2 Abeizy 18

¹ Elah sawchapawpa Izarel beipa Hôsia kô thôh a bei kô ta, Zudah beipa Ahaza sawchapawpa Hezekiah cha abei pathao ta.

² A bei pathao nota kô syno nata kô pangawhpa a châ, chatawhcha Zerusale liata kô syno nata kô chaki abei ta. A no moh cha Abi, Zekaria sawchanônô a châ.

³ A mahpaw Davi hmotaopa maih tao hrapa ta ABEIPA mohmô liata hmo pha ngaitapa tao tyh ta.

⁴ Su sâhpa zy pahlei ta, lôbô zy pacho ta, Ashera zy thlu ta. Mawsi dawh parih a taopa zy cha parao khai ta, cha daihti taihta Izarel pathlazy ta ano lâta rohpahâhpa ama rao tyh: cha.cha Nehusata ama tah tyh.

⁵ Ano chata ABEIPA Izarel zy Khazohpa cha ngâ ta; a hnôh lâta Zudah abei zydua hry liata ano hawhpa ahyhmah y leipa ei ta, a hmialâ chhao y hra vei.

⁶ ABEIPA cha khâchâ patu ta; ano a zipa cha bâhsai khoh leipa ta, a biepiepa ABEIPA ta Mawsi a piepa zy cha zyh ta.

⁷ Chatanachata ABEIPA cha ano hnohta y ta; a pua-eina maihta thlao a chhi lymâ ta. Asuria beipa chô liata aty ta, chakao khao leipa ta,

⁸ Philistina sahlao zy cha Kaza khih taihta a râh zydua chhaota riahvaihtuhpa zy o sâhpa tawhta kuh a hneipa khih taihta pahnie khai ta.

⁹ Beipa Hezekiah kô palih a bei kô ta, Izarel beipa Elah sawchapawpa Hôsia kô sari a bei kô liata Asuria beipa Shalmanesa chata Samari khih a vaw dyuh ta, padô ta,

¹⁰ kô thôh a chhâ nahta la haw ei ta. Hezekiah kô charu a bei kô ta, Izarel beipa Hôsia a kô chaki a bei kô ta Samari khih cha ama lapa a châ.

¹¹ ABEIPA ama Khazohpa bie cha a pyh khoh leipa ei ta, a biehraipa cha tlao parao ei ta. ABEIPA ta a chakaotuhpa Mawsi bie a piepa zydua tlai kha a pyh khoh leipa ta,

¹² ama tao khoh leipa vâta” Asuria beipa chata Izarel sahlao zy cha Asuria râh lâta a chhi ta, Hala râh liata zy, Kôza râh liata, Habaw chavah liata zy, Mede sahlao khih zy liata a paysa.

¹³ Beipa Hezekiah kô hrawhleipalih a bei kô ta, Asuria râh beipa Senakeri cha Zudah râh liata khih kuh a hneipa zydua a dyuh awpa ta khy ta, la haw ta.

¹⁴ Zudah beipa Hezekiah ta Lakhi khih liata Asuria beipa hnohta, “Hmo ei vaw parao haw na; nâ hnei sai heih teh; einâ hnawpa maih cha pasa ei tao lymâ aw na,” tahpa ta bie paphao ta. Asuria beipa chata Zudah beipa Hezekiah cha tâkâ talent za thôh nata ngôh talent sythôh a hnaw ta.

¹⁵ Hezekiah chata ABEIPA o liata tâkâ a ypa zydua nata abei o liata a ryu pachôna liatahpa zydua cha pie ta.

¹⁶ Cha nona tlai chata Hezekiah chata ABEIPA achhyna-o ochhi liatahpa nata Zudah beipa Hezekiah ta o tôh liata ngôh a pahupa zy cha la khai ta, Asuria beipa a pie.

¹⁷ Asuria beipa chata Tarta zy, Rabasari zy, pheisaih hluhpi chhaota Lakhi tawhta Zerusale liata Beipa Hezekiah lâna chata tuah ta. Zerusale cha kei tlô ei ta. Ama kei tlô nahta poh pasutuhpa sibiepa su lapi liata tipo machhuah lâ tahpa kiapâh liana chata a duah ei ta.

¹⁸ Chatawhcha abeipa ama awsao nata o chhôh lâ hyutuhpa Hilkiah sawchapawpa Eliakima zy, châ rohtuhpa Shebna zy, thâtih rohtuhpa Asapha sawchapawpa Zôah zy cha âmo lâta kei pua ei ta.

¹⁹ Rabasake chata ama hnohta, “Hezekiah lâta kei rei teh u, Abei rôhnah ngaitapa Asuria beipa chata he tana heta a tah: Na ngâna na pahniehna he khâpa ma a châ?

²⁰ Adyuhna châta cha a ryh rao thaipa nata thatlôna eima hnei, tah chi ta, châhrasala cha cha reikah dei a châ. Ahyma ngâ chi ta, ei chô liata nâ ty tly?

²¹ He lothi tli pa-ipa chôhchahrei, Izi he ngâ haw chi ta cha cha chyhsa ta a ngâchhâh khiahta la a ku liata a chhô aw. Izi beipa Phirao cha ano a ngâtuhpa zydua chô liana chata cha hawhpa cha a châ.”

²² Châ vei khiahtala ei hnohta, “ABEIPA eima Khazohpa cha eima ngâ,” nama tah khiahtala, ano cha Hezekiah ta Zudah sahlao nata Zerusale sahlao hnohta Zerusale liata he maisâh hmiakô liana heta nama chhy awpa a châ,” tahpa ta a su sâhpa zy nata maisâh zy a la hawpa kha châ vei ma? tahpa ta.

²³ Ei zibeipa Asuria beipa nata bie a taih teh u, chatanchata arâ sâh no ei cha pie aw, a chô liata a kiahtuh awpa zy na hmô thei awpa khiahta la.

²⁴ Kheihta e, talaili zy nata arâ kiahpa chyhsa zy kyh liata Izi chô liata na ngâna pahniehpa ta ei zibeipa chyhsa zy hry liata a chyh chaipa pakha chhao he na pakhâ thei aw tly?

²⁵ He râh he ABEIPA bie leipa ta parao awpa ta a khypa ma ei châ? ABEIPA ta ei hnohta, ‘Cha râh cha adyuh la parao teh, a tah,’ tahpa ta,” tah ta

²⁶ Hilkiah sawchapawpa Eliakima nata Shebna nata Zôah zy chata Rabasake hnohta, “Ngiachhiepata ta na chakaotuhpa he Suria reih ta tlao maniah chho teh, cha cha pahno thei tlôh pi ta; kuh chô liata chyhsa zy nahkhao theina liata maniah chho khao khâ,” tah ei ta.

²⁷ Châhrasala Rabasake chata ama hnohta, “Ei zibeipa chata nama zibeipa hnohta nata nama hnohta deita ta he biezy he reih awpa ta eina tuah ma? Kuh chô liata a tyuhpa sahlao nâma nata âmo nama ie a nie awpa nata nama pazô a doh awpa zy hnohna heta na tuah hra vei mâ?” tah ta.

²⁸ Rabasake cha a duah ta, Zudah reih ta ao paro ngaitapa ta awh ta: “Abei rôhnah ngaitapa Asuria beipa bie he nahthlie teh u!

²⁹ Abeipa chata he tana heta a tah; Hezekiah dôpa ta y khah u, ano chata a ku tawhtapa cha pachha thei tlôh leipa aw ta.

³⁰ Hezekiah chata ABEIPA ta maniah pachha tlai aw ta, he khihpi he Asuria beipa ku liata piepa châ aw vei, tahpa ta, ABEIPA cha cha pangâsa khah ei se.

³¹ Hezekiah bie a pyh kha u: Asuria beipa chata he tana heta a tah: ‘Nâ ryh ula, kei lâta vaw pua teh u; chatawhcha nama râh hawhta, sa nata kresawti râh, viahchhâ nata kresahdô râh, ôli nata kheihti râh, thi leipa ta nama hroh theina awpa râh lâta ei cha chhihtha hlâ lei cha,

³² chyhsa to ta ama krezôh liatahpa nata chyhsa to ta ama theiku kô liatahpa nie chyu ula, chyhsa to ta âmo tikhaoh ti doh chyu teh u. Hezekiah ta, ABEIPA ta maniah a pachha aw tahpa ta a cha reipasao khiahtala a pyh khah u.

³³ Pho to zy khazoh zydua hry liatahpa rai ta nama râh cha Asuria beipa tawhtapa ama cha pachha beih ma?

³⁴ Hama nata Arapha khazoh zy cha khataih lâ ama y haw? Sephavai zy, Hena zy, Iva zy, khazoh zy chhao kha khataih lâ ama y haw? Samari kha kei tawhtapa ama pachha ma?

³⁵ Râh to khazoh zydua hry liatahpa chata ahy zy ma ama râ, kei tawhtapa pachhapa ta, ABEIPA ta Zerusale he kei tawhtapa a vaw pachha bao hra aw?’ tahpa ta,” tah ta.

³⁶ Zawpi zy deikua cha a thlih thlâh ha ei ta, kawh kha hmah ta a chhy veih ei, abei biepiepa ryhpa cha, “Ano cha a chhy khah u,” tahpa châ tlôh ta.

³⁷ Chatanachata abei o chhôh lâ hyutuhpa Hilkiah sawchapawpa Eliakima zy, châ rohtuhpa Shebna zy, thâtih rohtuhpa Asapha sawchapawpa Zôah zy cha ama chysia hriepa zy kypa ta Hezekiah lâta vawh ei ta, Rabasake bie reipa zy cha chho ei ta.