1 Samuel 29

勉強

          |

1 Philistina mozy chata ama pheisaih zydua cha Aphe liata pakhy khai ei ta; Izarel mozy chata Zezrel liata tikhaoh kiapâh liata riehmo tao ei ta.

2 Philistina mo abei zy cha a za a za tazy, a sâh a sâh tazy, sie ngâ ei ta, Davi nata a chyhsa zy chata Akisa chhaota hnôh lâ a chhâh ei ta,

3 Philistina abeizy chata, “He Hebrai mozy he khâpa ama tao?” tah ei ta. Akisa chata Philistina abei zy hnohta, “He Davi Izarel zy abei Sawla chakaotuhpa cha dua ei hnohta a y hawpa kei lâta a vaw ngiana tawhta atahmâ taih chhaota a moleina ei hmô leipa cha châ vei mâ?” tah ta.

4 Châhrasala Philistina abeizy a chô liata ama pathi-ia ta; Philistina abeizy chata a hnohta, “Cha chyhsa cha ano chata su na raopa lâna khata a di awpa ta pasiesa la, adyuhna liata eima khakhaipa chhâh a châ pathlei aw na. He chyhsa zy luhpa châna heta he chyhsa nata a zibeipa he a kei paryh thlâh ha heih khiah ei maw?

5 Davi he vei mâ lâna chôta, ’Sawla ta a sâh a sâh ta a thie. Davi ta athy a thy ta, “tahpa ta a thâtih hla ta ama sapa kha? ”tah ei ta.

6 Akisa ta Davi cha aw ta a hnohta, “ABEIPA hrona reipa ta ei reih, chyhsa a do ngaitapa châ chi ta, pheisaih sahlao hry ta ei hnohta na siepa nata nâ di tyhpa zy cha ei mohmô liata pha ngaitapa; kei lâta nâ vy no tawhta atanoh taihta na chô liata khâpahmah pha leina rai hmô va na. Châhrasala abei sahlao zy heta cha pasô veih ei.

7 Chavâta Philistina abei sahlaozy palôh châ leipa ta na paysa lei nawpa ta kua heih la, palôh tlâhpata ta sie mah y,” tah ta.

8 Davi chata Akisa hnohta, “Cha khiahtala khâpa hmo ma ei tao tly? Na hnohta ei y chhôhta atanoh taihna heta ei zibeipa abei chaipa khakhaipa cha adyuh leipa ta ei kua heih awpa ta na chakaotuhpa chô liana heta khâpa ma pahnopa na hnei tly?” tah ta.

9 Akisa chata a chhy ta Davi hnohta, “Ei mohmô liana cha Khazohpa vâlyuhchâpa hawh tlaita pha chi ta: châhrasala Philistina abei sahlao zy heta. ‘Adyuhna liata eima hnohta a vaw sie aw vei.’ khâchâ tah ei ta.

10 Chavâta na hnohta a sie hrapa na zibeipa chakaotuhpa zy chhao heta mydi ta thyu ula; mydi ta nama thyu nahta khih pavâ pata nahta sie muh vy,” tah ta.

11 Davi nata a chyhsa zy cha Philistina râh lâta kua heih awpa ta my ta pua awpa ta mydi ta thyu ei ta. Philistina mozy cha Zezrel lâta khy ei ta.