Athaona 26

¹ Cha râh liana chata Abaraha a hro nota chakâhna a tlô tuapa leipa khata chakâhna vaw tlô heih ta. Chatawhcha Aisika cha Philistina sahlao Abimeleka lâta Kera khih lâ zu ta.

² ABEIPA cha a hnohta a vaw luah ta. “Izi râh lâ cha zu khâ; râh ei cha chho awpa liana chata y teh.

³ He râh liana heta y chy la, chatanachata na hnohta y aw na ta, byhnâ ei cha pie aw; he râh zydua he nâma nata na pathlazy piepa ta na paw Abaraha hnohta chhie ei sapa kha ei pa-i aw,

⁴ avâ liata awhsi zie ta na pathlazy cha papôh aw na ta, he râh zydua he na pathlazy ei pie aw; chatawhcha na pathla liana chata khizaw liata chi to ama hu â hieh aw;

⁵ Abaraha chata ei bie a ngiah ta, ei bie chhopazy, ei bie piepazy, ei bie raopazy, ei ryhpazy chhao a zyhpa vâna khata,” tah ta.

⁶ Aisika chata Kera khih liana chata pahrâ haw ta.

⁷ Cha khih liata chyhsazy chata a lahpinô thâtih hiahri ei ta, a hmi a phapa vâta, “He khih liata chyhsazy heta Rebeka vâta eina thie pathlei aw ei na,” tahpa ta, “Ei lahpinô a châ,” tah ngâh vei.

⁸ Cha liana chata bohpi a y tawhta Philistina mo abeipa Abimeleka chata opy tawhta sai ta, Aisika chata a lahpinô Rebeka â pangia palipa hmô ta.

⁹ Abimeleka chata Aisika cha aw ta, “Pachâ teh, na lahpinô a châ tlai he zaw; khazia e, “Ei sietanô a châ na tah?” tah ta. Aisika chata a hnohta, “Ano vâta ei thi pathlei aw na,’ ei tahpa vâta a châ,” tah ta.

¹⁰ Abimeleka chata, “Eima chôta na hmo taopa he, kheihtazie ta a châ tly? Chyhsazy hryta ahyrai ta na lahpinô he amâ ziakhei thei mâh tâh, chatanachata eima chô liana heta thai leina na vaw patlôsapa a châ aw,” tah ta.

¹¹ Chatawhcha Abimeleka chata, “Ahyrai he chyhsa he tlyma, a hriatuhpa cha thie thlyu awpa a châ,” tahpa ta chyhsa zydua cha bie pie ta.

¹² Chatawhcha Aisika chata cha râh liana chata sâh tu ta, cha kô liana chata a lie za kha ta hmô ta. ABEIPA ta byhnâ pie ta.

¹³ Ano cha vaw rôhnah ngaita ta, chyhsa rôhnah ngaitapa châna taihta lai rili ta.

¹⁴ Mietahkupa zawzy, viahchao zawzy hnei ta, chhôhkha hluh ngaitapa hnei hra ta, chatanachata Philistina sahlao chata mohnao kaw ei ta.

¹⁵ (Chatawhcha a paw Abaraha a hro nota a paw seizy ta tikhaoh rei ama chaopa zydua cha, Philistina sahlao ta nai ha ei ta, alei ta pabie khai haw ei ta..

¹⁶ Abimeleka chata Aisika hnohta, “Keimo tawhna heta sie syulyu ha teh; keimo hlâta na thatlô via tlôh ta,” tah ta.

¹⁷ Chatanachata Aisika cha, cha tawhna chata pua ta, Kera saikao liana chata a poh-o rai ta, cha liana chata pahrâ ta.

¹⁸ Chatawhcha Aisika chata a paw Abaraha a hro nota ama tikhaohrei chaopazy cha chao heih ta; Abaraha thi tawhna khata, Philistina mo chata vaw nai khai haw tlôh ei ta; chatawhcha a paw ta moh a vaw bipa lymâ hawhna khata a moh bi chyu ta.

¹⁹ Châhraala Aisika seizy ta saikao liana chata chao ei ta, cha liana chata tikhaohrei a hnawh a hneipa hmô ei ta,

²⁰ Kera liata sahroh vaihtuhpazy chata, “Ti he, keimo eih a châ,” tahpa ta Aisika sahroh vaihtuhpazy nata a ei ei ta. Chatanachata rairuna a tyhpa vâta tikhaohrei moh cha Eseka* bi ta.

²¹ Chatawhcha tikhaohrei hropa chao heih ei ta, cha chhao cha chhu a chhuahpa ta a tu heih ei ta; cha vâna chata Sinah* bi ta.

²² Cha tawhtahpa cha a pasie ta, tikhaohrei hropa chao heih ta, cha cha chhu a chhuahpa ta a tu khao veih ei; chatanachata, “Atahmâ la ABEIPA ta su kawh ngaitapa maniah taopa haw ta, he râh liana heta chi hluhpi eima pathla ha aw,” tahpa ta a moh Rehôbô* bi haw ta.

²³ Cha tawhna chata Beheba lâ sie ta.

²⁴ Cha zâna chata ABEIPA cha a hnohta a vaw luah ta, “Kei he, na paw Abaraha Khazohpa cha ei châ; chi khâ, na hnohta ei y mâ tâh, byhnâ cha awpa aw na ta, ei sei Abaraha vâta na pathlazy cha ei papôh aw mâ tâh,” tah ta.

²⁵ Cha liana chata maisâh tao ta, ABEIPA moh pado ta, cha liana chata a poh-o parai hra ta. Chatawhcha Aisika seizy chata, cha liana chata tikhaohrei chao hei ei ta.

²⁶ Chatawhcha Kera tawhta Abimeleka cha a viasa Ahusa nata a pheisaih sahlao hyutuhpa Phikawl chhaota, a hnohta vawh ei ta.

²⁷ Aisika chata ama hnohta, “Nâ hao ei chi ta, nâmo tawhta na pasiesa tlôh ei chi ta, khâpa vâta e, ei hnohta namâ vy tly?” tah ta.

²⁸ Âmo chata, “ABEIPA cha na hnohta a y tahpa a siapa ta pahno pi ta; chatanachata na pei eima cha ty beih leipa hawhta nata hmo phapa dei leipa ta cha, na chôta khâpahma tao leipa pi ta, a phapa ta eima cha pasiesapa hawhna khata,

²⁹ keimo chhao eima chhie nawpa rai, na tao leina awpa ta, eima likawh ta keimo nata nâma likawh lina tlai heta, chhiesana vaw y sala, na hnohta bie maniah pahraisa teh, eima tah. Atahmâ la ABEIPA byhnâ a totuhp na châ haw hih,” tah ei ta.

³⁰ Chatawhcha ano chata âmo châta kyhchhi tao ta, niepa ta doh haw ei ta.

³¹ Mydi ta thyu ei ta, chhie a sakhâh rairieh ei ta; Aisika ta âmo pasiesa ta, chatanachata ano tawhna chata plôhtlâhpa ta pua haw ei ta.

³² Cha noh lilaw chata Aisika seizy cha a vy ei ta, ama tikhaohrei chopa thâtih vaw chho ei ta, a hnohta, “Ti eima hmô haw,” tah ei ta.

³³ Ano chata cha tikhaohrei cha Shiba* bi ta, chavâta cha khih moh cha, atahmâ taihta Besheba châ ta.

³⁴ Chatawhcha Esaw cha kô sypalih a châ nata Hiti chyhsa Beri sawchanô Zudi nata Hiti chyhsa Elawna sawchanô Basema lahpinô ta hnei ta.

³⁵ chazy cha Aisika nata Rebeka pathipalôh rie a patheituhpazy châ ei ta.