5064. In praemissis ad caput praecedens n. 4954-4959 explicatum est quid in sensu interno significatur per ‘esurienti dare edere, sitientem potare, peregrinum colligere, nudum amicire, aegrotum ac in carcere visitare’, quod nempe sit essentia charitatis quae involvitur ac ita describitur; per ‘esurientem, sitientem et peregrinum’ affectio boni et veri, et per ‘nudum, aegrotum et in carcere’ agnitio sui, videatur n. 4956, 4958.
Arcana Coelestia #4066
4066. ‘Et vidit Jacob facies Labanis’: quod significet status mutationem apud bonum illud cum recederet bonum per ‘Jacob’ intellectum, constat ex repraesentatione ‘Jacobi’ quod sit bonum Naturalis, et a repraesentatione ‘Labanis’ quod sit bonum medium, de quibus saepius prius; et a significatione ‘facierum’ quod sint interiora, de qua n. 358, 1999, 2434, 3527, 3573, hic mutationes interiorum, seu quod idem, mutationes status; dicitur enim, vidit facies ejus, et ecce nullatenus is cum eo sicut heri nudius tertius. ' Causa quod interiora per ‘facies’ in Verbo significentur, est quia interiora elucent ex facie, et se sistunt in facie sicut in speculo aut in imagine, inde ‘facies’ seu vultus significant status cogitationum et status affectionum.