Zawsua 3

¹ Zawsua cha mydi ta thyu ta, Izarel pathla zydua chhaota Shiti su tawhtapa cha a pasie ei ta; Zawdâh tlô ei ta, ama chaka hlâta cha liana chata a rie ei ta.

² Noh thôh rakha tawhta hyutuhpa zy chata ariena su cha chahry ei ta.

³ ABEIPA nama Khazohpa Biehrai Byh nata theihthaipa sahlao Livai chizy ta amâ sypa nama hmô tina chata nama yna su tawhtapa he a pasie ula, zi muh vy.

⁴ anodeikuacha nâmo nata Byh likawh cha thliepa ta dy sâh no tlyma a châ awpa a châ; a hnia khah u. Chatanachata nama siena awpa lâpi cha nama pahno thei aw, cha hlâta he lâpi he a chhih beih tlôh lei khâh eichi ta,” tahpa ta zawpi zy cha bie pie ei ta.

⁵ Chatanachata Zawsua ta zawpi zy hnohta, “A pathai teh u; mylâ ABEIPA ta nama hry liata hmonoâh ngaitapa a tao aw na,” tah ta.

⁶ Zawsua ta theihthaipa zy hnohna chata, “Biehrai Byh he a sy ula, zawpi zy hmiakô liata chaka teh u,” tahpa ta reih ta. Chatanachata Biehrai Byh cha a sy ei ta, zawpi zy hmia a sah pa ei ta.

⁷ ABEIPA ta Zawsua hnohta, “Mawsi hnohta ei ypa hawhta na hnohta chhao ei y aw tahpa ama pahno thei nawpa ta atanoh he Izarel sahlao zydua mohmô liata ei cha palyupalih pathao aw.

⁸ Chatawhcha Biehrai Byh a sytuhpa theihthaipa sahlao zy cha, ‘Zawdâh chavah ngiakâh cha nama tlô tita, Zawdâh liana chata a duah thlâh ha muh vy,’ tahpa ta bie pie mah y,” tah ta.

⁹ Zawsua ta Izarel pathlazy hnohna chata, “A vy ula, ABEIPA nama Khazohpa biezy he vaw nahthlie teh u,” tah ta.

¹⁰ Chatawhcha Zawsua chata, “He liana heta Khazohpa hropa cha nama hry liata y ta, nama hmiakô liana heta Kana mozy, Hiti mozy, Hivi mozy, Periza mozy, Kirkasi mozy, Amawri mozy, Zebu mozy he a papua tlai aw tahpa nama pahno aw.

¹¹ Aleilô zydua ABEIPA Biehrai Byh châta nama hmiakô liata Zawdâh a chaka na.

¹² Chatanachata Izarel phozy hry liatahpa he pahrawhleino, pho to vyuhpa ta chyhsa pakha lymâ a tlyh muh vy.

¹³ Chatawhcha aleilô zydua ABEIPA Byh a sytuhpa theihthaipa zy pheipazah cha Zawdâh ti liata a pahnieh pata nahta, Zawdâh ti nochhi lâ tawhta ti a vaw lohpa zy cha chie pachhô aw ta, chatanachata a pahlypa ta a duah thlâh ha aw,” tah ta.

¹⁴ Chatawhcha zawpi zy cha Zawdâh chaka awpa ta ama poh-o tawhta ama pua nahta, Biehrai Byh a sytuhpa theihthaipa sahlao zy cha zawpi zy hmiakô liana chata sie ei ta,

¹⁵ Byh a sytuhpa zy cha Zawdâh tlôpa ta, Byh a sytuhpa theihthaipa zy phei chata ngiakâ ti a tly pata nahta, (sâh hria chhôh heta cha Zawdâh he a kao zydua bie thlâh ha tyh ta),

¹⁶ nochhi lâ tawhta ti a loh ngâpa cha a duah haw ta, lâhlapi liata Zaretha râh kiapâh ta Adâh khih liana chata a pahlyhpa ta a duah thlâh ha ta, Arabah tilaipi, Tilaipi Iahpa lâta a lohpa cha chie pachhô haw ta; chatanachata zawpi zy cha Zerikô khih dady ta liana chata sie haw ei ta.

¹⁷ ABEIPA Biehrai Byh a sytuhpa theihthaipa zy cha Zawdâh liah liahta alei hipa liata a duah thlâh haw ei ta, zawpi sahlao zydua nata ama chi zydua ta Zawdâh ama chaka khaina taihta.