Ryureihtuhpazy 16

¹ Sasawna cha Kaza khih lâta sie ta, cha liana chata sihryhpa he kei hmô ta, y khoh ei ta.

² “Sasawna he lâ a vy,” tahpa ta Kaza mozy ta ama pahno nahta, doh ei ta, khihpi kuh chhikao thaby liana chata zâkhihdei ta a byh ei ta. Zâkhihdei chata a chalihpa ta y ei ta, “Khih vaw deih tua sala eima thie aw,” tah ei ta.

³ Châhrasala Sasawna cha zâcho taihta a zia ta, thyu ta, khihpi kuh ochhi zy nata a tôh miano patu ta, a chakana zy chhao taihta phia khai ta, a ngiatlâh ta a pu ta, Hebraw dady tlâh laki lâta khykhei ta.

⁴ A noh hro via ta cha Sôre saikao liatahpa chanô pakha khoh ta, a moh cha Delilah a châ.

⁵ Philistina abeizy cha ano lâta khy ei ta, a hnohta, “Ano cha pahniepa ta, chahrypa ta eima panawh thei nawpa ta a thatlô ngaitana chhâpa pahno a chhuahpa ta reipasao teh; chatanachata eima zydua heta tâkâ sâh kha nata za kha eima cha pie chyu aw,” tah ei ta.

⁶ Chatanachata Delilah chata Sasawna hnohta, “Na thatlô ngaitana chhâpa he na chho tua, kheihta e, panawhsa pata chahry theipa na châ aw,” tah ta.

⁷ Sasawna chata a hnohta, “Libaw ri thiehpa, a raoh leipa, miasari ta na chahry ei sala, chatanachata ei thatlô leipa aw ta, mo hropa hawh hra ta ei châ aw,” tah ta.

⁸ Chatanachata Philistina abeizy chata libaw ri thiehpa miasari a raoh leipa zy cha pie ei ta, chazy chata chahry ta.

⁹ Chhôhpadâhpa liahliah ta a ru lâta a byhtuhpa zy soh ta, a hnohta, “Sasawna y, Philistina mo ta ama cha siehnao!” tah ta. Chatawhcha libaw rizy cha mei ta lari a kâ pachhôpa hawhta chhie thlâh ha ta, a thatlôna chhâpa cha pahnopa châ vei.

¹⁰ Delilah ta Sasawna hnohta, “Na dôvei chi ta, haipa ta eina chho chi; kheihta chahry thei awpa ma na châ, na chho bâ teh,” tah ta.

¹¹ Ano chata a hnohta, “Khawhri charipa a thiehpa, hmâ chachei leipa ta, na chahry ei sala, chatanachata ei thatlô leipa aw ta, mo hropa hawh hra ta ei châ aw,” tah ta.

¹² Chatanachata Delilah chata, khawhri charipa thiehpa la ta, chahry ta, a hnohta, “Sasawna y, Philistina mo ta, ama cha siehnao!” tah ta. Chhôhpadâhpa chhôh liana chata a ru lâta a byhtuhpa zy kha y ei ta. Chatawhcha a ku chahryna cha lari hawhta chhie thlâh ha ta.

¹³ Delilah chata Sasawna hnohta, “Na dôvei chi ta, haipa ta eina chho ngâthlâh ha chi; kheihta chahry thei awpa ma na châ, na chho tua,” tah ta. Ano chata, “Ei sâ phiehpa miasari he thai liata sa pâ la, a châ thlâh ha,” tah ta.

¹⁴ Chatawhcha hraina ta khâchâ hraih ta, a hnohta, “Sasawna y, Philistina mo ta ama cha siehnao!” tah ta, â môpa a kaw thei ta, thai hraipâna nata thai chhaota thlo khai ha ta.

¹⁵ Ano ta a hnohta, “Na pathipalôh he na pie tlôh leipa chi ta, kheihta zie ta ma, ‘Na kyh ei cha pachâ,’ na tah thei tly? He he ei thôh tlai eina dôveina chi a châ, palâsa haw chi ta, na thatlô ngaitana chhâpa he na chho leipa ta khâ na y thlâh haw,” tah ta.

¹⁶ Noh charei a haw ngâthlâh ha ta, a reipasao ngâ tyhpa vâta thina taihta a palôhrupa nôpo ha ta.

¹⁷ Chatanachata a palôhrupa zydua chho khai ha ta, a hnohta, “Ei luh liana heta sâ ngyuna rai hmâpa châ beih leipa ta; ei nô chhi liata ei y no tawhta Khazohpa châta Nazarai ta a vaw ypa châ na ta. Atahmâ he ngyu ha aw sala ei thatlôna cha a lei khai aw, chatanachata ei tha tlô leipa aw ta, mo hropa hawh hra ta ei châ aw,” tah ta.

¹⁸ Chatawhcha a palôhrupa zydua cha a chho khai haw tahpa Delilah chata a pahno pata nahta, Philistina mo abeizy cha, “A khy heih tua teh u, a palôhrupa zydua eina chho khai haw,” tahpa ta bie ta ta. Philistina mo abeizy cha ano lâta khy ei ta, tâkâ cha kaw cheih ei ta.

¹⁹ Chatawhcha a byh chô liata pamôsa ta; chyhsa aw ta, a sâ phiehpa miasari cha ngyu khai ha ta. Chatanachata a riepatheisapa tho ta, a thatlôna lei khai ha ta.

²⁰ Ano ta, “Sasawna y, Philistina mo ta ama cha siehnao!” tah ta. Chatawhcha â môpa cha a kaw thei ta, “Noh hro hawhna khata pua heih aw na ta, a tliepa ta ei pua thlâh ha heih aw,” tah ta. Châhrasala ABEIPA ta a siesai haw tahpa rai pahno leipa ta.

²¹ Philistina mo chata patu ei ta, a mo thaoh ei ta, Kaza khih lâta zukhei ei ta, dawh keihrai zy daih ei ta; atâhna o liata sâh charieh tyh ta.

²² Châhrasala a luh ngyupa kha vaw thao heih ta.

²³ Philistina abeizy cha ama khazoh Dakao lâta atheihna rôhnah ngaitapa hlâ awpa nata a palysa awpa ta a pahmaohpakhy chaimâh ei ta; “Eima khazoh ta eima khakhaipa Sasawna maniah a pie haw mâ tâh,” tah ei ta.

²⁴ Zawpi zy chata ama hmô nahta ama khazoh cha reithai ei ta, “Eima khazoh ta, eima khakhaipa nata eima râh a paraotuhpa chyhsa hluhpi maniah a thietuhpa cha eima ku liata maniah a pie haw mâ tâh,” tah ei ta.

²⁵ Chatawhcha ama pathipalôh a thapha ngaita nota, “Sasawna cha mophapa châta aw teh u,” tah ei ta. Chatawhcha Sasawna cha atâhna o tawhna chata aw ei ta, ama hmiakô liana chata mophapa ta y ta. Otôh nata otôh likawh liata paduasa ei ta.

²⁶ Sasawna chata, a chakaotuhpa hawti hnohta, “He o a dyutuhpa otôh he na pahriasa tua, ei hnieh tua aw,” tah ta.

²⁷ Cha o cha chapaw nata chanô ta bie ei ta; Philistina abei zydua cha, cha liana chata y khai ei ta, Sasawna mophapa ta a saituhpa zy cha o liana chata chapaw nata chanô sâh thôh y ei ta.

²⁸ Sasawna chata ABEIPA cha pado ta, “Hy Abeipa KHAZOHPA y, ngiachhie ngaitapa ta nâ thei thlâh ha la, ngiachhie ngaitapa ta atahmâ deita he tha na patlô la, hy Khazohpa y, ei mo karâ no phuh he Philistina mo chô liana heta viarithôpa ta ei y thei nawpa ta,” tah ta.

²⁹ Sasawna chata cha o a dyuhtuh chaipa a su miano cha hria ta, a ku chachâh lâ miakha pahnieh ta, a ku chavei lâ miakha.

³⁰ “Chatawhcha Sasawna chata, “Philistina mo he ei thiepa tua aw,” tah ta. Chatanachata a tao theipa hawhta a bôh ta; abeizy nata zawpi a ypa zydua cha o chata vi chaimâh ta. Chatanachata a hro nota a thiepa zy hlâna chata a thi nota a thie papazy cha hluh via ei ta.

³¹ A unawhpa zy nata a paw chhôhkha zydua cha a zu ei ta, la ei ta, khykhei ei ta, Zôrah nata Estawl likawh liata, a paw Manôah pabuna su liata pabu ei ta. Kô syno Izarel zy chô liata ryu a reih.