viahpakao hraina chô lâta a y thei nawpa ta nata chachôhna baipa cha theihthaipa viahpakao nata â pachhaih lei nawpa ta, ABEIPA ta Mawsi bie a piepa hawhna khata.

²² Theihthaipa viahpakao, viahpakao pasihpa a nohpa saita sapa tao ta;

²³ viahpakao pasihpa liah liah cha viahpakao bâh chôpa hawhta pa-â ta, a âpa cha â hrie thei lei nawpa ta a kiah pakyu ta.

²⁴ Viahpakao pasihpa paizy liana chata pawmikranat nohthlahpa a nohpa zy, a nohsaihpâpa zy, a sailawpa zy, pala ri dipa pabaohpa zy ta tao ei ta.

²⁵ Ngôh suapa lailôzy tao ei ta, cha lailôzy cha viahpakao pasihpa pai liata â dopa ta pawmikranat likawh zy liana chata soh ei ta, pawmikranat likawh lymâ liata ama soh;

²⁶ lailô miakha nata pawmikranat miakha, lailô miakha nata pawmikranat miakha lymâ viahpakao pasihpa pai liata a dôpa chakaona awpa ta a tobi nawpa ta soh ei ta; ABEIPA ta Mawsi bie a piepa hawhna khata.

²⁷ Arawna nata a sawchapawpazy chata pala ri di ngaitapa sapa viahpakaozy tao ei ta,

²⁸ pala ri di ngaitapa ta taopa theihthaipa lakhu zy, pala ri di ngaitapa ta taopa luhkhuna pha ngaitapa zy, pala ri di ngaitapa ta pabaohpa ta taopa pala ri dipa chaopasypa zy.

²⁹ pala ri di ngaitapa pabaohpa zy, a nohpa zy, a nohsaihpâpa zy, a sailawpa zy hmâpa ta, kiky a thai ngaitapa pakypa chaisaina zy chhaota; ABEIPA ta Mawsi bie a piepa hawhna kha ta.

³⁰ Chatawhcha lakhu pathaihpa châta ngôh phiapa cha ngôh suapa ta tao ei ta, a chô liata moh chahnaona liata a chohpa hawhta, “ABEIPA CHÂTA PATHAIHPA,” tahpa pahnosa ei ta.

³¹ Chatawhcha theihthaipa lakhu chô lâta bai awpa ta a ri nohpa ta bu ei ta, ABEIPA ta Mawsi bie a piepa hawhna khata.

³² Chatanachata ahmaopakhyna poh-o achhyna byureih raihria zydua cha palohpa châ haw ta; ABEIPA ta Mawsi tao awpata bie a piepa hawh tlaita Izarel pathlazy chata tao ei ta.

³³ Chatawhcha Mawsi hnohta achhyna byureih a vykhei ei ta, poh-o zy, a chhaichhi zydua zy, a hraina zy, a thophia paryhpa zy, a tôh zy, a patyuna zy chhaota;

³⁴ mietaekupa tôhpa vo pasaipa nata mietôhpa vo ta taopa a khuna zy, a pakhâna awpa poh-raipa zy chhaota:

³⁵ bie pahnosana Byh nata a lâzy, zawngiana dyuchhai chhaota;

³⁶ tlâhkhai zy, a chhaichhi zydua zy, viahchhâ sopa zy chhaota;

³⁷ ngôh suapa ta taopa meiôh sona zy, a meiôh soh awpa zy, a hmobaoh zydua nata pakhaih nawpata a sathaw chhaota;

³⁸ ngôh maisâh zy, sathaw a thupa zy, rao awpa ropahâh ngaitapa zy, poh-o chhikao liata poh-rai awpa poh­raipa zy chhaota;

³⁹ dawh maisâh zy, a dawh sao zy, a lâ zy, a hmobaoh zydua zy, rahô nata a patyuna zy chhaota;

⁴⁰ achhyna byureih dôhpachhôh tlyhmia liata poh-raipa zy, a tôh zy, a patyuna zy, a dôhpachhôh chhikao liata poh-raipa zy, a khawhri zy, a khaipâna zydua chhaota;

⁴¹ su pathaihpa liata chakaona awpata chysia â ngia ngaitapa ta sapa zy, theihthaipa Arawna nata a sawchapawpazy ta theihthaipa rai ama hria tita ama ky awpa, chysia pathaihpazy chhaota.

⁴² ABEIPA ta Mawsi tao awpata bie a piepa zydua hawhna cha, Izarel pathlazy ta tao khai ei ta.

⁴³ Chatawhcha Mawsi ta cha raihria zydua cha moh ta, paloh khai haw ei ta; ABEIPA bie piepa hawh tlaita ama paloh khai haw. Chatawhcha Mawsi ta âmo cha byhnâ aw pa ta.