Puasaina 19

Სწავლა

   

1 Izarel pathlazy Izi râh tawhtapa ama pua tawhta a thla thôhna, cha noh liana tlai chata, Sinai râhpathohpa tlô ei ta.

2 Rephidi tawhtapa puapa ta Sinai râhpathohpa ama tlô nona chata, râhpathohpa liata a rie ei ta, cha liana chata Izarel sahlaozy cha tlâh thaby liana chata a rie ei ta.

3 Mawsi cha Khazohpa lâta khy ta, ABEIPA chata tlâh tawhta bie a vaw chho ta, a hnohta, “Zakaw chhôhkhazy hnohta, he hawhna heta tah la:

4 Izarel pathlazy hnohta chhao Izi mozy chô liata ei taoziezy nata pahmôpi mathlaw ta cha chalo ei na ta, ei hnohta ei cha tlôkheizie he hmô eichi ta.

5 Chavâta ei bie nahthlie hmeihseihpa ta, ei biehraipa he namâ pyh khiahtala, khizaw phopi zydua hry liana heta ei châta ryu a tlyhpa nama châ aw; khizaw pôhpalôhpa he kei eih châ tlôh ta;

6 ei châta theihthaipa chi pho pathaihpa nama châ aw, tahpa ta chho mah y. He biezy he Izarel pathlazy hnohta na rei awpa cha a châ,” tah ta.

7 Mawsi ta zawpi hry liata machâ sahlaozy cha aw pakhy ta, ABEIPA biepiepa zydua cha chho khai ta.

8 Zawpi sahlao zydua chata, “ABEIPA reipa zydua cha eima tao lymâ aw,” tahpa ta â raohpa ta a chhy ei ta. Chatanachata Mawsi ta zawpizy bie reipa cha ABEIPA chho pachhuah ta.

9 ABEIPA chata Mawsi hnohta, “Pachâ teh, bie ei cha chho nota zawpi ta theipa ta chhâzaw ta na bie ama zo nawpa ta, meihdo chhakaluhpa liata nâ lâta ei vy aw,” tah ta.Mawsi ta zawpizy bie reipa cha ABEIPA chho pachhuah ta.

10 Chatawhcha ABEIPA ta Mawsi hnohta, “Zawpi sahlao lâ vawh la, atanoh nata mylâ heta âmo cha pathai mah y, ama pohzy pasu ei sala,

11 a no thôh noh chata a pachyh ei se; a noh thôh noh chata zawpi sahlao zydua mohmô liata Sinai Tlâh liana chata ABEIPA a za chô aw na.

12 AMa hnohta, ‘A chado ula, tlâh lâna khi ta kiah leipa ula, tlâh pawhmao chhao hria cheita khah u; ahyrai tlâh a hriapa maih cha thi thlyu awpa ama châ aw;

13 ku rai ta hria awpa châ leipa ta alô ta vaw saoh thlyu awpa a châ, a châ vei khiahtala ka sao awpa a châ aw; sa rai, chyhsa rai, hroh aw vei. Chiahmie a paro tina chata tlâh lâna khi ta kiah awpa a châ, a tah,’ tahpa ta zawpi sahlao châta lyuri haipa mah y,” tah ta.

14 Chatanachata Mawsi cha tlâh tawhtapa zawpi sahlao hry lâna chata za chô ta, zawpizy pathaisa ta; ama pohzy pasu ei ta.

15 Chatawhcha zawpi sahlaozy hnohna chata, “Anoh thôh noh chata a pachyh teh u, chanô rai a hnia khah u,” tah ta.

16 A noh thôh noh my ta tôhkalôhpazy a vaw thua ta, dôhlazy vaw pathli ta, tlâh laki liana chata meihdo chhakalupa a vaw chhoh ta, chiahmie paro ngaitapa vaw paro ta, chatanachata zawpi riena su liata a ypa sahlao zydua cha a chalyu ei ta.

17 Chatanachata Mawsi ta zawpi sahlao cha Khazohpa bie a chho awpa ta a riena su tawhtapa cha a chhi ta; tlâh thaby liana chata a duah ei ta.

19 Chiahmie pyu cha paro via ngâ ta, Mawsi chata bie vaw reih ta, Khazohpa ao ta a vaw chhy ta.

20 ABEIPA cha Sinai Tlâh, tlâh laki liana chata za chô ta; ABEIPA chata Mawsi cha tlâh laki lâta aw ta; chatanachata Mawsi cha khy ta.

21 Chatawhcha ABEIPA chata Mawsi hnohta, “Chô la, zawpizy khu za chhorei teh, chata leipa ta la ABEIPA hmia hmô a chhuahpa ta amâ vaw ngia aw na, chyhsa hluhpi ama leidia thlâh ha aw na.

22 Theihthaipa sahlao ABEIPA kiapâh liata a vy hrapazy chhao cha, a pathai hra ei se, chata leipa ta la ABEIPA ta ama chô liata a taochhie aw,” tah ta.

23 Mawsi ta ABEIPA hnohta, “Zawpi sahlao he Sinai Tlâh lâna heta nah kaw a khy ei va, ‘Tlâh chheipâh liana heta lyuri kei pakhâhpa ula, pathaisa mah y,’ tahpa ta, nâma tlaita bie eina pie chi mâh tâh,” tah ta.

24 ABEIPA ta a hnohta, “Zu la, chô teh, chatawhcha Arawna chhaota a khy heih muh vy; anodeikuacha, theihthaipa sahlao nata zawpi sahlao cha ABEIPA lâta a vy a chhuahpa ta a vaw ngia kha ei se, chata leipa ta la ama chô liata a taochhie aw na,” tah ta.

25 Chatanachata Mawsi cha zawpizy lâna chata zu ta, cha biezy cha za chho ta.

   
Scroll to see more.