2 Abeizy 14

¹ Izarel beipa Zôahaza sawchapawpa Zôasha kô no a bei kô ta Zudah bei Zôasha sawchapawpa Amaziah abei pathao.

² A bei tua nona chata kô syno nata kô pangawhpa châ ta, Zerusale liata kô syno nata kô chaki abei ta. A nô moh cha Zehdadi, Zerusale zuah a châ.

³ ABEIPA mohmô liata hmo sia ngaitapa tao tyh ta, a mahpaw Davi deikua cha a tlu vei; a paw Zôasha hmotaopa hawhpa maih tao tyh hra ta. Anodeikuacha su sâhpa zy la pahleipadia hlei vei; su sâhpa zy liana chata chyhsa zy cha atheih ei ta, rohpahâhpa ama rao tyh.

⁵ A khihnarâh cha a pa-i pata nahta a chakaotuhpa a paw beipa a thietuhpa zy cha thie hra ta.

⁶ Anodeikuacha cha lianycheituhpa sawzy cha thie vei; Mawsi ryhpa châbu liata, “Sawzy vâta pawzy thie awpa châ leipa ta, pawzy vâta sawzy thie awpa châ hra vei; chyhsa to âmo moleina vâta ama thie awpa a châ,” tahpa ta ABEIPA biepiepa ryhpa ropa hawhna khata.

⁷ Edôma sahlao cha Alôh Saikao liata thy kha thie ta, Sela khih a dyuh ta, la ta, a moh ta Zôthel bi ta, atanoh taihta a moh a châ.

⁸ Chatanachata Amaziah ta Izarel beipa Zehu sawchapawpa Zehôahaza sawchapawpa Zehôasha hnohta, “A vy tua, hmia a chhypa ta a moh tua ei si,” tahpa ta chyhsa tuah ta.

⁹ Izarel beipa Zehôasha chata Zudah beipa Amaziah hnohta, “Lebanaw liata ahloh ta Lebanaw liata sidy tho la ta, ‘Na sawchanônô kha ei sawchapawpa lahpinô ta pahneisa teh,’ tahpa ta bieta ta; Lebanaw liata lyurâhpa sa a vy ta, ahloh cha vaw tly pathla haw ta.

¹⁰ Nâma heta Edôma sahlao cha pahnie haw tlai chi ta, na palôhrupa a vaw palai haw hih. Nâ palaina kha ykhei molo thlâh ha teh; nâ nata Zudah râh duata paraona na châta a pha lei awpa hmo khâpawpa e na papua tly?” tahpa ta chyhsa tuah hra ta.

¹¹ Châhrasala Amaziah chata nahthlie khoh leipa ta. Chatanachata Izarel beipa Zehôasha cha khy ta, Zudah beipa Amaziah nata Zudah râh Besheme khih liata hmia a chhypa ta a mô haw tlai ei ta.

¹² Zudah cha Izarel zy liata nawh haw ta, chyhsa to âmo o lâta a râ chyu ei ta.

¹³ lzarel beipa Zehôasha chata Zudah beipa Amaziah cha Besheme liata patu ta. Zerusale lâta vawh ta, Zerusale kuh cha Ephrai kuh chhikao tawhta kuh ki chhikao taihta dy za palih tlai pacho ta.

¹⁴ ABEIPA o liatahpa nata abei o liatahpa nata abei o liata pachôna liatahpa ngôh nata tâkâ nata hmobaoh zydua a ypa maih la ta, nô-u ta patupa zy chhaota, chatawhcha Samari lâta a di haw ta.

¹⁵ Zehôasha hmotaopa thâtih hropa zy, a hmotaothei zie zy, Zudah beipa Amaziah adyuhna kyh zy cha Izarel abei zy amâ bei no tahpa kyh rona châbu liata ropa ta y vei mâ?

¹⁶ Zehôasha cha a mahpaw zy hnohta a mô ta, Samari liata Izarel abei zy hry liata pabu ei ta; a sawchapawpa Zerôbaw cha ano vyuhpa ta abei haw ta.

¹⁷ Zudah beipa Zôasha sawchapawpa Amaziah cha Izarel zy beipa Zehôasha sawchapawpa Zehôahaza thi tawhta kô hrawhleipangawh hroh ta.

¹⁸ Amaziah thâtih hropa zy cha Zudah abei zy amâ bei no tahpa kyh rona châbu liata ropa ta y vei mâ?

¹⁹ Zerusale liata a ru lâta ano tei ei ta, chatanachata Lakhi khih lâta a râ ta. Châhrasala Lakhi lâna chata chyhsa chadaisa ei ta, cha liana chata thie haw ei ta.

²⁰ A ri cha arâ ta siekhei ei ta; a mahpaw zy hry liata Davi khihpi Zerusale liata pabu haw ei ta.

²¹ Zudah chyhsa zydua ta kô hrawhleicharu Azariah a chhi ei ta, a paw Amaziah vyuhpa ta abei ta tao ei ta.

²² Ano chata Elatha cha sa pathi ta, Zudah râh liata pahlao heih ta, cha tawhna chata beipa cha a mahpaw zy hnohta a mô haw ta.

²³ Zudah beipa Zôasha sawchapawpa Amaziah kô hrawhleipangawh a bei kô ta, Izarel beipa Zôasha sawchapawpa Zerôbaw cha Samari liata abei pathao ta, kô sypalih nata kô kha abei ta.

²⁴ ABEIPA mohmô liata hmo pha lei ngaitapa tao tyh ta; Izarel zy hmo paraosapa ta a taopa Neba sawchapawpa Zerôbaw moleina zydua kha a sie saipa rai y vei.

²⁵ ABEIPA Izarel zy Khazohpa ta a chakaotuhpa Kahepha chyhsa Amitai sawchapawpa hrohsopa Zawna hmâpa ta a bie reipa hawna khata Hama ngiana tawhta Arabah Tilaipi taihta Izarel liata pahlao heih ta.

²⁶ ABEIPA ta Izarel zy riethei zie cha a ru ngaitapa pahno tlôh ta, sei a châpa nata khotalaipa zy chhao y tlôh leipa ei ta, Izarel zy a châkheituh awpa ahyhmah y hra veih ei.

²⁷ ABEIPA ta Izarel zy moh he avâ ry liata a pahleipadia khai aw tahpa cha a reih leipa rai châ ta, Zôasha sawchapawpa Zerôbaw hmâpa ta tlao a pachha haw.

²⁸ Zerôbaw thâtih hropa zy, a hmotaopa zydua, a hmotaothei zie zy, a chariah a dyuhna kyh zy, cha hlâta Zudah râh topa a châ tyhpa Damaska nata Hama khih Izarel zy chata a vaw la haw heihpa kyh cha Izarel abei zy amâ bei no tahpa kyh rona châbu liata ropa ta y vei mâ?

²⁹ Chatawhcha Zerôbaw cha a mahpaw Izarel beizy hnohna chata a mô hra ta, a sawchapawpa Zekaria cha ano vyuhpa ta abei ta.