Athaona 44

¹ Chatawhcha Zawsi chata a o mohkhâhtuhpa hnohna chata, “Cha chyhsazy sykhao kha ama phao theina taihta sâh ta pabie la, ama tâkâ chyu cha ama sykhao paka liata soh chyu teh,

² ei nyu, tâkâ nyu kha ama seihnai chaipa sykhao paka liata soh teh, a sâh ty tâkâ chhao khata,” tahpa ta bie pie ta. Ano chata Zawsi bie reipa hawhna chata tao ta.

³ Khih a deih pata nahta, âmo cha ama alâzy chhaota pasiesa haw ei ta.

⁴ Chatawhcha khih tawhta ama puapa cha lâhlapi ama sie hlâta Zawsi ta a o mohkhâtuhpa hnohta, “Thyu la, chyhsazy kha a kei chadai teh; na pha pata nahta ama hnohta, ‘Kheihtazie ta, hmo phapa hmo pha leipa ta nama thô tly? Khâzia ei tâkâ nyu nama paru tly?

⁵ Kha nyu kha ei zibeipa Kresawti dona nata a pachaona tlai châ vei mâ? He hawhta nama taopa he nama tao chhei na,’ tah mah y,” tah ta.

⁶ Chatawhcha a kei chadai ta, pha ta, cha biezy ama hnohta reih ta.

⁷ Âmo chata a hnohta, “Pâpuh, kheihtazie ta e, he hawhpa bie na reih? Na chakaotuhpazy heta, cha hawhpa hmo eima tao leizie cha!

⁸ Eima sykhao paka liata tâkâ eima hmôpazy chhao kha, Kana râh tawhta nâ lâta eima vaw phaoh heih khâ; kheihta e na zibeipa o liatahpa tâkâ tlyma, ngôh tlyma, eima paru thei aw tly?

⁹ Na chakaotuhpazy hry liata ahyrai na hmôna maih cha thi mawh sy, keimo chhaota eima zibeipa chakaotuhpa ta eima y aw na,” tah ei ta.

¹⁰ Ano chata, “Nama bie lymâ hawhta châ la vâh, anodeikua cha ahyrai ei hmôna maih cha, ei chakaotuhpa ta y mawh sy, nâmo deikua cha seina hnei leipa ta nama y aw,” tah ta.

¹¹ Cha pata nahta a chatliepa ta âmo sykhao cha alei liata pachhô chyu ei ta, âmo sykhao pahy chyu hra ei ta.

¹² Chatawhcha ano chata, ama uhthei chaipa tawhta a thao ta, ama seihnai chaipa taihta tlua ta; nyu cha Benzami sykhao liana chata hmô ta.

¹³ Cha pata nahta ama chysia cha hrie ei ta, ama alâ cha paphaosa heih chyu ei ta, khih lâna chata kua haw ei ta.

¹⁴ Zudah nata a unawhpazy chata Zawsi o cha kei tlô ei ta, ano cha cha liana chata khâ vaw y ta, chatawhcha a hmiakô liata pakhu paneih chyu ei ta.

¹⁵ Zawsi chata ama hnohta, “Khâpa hmo e nama tao, keima hawhpa chyhsa heta pachao ama thai tahpa pahno veih ei chi mâ?” tah ta.

¹⁶ Zudah chata, “pâpuh, na hnohta khâpa eima reih aw? Khâpa eima cha chho aw? Kheihta e, eima reih aw tly? Khazohpa ta na chakaotuhpazy moleina cha a hmô haw hih; na chakaotuhpazy eima châ haw hih, keimo nata a ku liata nyu ama hmôna chhao hih,” tah ta.

¹⁷ Châhrasala ano chata, “Cha hawhna chata ei tao lei awpa zie cha! A ku liata nyu ama hmôpa deita he ei chakaotuhpa ta a y aw; nâmo deikua thlahlôhpa ta nama paw lâ sie teh u,” tah ta.

¹⁸ Cha pata nahta Zudah chata Zawsi cha a kei hnia ta, “Hy pâpuh y, ngiachhiepata ta, na chakaotuhpa he, na nah theina liata bie kawh kha na pareisa la, na hiehâhna cha, na chakaotuhpa chô liana heta pa-iasa kha y; nâ cha Phirao hawh tlaita châ tlôh chi ta.

¹⁹ Pâpuh y, Paw tlyma, uhnawhpa tlyma nama hnei ma?’ tahpa ta, na chakaotuhpazy he maniah hiahri chi ta.

²⁰ Chatawhcha keimo ta ei beipa hnohta, ‘Paw pawpi ngaitapa nata a pawpi lâta saw hawtipa ta hnei pi ta, cha uhtapa cha thi ta, a noh sapa liata cha, ano deita y ta, a paw chata ano cha dao kaw ta,’ tah pi ta.

²¹ Chatawhcha nâ ta, na chakaotuhpazy hnohna heta, ‘Ano cha ei moh ta ei hmô thei nawpa ta ei hnohta a zâ chhi teh u,’ tah chi ta.

²² Pâpuh y, keimo ta na hnohta, ‘Hawtipa chata a paw siesai thei aw vei, a paw a siesai khiahtala a paw cha a thi thlâh ha aw,’ tah pi ta.

²³ Nâ ta na chakaotuhpazy hnohna heta, ‘nama seihnai chaipa cha nama hnohta a zu hra vei khiahtala ei hmia na hmô khao aw vei eichi,’ tah chi ta.

²⁴ Na chakaotuhpa ei paw hnohta eima tlô nata, na bie cha chho pi ta.

²⁵ Eima paw chata, ‘Sie heih ula, sâh bâhta chhâ eima châta za chalei heih teh u,’ tah ta.

²⁶ Kei ta, ‘Zu thei khao ma pi. Eima seihnai chaipa he, eima hnohta a hlao hra khiahta deikua cha, eima zu heih aw; eima seihnai chaipa he eima hnohta a hlao vei khiahtala, cha chyhsa hmia cha hmô thei khao aw ma pi,’ tah na ta.

²⁷ Chatawhcha eima paw chata eima hnohta, ‘Ei lahpinô chata sawchapawpa pano eina sapa tahpa nama pahno na.

²⁸ Pakhapa cha, kei tawhta pua haw ta, chaphie khaipa ta a y tlai aw, tah na ta; cha rakha tawhna chata ano cha hmô khao leipa ta y na ta.

²⁹ He chyhsa chhao he kei tawhtapa a chhiepa ta hmo pha leipa a zâ tyh khiahtala ei luh pawhpa he pachârôhna ta thlâ lâta nama pakhôsa aw,’ tah ta.

³⁰ Chatanachata hawtipa he eima hnohta a hlao leipa ta, na chakaotuhpa ei paw hnohta, ei tlô khiahtala, a hrona cha hawtipa hrona nata khâchâ a pazaopa vâta

³¹ hawtipa he a hlao hra vei tahpa, a pahno pata nahta, a thi thlâh ha aw; na chakaotuhpazy heta na chakaotuhpa eima paw luh pawhpa cha, pachârôhna ta thlâ lâta eima pakhôsa aw.

³² Na chakaotuhpa heta, ‘Na hnohta ei vaw chhi heih leipa khiahtala, chhâzaw ta ei paw liata a maoh ei phaoh aw,’ tahpa ta ei paw liana chata hawtipa kyh liana heta a totuhpa ta a tao haw tlôh na ta.

³³ Chavâta ngiachhiepa ta na chakaotuhpa he, hawtipa vyuhpa ta, na chakaotuhpa ta na paysa la; hawtipa he a uhtazy hnohta pakhysa mah y.

³⁴ Hawtipa ei hnohta â hlao leipa ta ei paw hnohta kheihta e ei khy thei aw, ei paw chô liata chhiena a tlô awpa cha ei hmô aw mâh tâh,” tah ta.