Malureina 35

¹ Zerikô dady Zawdâh kiapâh Môaba bypi liana chata ABEIPA ta Mawsi chho ta.

² Izarel pathlazy bie pie la, ama râhzy liana chata Livai sahlao pahrâna awpa khihzy taopa mawh sy; sahroh pabâsa nawpa ta khih opâhzy Livai sahlao na pie awpa a châ.

³ Khihzy cha ama pahrâna awpa châ aw ta, a opâhzy cha ama viahchao nata ama sahroh, ama pasapa zydua châta a châ aw.

⁴ Opâh Livai mo pie awpa cha khihpi kuh tawhta dy sâh kha a kawhpa ta a châ awpa a châ.

⁶ Livai mo na pie awpa khihzy cha lianyh a cheihpazy râ nawpa ta a râna khih miacharu châ aw ta, chazy leipa cha khih sypalih nata khih no na pie hra awpa a châ.

⁷ Livai mo na pie awpa khih zydua cha khih sypalih nata khih charie a châ aw, opâh chhaota na pie awpa a châ.

⁸ Izarel pathlazy topa khih na pienazie awpa cha a hluh viapa tawhta a hluh via pie aw chi ta, a chyh viapa tawhta a chyh via pie aw chi ta, chyhsa tota ama topa râh hluhnazie ta a khih cha Livai mo a pie awpa a châ,” tahpa ta.

⁹ ABEIPA ta Mawsi chho ta,

¹⁰ Izarel pathlazy chho la, ama hnohta, Zawdâh chakapa ta Kana râh namâ ngia tita cha.

¹¹ abohna khih awpa khihzy nama châta nama rao awpa a châ, lianycheih pathleituhpa a râ nawpa ta.

¹² Cha khihzy cha phuh a latuhpa tawhtapa namâ bohna a châ aw, pôhpakhypa hmiakô liata ryureipa awpa ta â dua hlâta liany a cheihtuhpa cha a thi lei nawpa ta.

¹³ Nama châta abohna awpa khih nama raopazy cha khih miacharu a châ aw.

¹⁴ Zawdâh haosâ lâ khih thôh rao aw eichi ta, Kana râh lâta khih thôh rao aw eichi ta, abohna khihzy a châ aw.

¹⁵ Izarel pathlazy nata pho hropa nata ama hnohta a pahrâpazy châta he khih charu he abohna a châ aw, cha liana chata ahyrai chyhsa a thie pathleipa maihta amâ râ aw.

¹⁶ Anodeikuacha thua hmâpa ta chyhsa a thie khiahtala lianycheihpa châ ta, lianyh a cheihpa cha thi thlyu awpa a châ.

¹⁷ Thina taihta alô ta chyhsa a chôpa ta a thie khiahtala, lianycheihpa châ ta; liany a cheihpa cha thi thlyu awpa a châ.

¹⁸ Thina taihta chyhsa tho ta tupa ta a thi khiahtala, lianycheihpa châ ta; liany a cheihpa cha thi thlyu awpa a châ.

¹⁹ Thisaih phuh a latuhpa chata liany a cheihtuhpa cha a thi pâ aw; â tyh thithaw ta a thi awpa a châ.

²⁰ Chyhsa a haopa vâta a chati tlyma, a byhkhâhpa ta a vawh tlyma, a thie tlyma.

²¹ â haona vâta a chô sao tlyma, a châ khiahtala, a thietuhpa cha thi thlyu awpa a châ; lianycheihpa a châ; thisaih phuh a latuhpa chata a thietuhpa cha â tyh thithaw ta a thie awpa a châ.

²² Anodeikuacha a haona vâta châ hlei leipa ta sôkha ta a chati tlamawpa tlyma, chatawhcha a byh cheingei leipa ta chyhsa ama y tahpa chhao pahno leipa ta.

²³ a khakhaipa chhao châ leipa ta hmo peipa hriapa a chhuah hlei leipa ta alô tlyma ta vawhpa ta chyhsa a vaw thie haw khiahtala.

²⁴ pôhpakhypa sahlao ta, he pachiana yzie hawhna heta a thietuhpa nata thisaih phuh a latuhpa cha ama pachiapa awpa a châ;

²⁵ pôhpakhypa sahlao chata liany a cheihtuhpa cha thisaih phuh a latuhpa tawhtapa cha paboh aw ei ta, pôhpakhypa sahlao chata a râna abohna khih liana chata paysa heih aw ei ta, sathaw pathaihpa ta thupa theihthaipa abei a thi hlâ lei cha cha liana chata a y awpa a châ.

²⁶ Anodeikuacha khati no rai ta lianycheihtuhpa chata a râna abohna khih râhri khôtho lâta siepa ta.

²⁷ thisaih phuh a latuhpa ta abohna khih khôtho lâ hmôpa ta, thisaih phuh a latuhpa ta a thie khiahtala thisaih liana chata thai lei châ aw vei.

²⁸ Theihthaipa abei a thi hlô leita cha abohna khih liata a y thlâh ha awpa a châpa vâta; theihthaipa abei a thi tawhta deikua cha liany a cheihtuhpa cha a yna râh lâta a di heih awpa a châ.

²⁹ He hmozy he nama pathlazy taihta nama yna maih liata nama pachianazie awpa a châ aw.

³⁰ Ahyrai ta chyhsa a thie khiahtala, lianycheihtuhpa cha pahnotuhpazy pakah tawhta bie a puapa ta thie awpa a châ; anodeikuacha pahnotuhpa pakha cha chyhsa thina awpa ta a daih vei.

³¹ Lianycheihtuhpa cha nama chatlai awpa châ vei, thina taihta thai lei a châpa châ ta; thi thlyu awpa tlao a châ.

³² Theihthaipa thi hlâta cha abohna khih lâta a râpa, a râh liata a y heih awpa ta chatlaina cha nama la awpa châ vei.

³³ Nama yna râh cha papuapaleipa aw eichi ta; thisaih chata râh cha papuapaleipa ta, thisaih palona râh papuapaleipa pathai nawpa ta a palotuhpa thisaih dei leipa ta cha hmâh theipa châ tlôh lei khâh ta.

³⁴ nama yna râh ei yna he nama papuapalei awpa châ vei, kei ABEIPA cha Izarel pathlazy hry liata y tlôh na ta, tah teh,” tahpa ta.