Ryhpachaneina 10

Სწავლა

   

1 Cha nona chata ABEIPA chata ei hnohta, ‘Lôphia miano eikhano tahpa hawhna khata khai heih la, tlâh lâta ei hnohta a khy la, tho ta a Byh tao teh.

2 Chatawhcha eikhano ta lôphiapa na pakei hawpazy liata bie a rohpa kha lôphia zy liana chata roh aw na ta. A Byh liata na soh aw,” tah ta.

3 Chatanachata Akeisa tho ta a Byh tao na ta, eikhano tahpa hawhpa lôphia miano khai na ta, lôphia miano cha cheipa ta tlâh lâta khy na ta.

4 Lôphiazy liana chata hmia lâta a ropa hawhta, namâ pôhpakhy nota tlâh liata mei tawhta ABEIPA ta nama hnohta a reipa Biehrawh Piepa cha roh ta; ABEIPA chata na pie ta.

5 Chatawhcha a vaw lie na ta, tlâh tawhtapa cha za chô na ta, lôphiapa cha a Byh ei taopa liana chata soh na ta; ABEIPA ta bie eina piepa hawhta cha liana chata y thlâh ha ta.

6 (Izarel pathlazy cha Berô Benezaka tawhta Môsera lâta sie ei ta, cha liana chata Arawna cha thi ta, cha liana chata pabu ei ta; a sawchapawpa Eliaza ta ano vyuhpa ta theihthaipa rai hria ta.

7 Cha tawhna chata Kukôdah lâta sie ei ta, Kukôdah tawhna chata chavah zy râh Zôbatha lâta sie ei ta.

8 Cha nona chata atahmâ taihta ABEIPA Biehrai Byh a sypa ta ABEIPA hmiakô liata chakaopa ta, a moh ta byhnâ a aw patuhpa cha awpa ta Livai chi cha panano ta.

9 Chavâta Livai chata ama unawhpazy hry liata tovyuh chhao, ryuto chhao hnei leipa ta; ABEIPA nama Khazohpa ta a hnohta a reipa hawhta ABEIPA cha a ryuto a châ).

10 “A hmialâ hawhna khata tlâh liana chata noh sypalih nata zâ sypalih y na ta, cha nona chhao chata ABEIPA ta ei bie nahthlie heih ta; ABEIPA chata a cha pahleipadia khoh leipa ei khâ.

11 ABEIPA ta ei hnohta, ‘Thyu la, zawpizy chhihtha teh, âmo pie awpa ta ama mahpaw zy hnohta chhiesapa ta ei taihpa râh cha a ngiapa ta ama hnei awpa a châ,’ tah ta.

12 Izarel mo saih u, nâmo liata ABEIPA nama Khazohpa ta â hnawpa cha khâpa hropa châ leipa ta, nama pha nawpa ta ABEIPA nama Khazohpa chipa ta, a lâpi zydua a chhihpa ta ano kyh pachâpa ta, nama pathipalôh tlokhuh ta nata nama palôhrupa tlokhuh ta, ABEIPA nama Khazohpa chakaopa ta.

13 ABEIPA biepiepa zy, aryhpa zy, zyh awpa ta atahmâ ta bie ei cha piepa a pyhpa he a châ.

14 Avâzy nata avâ a sâh chaina nata leilô nata a chhôh liata a ypa zydua he ABEIPA nama Khazohpa eih sai châ ta.

15 châhrasala nama mahpawzy kyhpachâpa cha â lynazie châ ta, pho hropa zydua hlâta nâmo sahlao âmo hnôh lâta ama pathlazy he a châ tlyh haw ei, atahmâ ta nama châpa hawhna heta.

16 Chavâta nama pathipalôh tlokhuh ta biehraina cha a pyh ula, chhorupa ta y khao khah u.

17 ABEIPA nama Khazohpa cha khazohzy Khazohpa, abeizy ABEIPA. Khazohpa rôhnah ngaitapa, thatlô ngaitapa, chichhih ngaitapa, ahyma ta khokhei hlei hnei leipa ta, a naohna chhao a lapa cha beih tlôh leipa ta.

18 Paw a hnei leipazy nata nôhmeizy cha a sia ngaitapa ta pachiapa tyh ta, râh hropa chyhsazy cha niepa nata chysiazy piepa ta kyh pachâ tyh ta.

19 Chavâta râh hropa chyhsazy cha ama kyh pachâ hra teh u; nâmo chhao Izi râh liana khata râh hropa chyhsa nama châpa kha.

20 ABEIPA nama Khazohpa cha chi aw ei chi ta; ano chakao aw eichi ta, ano cha khâchâ patu aw eichi ta, a moh reipa ta chhie namâ sa awpa a châ.

21 Ano cha nama reithai awpa cha a châ; he nama mo ta nama hmô hawpa, hmo rohnah ngaitapa nata rarôh y ngaitapa zy cha taopatuhpa nama Khazohpa cha a châ.

22 Nama mahpawzy cha Izi râh lâta sysarih zu ei ta; atahmâ cha a hluhna lâta avâ liata awhsi zie ta ABEIPA nama Khazohpa ta a cha papôh haw ei.