1
Abi thla cha, thla chaypa ta hnei ula, ABEIPA nama Khazohpa châta zawpakhô ô nawpa ta hmâh teh u; Abi thla liana heta ABEIPA nama Khazohpa chata Izi râh tawhtapa zâ ta a cha chhihtha ei.
2
ABEIPA ta a moh yna su a rao awpa liana chata ABEIPA nama Khazopa lâta nama mietahkupa zaw hry liatahpa nata sahroh zaw hry liatahpa zawpakhô atheihna châta nama hlâ awpa a châ.
3
Viahchhâ thinô pahlaopa chhaota nama nie awpa châ vei; nama hro chhôh liata râh tawhtapa nama puana noh cha nama pahno thlâh ha nawpa ta, noh sari viahchhâ thinô pahlao leipa, rietheina viahchha tlaita, nama ni awpa a châ. Izi râh tawhta a parah ngaitapa ta puapa nama châpa kha.
4
Nama râh zydua chhôh liata noh sari chhôh cha thinô rai rai a y awpa châ leipa ta; chatawhcha noh kha noh zâlâ ta nama theihna sa cha zâkhidei ta a mylâ taihta khâpahmah a y awpa châ hra vei.
5
ABEIPA nama Khazohpa ta a cha piepa ei nama yna khataih liata rai zawpakhô atheihna ta atheih leipa aw eichi ta;
6
ABEIPA nama Khazohpa ta a moh yna su a rao awpa liana chata a châ aw, cha liana chata Izi râh tawhta nama vaw puana daihti hawhpa zâla ta no tla ta zawpakhô atheihna ta namâ theih awpa châ ta.
7
Chatawhcha rao aw eichi ta, ABEIPA ta su a rao awpa liana chata nie aw eichi ta, my ta a di heih aw eichi ta, nama poh-o liata namâ di awpa a châ.
8
Noh charu chhôh cha viahchhâ thinô pahlao leipa nama nie awpa a châ; chatawhcha noh sari noh cha ABEIPA nama Khazohpa châta pakhypi pathaihpa châ aw ta; cha liata rai nama hria awpa cha vei.
9
Hâta ei sari nama reih awpa châ ta; sâh sâhkara ta âpa ta namâ thao noh tawhta hâta ei sari cha nama reih awpa a châ.
10
ABEIPA nama Khazopa ta byhnâ a cha piepa zie lymâ hawhta nama hriapa hry liatahpa nâmo lôhthai ta hmohlâpa cha hlâpa ta ABEIPA nama Khazohpa châta noh sari kyhchhi nama hnei awpa a châ;
11
ABEIPA nama Khazohpa ta a moh yna a rao awpa su liana chata nâmo chhaota nama sawchapawpazy, nama sawchanônôzy, nama seichapawpazy, nama seichanônôzy, nama yna liata Livai mozy, nama hry liata a ypa râh hropa chyhsazy, paw hnei leipa zy, nôhmei zy chhaota ABEIPA nama Khazohpa hmiakô liata thapha ngaitapa ta y aw eichi ta.
12
Chatawhcha Izi râh liana khata sei nama châ tahpa nama pahno thlâh ha awpa châ ta; he ryhpa zy he a chado ngaitapa ta nama zyh awpa a châ.
13
Nama sawhri tawhtapa nata nama kresaohna khaoh tawhtapa nama paly khai nahta noh sari chhôh byureih kyhchhi nama hnei awpa a châ;
14
nama kyhchhi liana chata nâmo chhaota, nama sawchapawpa zy, nama sawchanônô zy, nama seichapawpa zy, nama seichanônô zy, nama yna liata a ypa Livai mo zy, râh hropa chyhsa zy paw hnei leipa zy, nôhmei zy chhaota, thapha ngaitapa ta nama y awpa a châ.
15
ABEIPA ta su a rao awpa liana chata ABEIPA nama Khazohpa châta noh sari kyhchhi nama hnei awpa a châ; ABEIPA nama Khazohpa ta nama kôveihna zydua liata nata nama ku hriapa zydua liata zy, byhnâ cha pie aw ei ta, aly ngaitapa sai ta nama y aw.
16
Kô chareih ta nama chapaw zydua zy cha ei thôh ABEIPA hmiakô liata su a rao awpa liana chata namâ luah awpa a châ: viahchhâ thinô pahlao leipa kyhchhi liata zy, noh sari kyhchhi liata zy, byureih kyhchhi liata zy, ABEIPA hmiakô liata ahyhmah ta ku ruapa ta namâ luah awpa châ vei;
17
ABEIPA nama Khazohpa ta byhnâ a cha patosapa lymâ hawhta chyhsa ta ama tao theipa rakha ta ama pie awpa a châ.
18
ABEIPA nama Khazohpa ta a cha piepa nama kuh chhikao zydua liata nama pho lymâ hawhta ryureituhpa zy nata hyutuhpa zy a tao chyu aw eichi ta; zawpi zy a sia ngaitapa ta ryu ama reipa awpa a châ.
19
 do leipa ta ryu nama reih awpa châ vei; ahyhmah khokheipa hlei nama hnei awpa châ vei; hmopiepa nama la awpa châ hra vei, hmopiepa chata chysa sopa zy mo pachao ta, chyhsa siapa zy bie khâpa hrao leipa ta pachâsa tyh tlôh ta.
20
ABEIPA nama Khazohpa ta a cha piepa râh cha nama to thei nawpa nata nama hroh thei nawpa ta a sia ngaitapa dei cha nama zyh awpa a châ.
21
ABEIPA nama Khazohpa maisâh nama tao awpa kâ lâ liana chata tho kheihawhpa chi hmahta Asherah châta nama loh awpa châ vei.
22
ABEIPA nama Khazohpa ta â haopa alô chhao nama bô awpa châ hra vei.
