Zawhana 9

¹ Zisu ta a sie pakhô hai nota, a pi noh tawhta mochaopa pakha hmô ta.

² A pachupazy ta a hnohta, “Rabai, mochao chiehpa ta a pihpa he ahyma moleina a tao, he chyhsa he ma, a nô nata a paw maw?” tah ei ta, hiahri ei ta.

³ Zisu ta, “He chyhsa heta moleina tao hra vei, a nô nata a paw ta moleina tao hra veih ei, Khazohpa raihria a chô liata a lâna awpa tlao a châ.

⁴ Nohchhô a châ nota nâ tuahtuhpa rai eima hria awpa a châ; zâ a châ daihmâ ha hih, cha tina chata ahyhma ta raihria thei khao aw veih ei.

⁵ Khizaw liata ei y chhôhta khizaw khaihpa ei châ,” tah ta a chhy ta.

⁶ Cha hawhta a rei khai nahta alei liata a pachih pachhao ta, pachih chata beih-lei tao ta, beih-lei cha a mo liata hnia ta,

⁷ a hnohta, “Silôam tipo liata va pasi teh,” tah ta. (Silôam cha Tuah’ tahna a châ). Chatawhcha vawh ta pasi ta, mo pavâhpa ta a vaw di ha ta.

⁸ A vaihzy nata cha hlâta a kudaopa a hmô tyhpazy ta. “He chyhsa he atyu hmahta ku a dao tyhpa kha châ vei mâ?” tah ei ta.

⁹ Mo hropa ta, “Ano kha a châ he,” tah ei ta; mo hropa ta, “Châ vei, ano a lyupa na tlao a châ,” tah ei ta. Ano chata, “Kha chyhsa kha na ei châ,” tah ta.

¹⁰ Âmo chata a hnohta, “Na mo kheihta e a vaw pavâ?” tah ei ta.

¹¹ Ano chata, “Zisu ama tahpa khata beih-lei tao ta, ei mo liata hnia ta, ‘Silôam tipo lâ vaw la, pasi teh,’ na tah ta; chatanachata vawh na ta, pasi na ta, mo pavâna ei hmô haw,” tah ta.

¹² Âmo chata a hnohta, “Ano cha khataih liata a y?” tah ei ta. ‘’Pahno va na,” tah ta.

¹³ Cha hlâta mochaopa cha Pharisaizy lâta a chhi ei ta.

¹⁴ Zisu ta beih-lei tao ta, a mo a pavâ noh kha pahânoh châ ta.

¹⁵ Chatanachata Pharisaizy ta a mo a vaw pavâ hanazie hiahri heih ei ta. Ano chata ama hnohta, “Ei mo liata beih-lei bai ta, pasi na ta, ei hmô thei haw,” tah ta.

¹⁶ Pharisai thokha ta, “Cha chyhsa cha pahânoh a ô leipa vâta Khazohpa tawhta a puapa châ aw vei,” tah ei ta. Thokha deikua chata, “Moleipa ta kheihta e he hawhta hmonoâhpa a tao thei aw?” tah ei ta. Chatawhcha a pachhaih ei ta.

¹⁷ Chatawhcha mochaopa hnohna chata, “Na mo a pavâpa kha, nâma ta kheih hawhta e ano cha na pachâ?” tah heih ei ta. Ano chata, “Hrohsopa a châ,” tah ta.

¹⁸ Châhrasala Zuzy ta a mo a pavâpa nô nata paw cha ama aw hlâ lei cha, mochaopa chata a mo a pavâ hawpa kyh cha zo leipa ei ta,

¹⁹ a nô nata a paw hnohta, “He chyhsa he nama sawchapawpa mochao chiehpa ta a pihpa nama tahpa kha a châ ma? Kheihta e atahmâ a hmô heih thei haw?” tahpa ta hiahri ei ta.

²⁰ A nô nata paw chata, “He he eima sawchapawpa a châ tahpa eima pahno, mochao chiehpa ta a pihpa chhao eima pahno;

²¹ châhrasala kheihta ma atahmâ he a hmô thei haw tahpa pahno ma pi, a mo pavâsatuhpa chhao pahno hra ma pi. Ano hiahri teh u; paw tlopa a châ mâ tâh, ano kyh cha ano ta reih la va,” tah ei ta a chhy ei ta.

²² Zuzy ama chipa vâta a nô nata a paw chata cha biezy cha ama reih, Zuzy ta cha hlâ chhaota, ahyrai ta ano cha Mesia a châ tahpa ta a chakhei khiahtala apakhyna-o patosa lei awpa a ryh tah chyu tlôh ei ta.

²³ Cha vâna chata a nô nata a paw chata, “Paw tlohpa a châ mâ tâh, ano hiahri teh u,” ama tah.

²⁴ Chatanachata mochaopa cha ei no lâta aw ei ta, a hnohta, “Khazohpa reithai teh; kha chyhsa kha la moleipa a châ tahpa eima pahno na,” tah ei ta.

²⁵ Ano chata, “Moleipa a châ ma a châ vei, pahno va na; kyh kha ei pahno, kha hlâna khata ei mo chao ta, atahmâ ei hmô thei haw,” tah ta a chhy ta.

²⁶ Âmo chata a hnohta, “Na chô liata kheihta a tao? Na mo kheihta e a pavâsa?” tah ei ta.

²⁷ Ano chata ama hnohta, “A thiapaw kha ei cha chho ha ei kha, nahthlie khoh tlôh ei chi va. Khazia nama thei khoh heih? Nâmo chhao a pachupazy châ hra awpa nama khoh ma?” tahpa ta a chhy ta.

²⁸ Âmo chata ra ei ta, “Nâma he ano pachupa châ chi ta, keimo la Mawsi pachupazy eima châ.

²⁹ Khazohpa ta Mawsi bie â chho tahpa eima pahno, he bao hra he khataih tawhta a puapa ma a châ pahno ma pi,” tah ei ta.

³⁰ Cha chyhsa chata ama hnohta, “Cha tlai cha noâh a chhihna cha a châ! Khataih lâ tawhta a puapa ma a châpa pahno leipa eichi ta, ei mo a pavâsa tlôhpa hih.

³¹ Khazohpa ta moleipa bie a nahthlie tyh leipa eima pahno, châhrasala ahyrai ta Khazohpa a chhy ta a khopa a taopa chata Khazohpa ta ano cha a nahthlie tyh.

³² Khizaw y tua no tawhta ahyhma ta mochao chiehpa ta a pihpa mo ama pavâsa heihpa thei beih veih ei.

³³ He chyhsa he Khazohpa tawhta a puapa a châ vei khiahtala, khâpahma tao thei aw vei,” tah ta a chhy ta.

³⁴ Âmo chata a hnohta, “Nâ, moleipa ta a pihpa na châ mâ tâh, nâma ta maniah na pachu baohra mâ?” tah ei ta a chhy ei ta. Chatanachata ano cha papua haw ei ta.

³⁵ Ano ama papua hawpa Zisu ta thei ta, tluapa ta hmô ta, “Khazohpa Sawchapawpa nâ ngiapâ ma?” tah ta.

³⁶ Ano chata, “Pâpuh y, ano cha ahy maw, ei ngiapâ thei nawpa ta,” tah ta a chhy ta.

³⁷ Zisu ta a hnohta, “Ano cha na hmô thlâh ha mâ tâh, bie cha chho haipa he a châ,” tah ta.

³⁸ Ano chata, “Abeipa, ei ngiapâ na,” tah ta a naoh ta.

³⁹ Zisu ta, “Pachia awpa ta he khizaw liana heta a vypa ei châ, hmô thei leipazy cha ama hmô theina awpa nata a hmô theipazy cha ama mo a vaw chaona awpa ta,” tah ta.

⁴⁰ A kiapâh ta Pharisai a ypazy chata, cha biezy cha ama thei nahta a hnohta, “Keimo chhao he mochaopa châ hra khiah pi?” tah ei ta.

⁴¹ Zisu ta ama hnohta, ‘Mochaopa nama châ khiahtala moleina hnei aw vei ei chi; châhrasala, ‘Eima hmô thei na,’ atahmâ a tah tlôh ei chi ta, chavâta nama moleina a y thlâh haw.;