2 Thatihzy Rona 25

¹ Amaziah cha a bei tua no ta kô syno nata kô pangawhpa châ ta, Zerusale liata kô syno nata kô chaki a bei ta. A nô moh cha Zehôdana, Zerusale chyhsa a châ.

² ABEIPA mohmô liata hmo phapa tao ta; anodeikuacha a palôhrupa pie paki vei.

³ A khihnarâh cha â ipa ta a padua nahta a paw a thietuhpa a chakaotuhpa zy thie ta.

⁴ Anodeikuacha ama sawzy cha thie leipa ta Mawsi châbu ryhpa liata ropa, “Sawzy vâta pawzy ama thi awpa châ leipa ta, pawzy vâta saw zy ama thi awpa châ hra vei; chyhsa to âmo moleina vâta ama thi awpa a châ,” tahpa ta ABEIPA bie a piepa hawhta tao ta.

⁵ Amaziah chata Zudah zy cha pakhy chaimâh ta, Zudah nata Benzami chyhsa zydua âmo chhôhkha zie lymâ hawhta, sâh kha hyutuhpa zy ry liata zy, za kha hyutuhpa zy ry liata zy paysa ta. Kô syno tawhta a chô lâ zydua reih ta, asei nata vyhphao a hmâh theipa, chariah adyuh theipa atlyhpa chyhsa thy sythôh y ei ta.

⁶ Izarel râh liatahpa chyhsa thatlôpa riahphapa thy sykha tâkâ talent za kha ta pahlaosa hra ta.

⁷ Chârasala a hnohta Khazohpa chyhsa mo pakha a vy ta, “Hy abeipa y, Izarel pheisaih zy cha nâ lâta a vy kha se, ABEIPA cha Izarel chyhsa zy, Ephrai pathla zydua pahlypa hnohna chata y tlôh lei khâh ta.

⁸ A siepa na châ khiahtala, nâ ta riahpha ngaitapa ta adyuhna liata na y awpa ta na pangiasa khiahtala Khazohpa ta khakhaipa hmiakô liata a cha panawhsa aw; Khazohpa chata bao theina nata panawh theina hnei tlôh ta,” vaw tah ta.

⁹ Amaziah ta Khazohpa chyhsa hnohna chata, “Cha khiahtala Izarel pheisaih zy ei pie hawpa talent za kha cha kheihta e ei tao aw?” tah ta. Khazohpa chyhsa chata, “ABEIPA châta cha hlâta a hluhpa cha a cha pie thei na,” tah ta.

¹⁰ Chatanachata Amaziah chata Ephrai râh tawhta pheisaih a ypa zy cha kua heih awpa ta panano ta. Zudah zy chô liana chata ama pathi-ia ngaita ta, kua haw ei ta.

¹¹ Châhrasala Amaziah chata palôh dua leipa ta a chyhsa zy a chhi ta.

¹² Thy kha hropa cha Zudah zy ta a hrohpa ta patu ei ta, lôpanô laki lâta a chhi ei ta, lôpanô laki tawhta chati pathla ei ta; zao khai haw ei ta.

¹³ Anodeikuacha Amaziah ta a hnohta chariah adyuh awpa ta a sie lei awpa ta a pakuasapa pheisaih zy chata Zudah râh khih zy, Samari tawhta Behôrô taihta a vaw dyuh ei ta, chyhsa sâh thôh thie ei ta, hraona sôh a hluhpi la ei ta.

¹⁴ Amaziah cha Edôma mo thiepa ta a vaw kua tawhta Seira pathlazy sahlao khazoh zy vaw phaoh ta, a khazoh châta padua ta a chhy ta, rohpahâhpa zy raopa ta, ABEIPA pathi thata pa-ia ta, a hnohta hrohsopa tuah ta, cha chata a hnohta, “Na ku tawhtapa a chyhsa zy chhao a pachha thei leipa phopi khazoh zy cha khazia e na tlua?” tah ta.

¹⁶ Ano hnohta bie a rei hai nona chata abeipa chata, “Abeipa ryu reituhpa ta eima cha tao ma? A thlih thlâh ha teh! Khazia e na hro na pahlei aw,” tah ta. Chatanachata hrohsopa chata, “Khazohpa ta he hawhta na taopa vâta nata ei ryhraopa na papeisa leipa vâta pahleipadia a châ chhuah, tahpa ei pahno,” tah ta. A thlih haw ta.

¹⁷ Chatanachata Zudah beipa Amaziah chata aryhna a raopa cha a pyh ta, Izarel beipa Zehu sawchapawpa Zehôahaza saw Zehôasha hnohta. “A vy teh, hmia a chhypa ta eimâ moh tua aw,” tahpa ta chyhsa tuah ta.

¹⁸ Izarel beipa Zehôasha chata Zudah beipa Amaziah hnohta, “Lebanaw a hloh ta, Lebanaw liata sidy tho hnohta, ‘Na sawchanônô kha ei sawchapawpa lahpinô châta pahneisa teh,’ tahpa ta bieta ta; Lebanaw liata lyurâhpa sa a vy ta, ahloh cha vaw tlybai khai ha ta.

¹⁹ Nâma heta, ‘Edôma cha ei pahnie,’ tah chi ta, na palôhrupa ta a palai chi ta. Na o liata y molo thlâh ha teh; nâma nata Zudah râh zydua ta raona na chata a pei awpa hmo khazia e na tao aw tly?” tahpa ta chyhsa tuah ta.

²⁰ Châhrasala Amaziah chata vaw nahthlie khoh leipa ta, Edôma mo khazoh zy a tluapa vâta Zudah râh cha ama khakhaipa zy ku liata a pie thei nawpa ta Khazohpa ta a tahpa a châ.

²¹ Chatanachata Izarel beipa Zehôasha cha khy ta; Zudah beipa Amaziah nata Zudah râh Besheme khih liata hmia a chhypa ta adyuh ei ta.

²² Zudah zy cha Izarel zy hmiakô liata panawhpa ta y ei ta, chyhsa to ama o lâta a râpa ta kua chyu ei ta.

²³ Chatawhcha Izarel beipa Zehôasha chata Zudah beipa Amaziah Zôasha sawchapawpa, Zehôasha saw cha Besheme liana chata patu ta, Zerusale lâ a chhi ta, Zerusale kuh cha Ephrai kuh chhikao tawhta kuh ki chhikao taihta dy za palih tlai pacho ta.

²⁴ ABEIPA o liatahpa nata abei o liata ryu sopakhyna liatahpa ngôh nata tâkâri nata hmobaoh zydua a ypa maih Ôbededôma chhaota la ta; patâhna o liata patâh awpa zy chhaota, chatawhcha Samari lâta kua haw heih ta.

²⁵ Zudah beipa Zôasha sawchapawpa Amaziah cha Izarel zy beipa Zehôahaza sawchapawpa Zôasha a thi tawhta kô hrawhleipangawh hroh ta.

²⁶ Amaziah hmotaopa hropa zy cha a thaona tawhta a chhâna taihta, Zudah beipa nata Izarel beizy amâ bei no tahpa kyh rona châbu liata ropa ta châ vei ma?

²⁷ Amaziah chata ABEIPA a zipa a bâhsai pata nahta Zerusale liana chata tei ei ta, Lakhi lâta arâ ta. Chârasala Lakhi liana chata chyhsa chadaisa ei ta, cha liana chata thie haw ei ta.

²⁸ Chatawhcha a ri cha arâ ta phaoh ei ta; a mahpaw zy hnohta Zudah khihpi liata pabu haw ei ta.