1 Thatihzy Rona 27

Studio

   

1 Izarel mo ama hluh rakha tawhta cha chhôhkha pawhrâhpa zy pheisaih sâh kha hyutuhpa zy, za kha hyutuhpa zy nata abei chakaotuhpa zydua kô kha chhôhta thla chareih a thla lymâpa py to liatahpa cha thy no nata sâh palih ama châ.

2 Py khana thla khana liata hyutuhpa cha Zabediel sawchapawpa Zasôbia châ ta; a py liana chata thy no nata sâh palih ama y.

3 Ano chata Pereza pathla liatahpa, thla khana liata pheisaih hyutuhpa zydua hyutuh chaipa a châ.

4 Chatawhcha thla nona liata py hyutuhpa cha Ahôah chyhsa Dôdai châ ta; a py liana chata thy no nata sâh palih ama y.

5 Thla thôhna liata pheisaih sahlaozy hyutuh chaipa pathôhna cha theihthaipa Zehôiada sawchapawpa Benaia châ ta; a py liana chata thy no nata sâh palih ama y.

6 He Benaia he sythôh zy hry liata chyhsa riahphapa, sythôh zy chô liatahpa cha a châ; a py liana chata a sawchapawpa Amizaba a hlao.

7 Thla palihna liata pheisaih hyutuhpa papalihna cha Zôaba unawhpa Asahel châ ta, a sawchapawpa Zebadia ta ano vyuhpa ta a y; a py liana chata thy no nata sâh palih ama y.

8 Thla pangawhna liata pheisaih hyutuhpa papangawhna cha Izra chyhsa Shamhu châ ta; a py liana chata thy no nata sâh pali ama y.

9 Thla charuna liata pheisai hyutuhpa pacharuna cha Tekôa chyhsa Ikesa sawchapawpa Ira châ ta, a py liana chata thy no nata sâh palih ama y.

10 Thla sarina liata pheisaih hyutuhpa pasarina cha Ephrai pathla Pelô chyhsa Heleza chata; a py liana chata thy no nata sâh palih ama y.

11 Thla chariena liata pheisaih hyutuhpa pachariena cha Zerah pathla Husa chyhsa Sibedai châ ta; a py liana chata thy no nata sâh palih ama y.

12 Thla chakina liata pheisaih hyutuhpa pachakina cha Benzami pathla Anathô chyhsa Abiza châ ta, a py liana chata thy no nata sâh palih ama y.

13 Thla hrawhna liata pheisaih hyutuhpa pahrawhna cha Zerah pathla Netôpha chyhsa Maharai châ ta; a py liana chata thy no nata sâh palih ama y.

14 Thla hrawhleikhana liata pheisaih hyutuhpa pahrawhleikhana cha Ephrai pathla Piratho chyhsa Benaia châ ta; a py liana chata thy no nata sâh palih ama y.

15 Thla hrawhleinona liata pheisaih hyutuhpa pahrawhleinona cha Ôthaniel pathla Netôpha chyhsa Heladai châ ta; a py liana cha ta thy no nata sâh palih ama y.

16 Cha leipa chhao cha Izarel pho sahlao chô liata Rubena mozy hry liana chata Zikri sawchapawpa Elieza ryureituhpa châ ta, Simeôna mo hry liata Maaka sawchapawpa Shephatiah;

17 Livai mo Kemiel sawchapawpa Hasabiah; Arawna hry liata Zadôka;

18 Zudah mo hry liata Davi unawhzy hry liatahpa Elihu; Iskara mo hry liata Mikhael sawchapawpa Ômri,

19 Zebulawna mo hry liata Ôbadia sawchapawpa Ismaiah; Nathalai mo hry liata Azriel sawchapawpa Zeremô;

20 Ephrai pathlazy hry liata Azaziah sawchapawpa Zôel;

21 Kilia râh liata Manase pho khophie zy hry liata Zekariah sawchapawpa Idô; Benzami mo hry liata Abne sawchapawpa Zasiel;

22 Dana mo hry liata Zerôha sawchapawpa Azarel. Chazy cha Izarel pho hyutuhpa zy ama châ.

23 Davi chata kô syno tawhta a ry lâ cha rei leipa ta, Izarel mozy cha avâ liata awhsi hluhzie hawhna khita a papôh aw tahpa ABEIPA ta a vaw rei hawpa vâta.

24 Zeruia sawchapawpa Zôaba chata reih pathao ta, châhrasala rei khai leipa ta; Izarel zy chô liata chhao hiehâhna vaw tlô haw ta, Abei Davi a bei no tahpa thâtih rona châbu liata a hluhna zie ropa châ hra vei.

25 Chatawhcha abei sôh a mokhâhtuhpa cha Adiel sawchapawpa Azamave châ ta, lyu liata zy, khihpi liata zy khichhai liata zy, o sâhpa zy liata sôh mokhâhtuhpa cha Uziah sawchapawpa Zawnatha châ ta,

26 lyu liata leipalie raihriatuhpa sahlao mokhâhtuhpa cha Khelu sawchapawpa Ezari châ ta;

27 kresadô mokhâhtuhpa cha Rama chyhsa Shimei châ ta; kresadô liata kre saopa sopakhyna mokhâhtuhpa cha Siphami chyhsa Zabidi châ ta.

28 Bypi kao liata ôli tho nata theiku kô zy mokhâhtuhpa cha Keda chyhsa Baalhana châ ta; sathaw sopakhyna mokhâhtuhpa cha Zôasa châ ta.

29 Saraw liata a tlaihpa sahroh zaw mokhâhtuhpa cha Saraw chyhsa Sitrai châ ta; saikao liata sahroh zaw mokhâhtuhpa cha Adlai sawchapawpa Shaphata châ ta.

30 Râraoseihpa mokhâhtuhpa cha Ishmael chyhsa Ôbi châ ta; alâ mokhâhtuhpa cha Merônô chyhsa Zehadeia châ ta. "31 Mietahkupa zaw a mokhâhtuhpa cha Hakri chyhsa Zazi châ ta. Cha zydua cha Abei Davi sôh mokhâhtuhpa zy ama châ."

32 Davi puhpa chyhsa sopa cha thai ngaitapa Zawnatha cha a ryhna a raotuhpa châ ta; Hakamôni sawchapawpa Zehiel cha abei sawchapawpa zy pachutuhpa châ ta.

33 Ahithôphel cha abei aryhna a raokheituhpa châ ta, Arki chyhsa Husai cha abei viasa châ ta.

34 Ahithôphel a pazipa chata Benaia sawchapawpa Zehôiada nata Abiatha châ ei ta. Chatawhcha abei pheisaih sahlao hyutuhpa cha Zôaba a châ.