Ryureihtuhpazy 10

¹ Abimeleka hnôh lâna chata Izarel sahlao zy a pachha awpa ta Iskara chyhsa Dôdô sawchapawpa Puah sawchapawpa Tôla vaw pua ta; Ephrai tlâh râh Shami khih liata y ta.

² Chatawhcha kô syno nata kô thôh Izarel zy ryu reih ta. Chatawhcha thi ta, Shami khih liata pabu ei ta.

³ Cha hnôh lâna chata Kilia chyhsa Zaira vaw pua ta, kô syno nata kô no Izarel zy ryu reih ta.

⁴ Cha chyhsa chata a sawchapawpa sythôh, alâ taw sythôh chô liata a kiah tyhpa hnei ta; Kilia râh liata khih sythôh hnei ei ta, chazy cha atahmâ taihta Havô-zaira tah ei ta.

⁵ Chatawhcha Zaira cha thi ta, Kamôna khih liata pabu ei ta.

⁶ Izarel pathlazy chata ABEIPA mohmô liata hmo moleipa tao haw heih ei ta. Baal zy nata Astarô zy, Suria mo khazoh zy, Môaba mo khazoh zy, Amawna pathla khazoh zy, Philistina mo khazoh zy chakao haw ei ta; chatanachata ABEIPA cha a heisai ei ta, chakao khao leipa ei ta.

⁷ ABEIPA cha Izarel zy chô liana chata a pathi-ia ngaita ta, Philistina mozy lâta nata Amawna pathlazy lâta zuah haw ta.

⁸ Cha kô liana chata Izarel pathlazy cha ama nô papopa ta pasai pa-i ngaita ei ta. Zawdâh haosâ Kilia râh liata Amawri mo râh liata Izarel pathla zydua cha kô hrawhleicharie chhôh tlai pasaipa-i ei ta.

⁹ Chatawhcha Amawna pathlazy cha, Zudah mozy, Benzami mozy, Ephrai pathlazy a dyuh awpa ta Zawdâh haosâ chakah ei ta; chatanachata lzarel mozy cha nôpo ngaitapa ta y ei ta.

¹⁰ Izarel pathlazy chata, “Eima Khazohpa cha cha heisai haw tlai pi ta, Baal zy cha eima chakao hawpa vâta, na chô liata hmo eima parao haw,” tahpa ta ABEIPA pado ei ta.

¹¹ ABEIPA ta Izarel pathlazy hnohta, “Izi mo tawhtapa zy, Amawri mo tawhtapa zy, Amawna pathlazy tawhtapa zy, Philistina mo tawhtapa zy cha pachha veih ei na mâ?

¹² Sidaw mozy, Amale mozy, Maôni mozy chhaota cha pasaipa-i ei ta; na pado eichi ta, chatanachata âmo tawhtapa cha cha pachha ei na ta.

¹³ Châhrasala nâmo ta nâ heisai eichi ta, khazoh hropa zy tlao chakao eichi ta; chavâta cha pachha khao veih ei na.

¹⁴ Namâ tlypa khazoh zy cha pado teh u; ano chata nama nôpo tita cha pachha ei sa,” tah ta.

¹⁵ Izarel pathlazy chata ABEIPA hnohta, “Hmo eima parao haw; nâma ta a pha na tahpa hawhta eima chô liata tao la, a pachha deikua cha atanoh he ngiachhiepa ta maniah pachha mah y,” tah ei ta.

¹⁶ Chatanachata ama hry liata pho hropa khazoh zy cha pahleipadia khai ei ta, ABEIPA chakao haw ei ta; Izarel mozy nôpona vâna chata a palôhrupa pachârôh ngaita ta.

¹⁷ Chatawhcha Amawna pathlazy cha a pahmaohpakhy ei ta, Kilia râh liana chata ariena su tao ei ta; Izarel pathlazy cha a pakhy hra ei ta. Mizpah khih liata ariena su tao ei ta,

¹⁸ zawpi sahlao Kilia râh liata molaipa sahlao zy cha bie a chho ei ta, “Amawna pathlazy adyuh pathao awpa he a hy e a y? Kilia râh liata a ypa zydua chô liata hyutuhpa ta a y aw,” tah ei ta.