Zawba 7

¹ “Alei liana heta chyhsa ta chakaona kyh rupa hnei tlai vei ma? A hrona nohzy cha a hlaopa hawh dei châ vei ma?

² Sei, nodipa a khoh ngâsâpa hawhta nata, a hlaopa ta a hlao awpa sai a sai tyhpa hawh tlaita,

³ khâpahrao leipa ta thla hluhpi hmâpa ta vaw pahlei na ta, noâhchhi kawpa zâ zy ei châta raopa a châ.

⁴ A zia na ta, ‘Khatita ei thyu aw? tah na ta. Châhrasala zâ cha pasih kaw ta, khihpavâ chy taih a paliepatheihpa ta ei y.

⁵ Ei sapa cha alô nata apuapa ta a khu; ei vopa cha a vaw bie ta, a kai heih tyh

⁶ Ei nohzy he thaisatuhpa chakhao hlâta a chatlie via, hnabeiseina hnei leipa ta lei ei ta.

⁷ “Ei hrona he thlih hawh dei a châ tahpa a thei la; ei mo ta hmophapa hmô khao aw vei.

⁸ Nâ hmôtuhpa mokhaoh chata na hmô khao aw vei; na mozy ei chô liata na moh aw ta, châhrasala y aw va na.

⁹ Meihdo a pai ta, a leidiapa hawhta, Sheol lâta a zupa cha a khy heih aw vei;

¹⁰ a o lâna cha kua heih khao leipa aw ta, a su chata ano cha pahno khao aw vei.

¹¹ “Chavâta ei pakah cha a sohsi aw va na; palôhrupa pachâ chhiepa ta ei vaw reih aw na; palôh pasa ngâsâpa ta ei paphôh aw.

¹² Tilaipi tlyma châ na ta, tilaipi hmohrohneipa tlyma châ na ta, nâma ta na vaihtuhpa tlao na soh tly?

¹³ ‘Ei rakhô ngiaryhpa châ ha sala, ei ziana heta ei paphôhna a panaisa aw,’ ei tah.

¹⁴ Nâma chata mâsana kyh ta na pachhipary chi ta, aluahna hmâpa ta na pachisa chi ta,

¹⁵ ei hrona heta riesaona tlao a tlyh ta, ei pasanazy hlâna heta thi chhao.

¹⁶ Eina ai ngâsâ; hro parei khoh aw va na. Kei deita tlao y aw sala, ei noh zy he khâpahrao leipa a châ hih.

¹⁷ Chyhsa he khâpa ma châ ta, Pasasa chi ta, a chô liata na pathipalôh na pahnieh.

¹⁸ Ano cha my chareih tly chi ta, ano cha na pasia tyh?

¹⁹ Khachâ e nâ heisai leipa ta y aw chi ta, ei pachih ei palâ chhôh chhao na pathlie khoh leipa ta na y tly?

²⁰ Moleipa châ aw sala, na chôta khâpa e ei to aw, hy chyhsa zy vaihtuhpa y? Khazia e pahnosana chata eina soh chi? Khazia keima cha phaohripa ei vaw châ?

²¹ Khazia ei paraona cha nâ ngiahthai vei, ei moleina zydua khazia na siekhei vei? Atahmâ he dolei liata a zia na ta, thata na tlua aw chi ta, châhrasala y aw va na,” tah ta.