Athaona 35

¹ Khazohpa ta Zakaw hnohta, “Thyu la, Bethel lâ khy la, cha liana chata y teh; na uhta Esaw tawhta nâ râ nota na hnohta aluahpa Khazohpa châta cha liana chata maisâh tao mah y,” tah ta.

² Zakaw chata a chhôhkhazy nata a hnohta a ypa zydua hnohna chata, “Nama hry liata mo hropa khazoh a ypazy cha soh ula, a pathaihpa ta nama chysia a patly teh u;

³ thyu ei suh u, Bethel lâ khy ei suh u, chatanachata ei nôpo nota nâ chhy ta, ei siena liata ei hnohta a y lymâpa Khazohpa châta maisâh ei tao,” tah ta.

⁴ Chatanachata mo hropa khazoh ama ku liata a ypa zydua nata ama nahkhao liata rahy amâ bapa zydua cha, Zakaw pie ei ta; Zakaw chata Sekhe kiapâhta aoka ry liana chata nyu ta.

⁵ Chatawhcha sie ei ta, ama chheipâh ta khihzy chata vaw chi ngaita kaw ei ta, Zakaw sawchapawpazy cha a chadai leipa ei ta.

⁶ Zakaw chata Kana râh liata Luza khih cha tlô ta, ano nata a hnohta a ypa zydua chhaota (Luza cha Bethel châ ta).

⁷ Cha liana chata maisâh tao ta, a uhta tawhta â râ nona khata cha liana chata Khazohpa a luahpa vâta a su cha El-Bethel bi ta.

⁸ Chatawhcha Rebeka ta a thyukheipa Debawrah cha thi ta, Bethel mathi liata aoka ry liana chata pabu ei ta, aoka mo cha Alaw-bakhuh* bi haw ei ta.

⁹ Zakaw cha Padanara tawhta a vy nata Khazohpa a hnohta aluah heih ta, byhnâ awpa ta.

¹⁰ Khazohpa chata a hnohta, “Na moh he Zakaw châ ta, na moh Zakaw cha tah khao aw veih ei, na moh cha Izarel tlao a châ ha aw,” tah ta. Chatanachata a moh cha Izarel bi haw ta.

¹¹ Khazohpa ta a hnohta, “Kei Khazohpa Atotaotheipa ei châ: chi hluhpi pathlapa ta vaw pôh teh; phopi nata phopi hluhpi chhao nâ tawhta vaw y aw ta, na chakhai tawhta abeizy chhao ama vaw pua hra aw.

¹² Abaraha nata Aisika râh ei piepa he, ei cha pie aw, na y vei tawhta na pathlazy chhao râh ei pie lymâ aw,” tah ta.

¹³ Chatawhcha Khazohpa ta ano a chhona su tawhna chata siesai haw ta.

¹⁴ Chatawhcha a chhona su liana chata, Zakaw ta alô tô bô ta, a chô liana chata hmohlâpa dopa leitha ta, a chô liata sathaw hry hra ta.

¹⁵ Chatawhcha Zakaw chata Khazohpa ta ano bie a chhona su moh cha Bethel bi ta.

¹⁶ Chatawhcha Bethel tawhna chata sie ei ta; Ephra khih tlô nawpa cha a hla chheih ha ta, Rakheli chata saw a zei ta, thata a zei haw ta.

¹⁷ Chatawhcha thata a zei nota nawpaytuhpa chata, “Chi khâ, sawchapawpa hropa na hnei aw hih,” tah ta.

¹⁸ Chatawhcha a thlahpa pathlie ta, (thi haw ta) a thi pathla hlâna khata a moh cha Ben-ôni bi ta, a paw deikua cha Benzami bi ta.

¹⁹ Chatanachata Rakheli cha thi ta, Ephra lâpi liana chata pabu ei ta, (Ephra cha Bethlehe a châ).

²⁰ Chatawhcha a thlâ chô liana chata Zakaw ta alô bô ta; atahmâ taihta Rakheli thlâ lôbô a châ.

²¹ Izarel cha sie lymâ ta, Edera osâhpa khô liana chata a poh-o parai ta.

²² Chatawhcha Izarel cha cha râh liana chata a y nota, Rubena chata a paw nôtho Bilha cha a ziakhei ta; Izarel chata cha cha pahno haw ta. Zakaw sawchapawpazy cha pahrawhleino châ ei ta.

²³ Liah sawchapawpazy cha: Rubenaa (Zakaw saw tuapa) zy, Sime-ôna zy, Livai zy, Zudah zy, Iskara zy, Zebulawna zy châ ei ta.

²⁴ Rakheli sawchapawpazy cha : Zawsi nata Benzami châ ei ta.

²⁵ Rakheli seichanônô Bilha sawchapawpazy cha : Dana nata Nathalai châ ei ta.

²⁶ Liah seichanônô Zilpah sawchapawpazy cha : Kada nata Asera châ ei ta. Chhâzy cha Zakaw sawchapawpa Padanara liata a sapazy kha ama châ.

²⁷ Chatawhcha Zakaw chata Abaraha nata Aisika yna Mamre tlyma, Kiriathaba liata a paw Aisika hnohna chata tlô ta, (cha cha Bebraw a châ).

²⁸ Aisika hro chhôh cha, kô za kha nata kô sychaki châ ta.

²⁹ Chatawhcha Aisika chata a thlahpa pathlie ta; chhâ a palopa ta thi ta; a chiheihzy hnohta pahlyhpa ta y haw ta; chatawhcha a awchapawpa Esaw nata Zakaw chata pabu haw ei ta.