Athaona 27

¹ Chatawhcha Aisika cha machâ ta, hmô thei khao leina taihta a mo a zoh tawhna chata a awchapaw uhtheipa Esaw cha aw ta, a hnohta, “Ei sawchapawpa y,” tah ta! Ano chata a hnohta, “He liata ei y,” tah ta.

² Ano chata, “Pachâ teh, machâ haw na ta; ei thina noh awpa pahno tlôh lei khâh na ta.

³ A tahmâ he ngiachhiepa ta na chaihrai na lava la, na libaw kha la la, râh a khie la, akhi na kapa la,

⁴ chatawhcha ei thi hlâta byhnâ ei cha awpa theina awpa ta, ei khopa ta âhmie pahâh ngaitapa na taopa la, nie awpa ta ei hnohta vaw cheih mah y,” tah ta.

⁵ Chatawhcha Aisika ta a sawchapawp Esaw hnohta a rei nona cha, Rebeka chata thei ta. Chatawhcha Esaw cha sakhi ka ta vaw phaoh awpa ta lyurâhpa lâta â khie no ta,

⁶ Rebeka chata a sawchapawpa Zakaw hnohta, “Pachâ teh, na paw chata na uhta Esaw hnohta, ‘Sakhi na vaw phaopa la, âhmie a pahâhpa ta na taopa teh, nie aw na ta ei thi hlâta ABEIPA hmiakô liata byhnâ ei cha awpa na hâh ta,’ a tahpa ei thei.

⁸ Chatanachata ei sawchapawpa y, atahmâ he bie ei cha piepa hawhta ei bie a ngiah teh.

⁹ Sahroh zaw hry liata vawh la, cha liatahpa cha mie taw pô no, a pha ngaitapa, na kei lapa teh, cha cha a khopata ta na paw châta âhmie a pahâh ngaitapa ei taopa aw na;

¹⁰ a thi hlâta byhnâ a cha awpa na hâh ta, a nie awpa ta na paw lâta na vaw khei awpa a châ,” tahpa ta reih ta.

¹¹ Zakaw chata a nô Rebeka hnohta, “Ei uhta Esaw cha chyhsa hmi rôh kawpa châ ta, kei cha chyhsa mihpa châ tlôh na ta.

¹² Ei pâ chata na vaw hria thlâh ha sala, ano pachâta a dôtuhpa hawhta châ aw na ta, byhnâ cha rei leipa ta chhie a pasasapa tlao ei châ aw mâ tâh,” tah ta.

¹³ Anô chata a hnohta, “Ei sawchapawpa y, chhiesana na to awpa cha, ei chô liata y mawh sy; ei bie angiah la, na kei lapa thlâh ha teh,” tah ta.

¹⁴ Chatawhcha vawh ta, kei la ta, a nô lâta a vykhei ta; a nô chata a paw khopata hawhta âhmie pahâhpa ta tao ta.

¹⁵ Rebeka chata a sawchapaw uhtheipa Esaw chysia phapa, o liata a hnohta a ypa cha la ta, a sawchapaw seihnaipa Zakaw cha paky ta;

¹⁶ mie taw vozy chhao cha, a ku liata nata a rao mihpa liana chata bai hra ta;

¹⁷ âhmie pahâh ngaitapa nata viahchhâ a taopazy cha, a sawchapawpa Zakaw ku liata pie ta.

¹⁸ Chatawhcha ano cha a paw lâta vawh ta, “Ei pâ,” tah ta; chatawhcha ano chata, “He liata ei y; ei sawchapawpa y, ahy na châ?” tah ta.

¹⁹ Zakaw chata a paw hnohta, “Na sawchapaw uhtheipa Esaw ei châ, eina tuapa hawhna chi khata tao khai na ta; ngiachhiepa ta a tyuh la, ei sakhi sa he nie teh, byhnâ eina awpa na hâh chi ta,” tah ta.

²⁰ Aisika chata a sawchapawpa hnohta, “Kheihtazie ta e, na vaw hmô hmâ kaw dia,” tah ta. Ano chata, “ABEIPA na Khazohpa chata hlao eina patlohsapa vâta a châ,” tah ta.

²¹ Aisika chata Zakaw hnohta, “Ei sawchapawpa y, ngiachhiepa ta a vaw hnia tua, ei cha vaw hria tua aw, ei sawchapawpa Esaw na châ tlai ma, châ vei ma,” tah ta.

²² Zakaw chata a paw Aisika cha a kei hnia ta, chatawhcha ano chata vaw hria ta, “A ao cha Zakaw ao châ tlôh ta, a kuzy deikua cha, Esaw ku châ tlôh,” tah ta.

²³ Chatanachata a uhta Esaw ku hawhta a ku hmi rôhpa vâta ano cha pahno leipa; chatanachata byhnâ awpa haw ta.

²⁴ Ano chata, “Ei sawchapawpa Esaw tlai na châ ma?” tah ta.

²⁵ Chatawhcha ano chata, “Nâ vaw pahnia teh, ei sawchapawpa sakhi a cha nie aw na ta, byhnâ ei cha awpa na hâh ta,” tah ta. Chatawhcha a kei pahnia ta, nie ha ta; kresawti chhao la ta, doh hra ta.

²⁶ Chatawhcha a paw Aisika chata a hnohta, “Ei sawchapawpa y, na vaw hnia la, na sy teh,” tah ta.

²⁷ Chatawhcha a kei hnia ta, sy ta, ano chata a chysia roh thei ta, byhnâ awpa ta, “Pachâ teh, ei sawchapawpa roh he, ABEIPA byhnâ a piepa râh roh hawhta a châ.

²⁸ Khazohpa ta avâ diati nata alei phana nata sâh hluhpi nata kresawti hluhpi cha pie mawh sy.

²⁹ Zawpi ta cha chakao ei sala, phopizy ta châ naoh ei se. na uhnawhpazy chô liata abei ta y la, na nô sawzy ta châ naoh ei se. Chhie châ satuhpa maih cha, chhiesapa Pata y sala, byhnâ cha awpa tuhpa maih cha byhnâ awpa ta y se!” tah ta.

³⁰ Chatawhcha Aisika ta Zakaw byhnâ a awpa khai patanahta, Zakaw cha a paw Aisika tawhta a pua dyupa ta a uhta Esaw, râh a khiepa cha vaw tlô ta.

³¹ Ano chhao chata âhmie pahâh ngaitapa tao ta, a paw lâta vaw cheih hra ta. Chatawhcha a paw hnohna chata, “Ei pâ, thyu la, na sawchapawpa sakhi sa he nie teh, byhnâ eina aw pa na hâh chi ta,” tah ta.

³² A paw Aisika chata a hnohta, “Ahy e na châ?” tah ta. Ano chata, “Na sawchapawpa, na sawchapaw uhtheipa Eaw ei châ,” tah ta.

³³ Aisika cha thata a chalyu ta, “Sakhi kapa ta ei hnohta a sa vaw cheih ta, nie khai ha na ta, na vaw tlô hlâta byhnâ ei aw hapa kha, ahyma a châ tly? chatly ano cha byhnâ a topa tlai a châ aw,” tah ta.

³⁴ Esaw chata a paw bie reipa cha a thei nata palôh chhie ngaitapa ta thata cha ta, a paw hnohta, “Hy ei pâ y, kei he, kei chhao he, byhnâ na awpa hra teh!” tah ta.

³⁵ Chatawhcha ano chata, “Na nawhta chata piepie ngaitapa ta a vy ta, na byhnâ cha a chalapa haw,” tah ta.

³⁶ Esaw chata, “A moh Zakaw ama bipa he â do kaw vei mâ? Ei no dua eina pho haw hih, ei saw tuapa châna cha na lapa ta, atahmâ he ei byhnâ eina lapa haw heih hih,” tah ta. Chatawhcha ano lilaw ta, “Byhnâ na pahlôhpa va chi mâ?” tah ta.

³⁷ Aisika chata Esaw hnohta, “Ano cha na beipa ta tao na ta, a uhnawhpa zydua chhao a sei châta pie khai na ta, sa nata kresawti ta pasa hra na ta. Ei sawchapawpa y, na châta khâpa e ei cha taopa aw tly?” tah ta.

³⁸ Esaw chata a paw hnohta, “Ei pâ y, byhnâ miakha deita ma na hnei? Hy ei pâ y, kei he, kei chhao he byhnâ na awpa hra teh,” tah ta. Esaw cha, ao paro ngaitapa ta cha ta.

³⁹ Chatawhcha a paw Aisika chata a chhy ta, a hnohta, “Pachâ teh, na pahrâna awpa cha alei phana â hlapa nata chô lâ tawhta avâ diati a hlapa liata a châ aw.

⁴⁰ Na zaozi ta hroh aw chi ta, na nawhta na chakao aw; chatawhcha na pua tina chata a raopakypa cha na rao tawhta na pahluh aw,” tah ta.

⁴¹ Chatawhcha a paw ta byhnâ a awpa vâna chata, Esaw chata Zakaw a hao ta, Esaw chata anosasy ta, “Ei pâ mâchhiesana awpa nohzy cha a hnia haw ta; chatinachata ei nawhta Zakaw cha ei thie aw,” tah ta.

⁴² A sawchapawpa uhtheipa Esaw bie cha Rebeka chho ei ta, chatanachata chyhsa tuah ta, a sawchapaw seihnaipa Zakaw cha aw ta, a hnohta, “Na uhta Esaw chata, thie a châ chhuahna kyh liata, anosasy ta a palôh a patlâh.

⁴³ Chatanachata ei sawchapawpa y, ei bie he a ngiah teh, thyu la, Harana liata ei rilâhpa Laba lâta a râ la,

⁴⁴ na uhta hiehâhna he a pai hlâ lei cha, a hnohta noh khazie tlyma kei y chy la;

⁴⁵ na chô liata na uhta hiehâhna paipa ta, a chô liata na hmo taopa he a my hlâ lei cha; chatawhcha paipa ta a my tina chata, chyhsa tuah aw na ta, cha tawhtahpa cha ei cha vaw padysa aw. Khazia e, nama pano ta, noh noh kha ta ei châ chhaih aw ei?” tah ta.

⁴⁶ Chatawhcha Rebeka chata Aisika hnohta, “Hiti chanôzy vâna heta, hro he, eina ai kaw. Zakaw heta, he râh laihsa Hiti chanôzy hry liatahpa he, lahpinô ta a hnei chhochhi khiahtala ei châta hro he khâpa a phahnai aw?” tah ta.