Theihthaina 20

¹ ABEIPA ta Mawsi chho ta.

² Izarel pathlazy hnohta, ahyrai Izarel pathlazy hry liatahpa tlyma, Izarel liata a ypa râh hropa chyhsa tlyma, ama saw Môleka lâta a piepa maih cha, thie thlyu awpa châ ta; he râh liata chyhsazy heta alô ta ama vawh awpa a châ.

³ Kei chhaota ei su pathaihpa papuapalei awpa nata ei moh pathaihpa papuapalei nawpata a saw Môleka lâta a piepa vâta, cha chyhsa chô liana chata a heihnao aw na ta, a chiheihzy hry tawhta ei pahlei padia aw.

⁴ Chatawhcha he râh liata chyhsazy heta a saw Môleka lâta a piepa pahnolei pachâpata ama thie vei khiahtala,

⁵ ano nata a chhôhkhazy chô liana chata a heihnao aw na ta, Môleka liata aphei awpa ta nâ pheisaituhpazy chhaota ama chiheihzy hry tawhtapa ei pahleipadia aw.

⁶ Amo liata aphei awpata lyurâhripa pachao thaipa a peihpazy nata dyuthaipazy a pangaituhpa chô liana chata a heihnao aw na ta, a chiheihzy hry tawhtapa ei pahleipadia aw.

⁷ Chavâta a pathai ula, pathaihpa ta y teh u: Kei he ABEIPA nama Khazohpa cha châ tlôh na ta.

⁸ Ei biepiepazy cha a pyhpa ta nama zyh awpa a châ: Kei he ABEIPA châ pathaituhpa ei ei châ.

⁹ A nô tlyma, a paw tlyma, chhie a sapa maih cha thie thlyu awpa a châ, a nô tlyma, a paw tlyma chhie a sa papa cha ta, a chô liata a thisaih cha a y awpa a châ.

¹⁰ Chyhsa lahpinô liata apheipa, a vaih lahpinô liata apheipa cha, apheipa nata apheinô cha thie thlyu awpa a châ.

¹¹ Pawzy lahpinô a ziakheipa cha, a paw no a pazasapa châ ta, thie rairieh thlyu awpa châ ei ta; ama thisaih ama chô liata a y awpa a châ.

¹² Chyhsa ta a myuhnô â ziakhei khiahtala, thie rairieh thlyu awpa ama châ aw; moleina chôtluachona a taopa châ ei ta, ama thisaih ama chô liata a y awpa a châ.

¹³ Chyhsa ta chanô a ziakheipa hawhta chapaw a ziakheipa khiahtala, hmo pasichhih ngaitapa a tao rairiehpa châ ei ta; thie thlyu awpa ama châ, ama thisaih cha ama chô liata a y awpa a châ.

¹⁴ Chyhsa ta chanô nata a sawchanô lahpinô ta a hnei khiahtala, molei ngaitana châ ta; nama hry liata moleina a y lei nawpata ano nata âmo pano chhao mei ta rao sao awpa a châ.

¹⁵ Chyhsa ta sahroh â ziakhei khiahtala thie thlyu awpa châ ta; sahroh chhao cha nama thie awpa a châ.

¹⁶ Chanô ta sahroh â pahneisa khiahtala, chanô cha na thie awpa a châ, sahroh chhao cha thie thlyu awpa châ ei ta; ama thisaih cha ama chô liata a y awpa a châ.

¹⁷ Chyhsa ta a sietanô tlyma, a paw sawchanônô tlyma, a nô sawchanônô tlyma hneipa ta, a thluahruana hmôpata, ano chhaota a thluahruana a hmô khiahtala nozachhih ngaitapa châ ta, ama chiheihzy, pathla sahlao mohmô liata pahleipadia awpa ama châ; a sietanô no apazasapa cha ta, a hmo paraona maoh a phaoh aw.

¹⁸ Chyhsa ta chanô a thaitly vei nota a ziakheipa ta a hnei khiahtala, a thi lona a hlaipa châ ta, ano chhao a thi lona ahlaipa châ ta; chatanachata ama chiheihzy hry tawhtapa pahleipadia rairieh awpa ama châ.

¹⁹ Na nô narônô tlyma, na paw sietanô tlyma, na hnei awpa châ vei, a heinawh a hniapa nozapata taopa châ ta; ama hmo paraona maoh ama phaoh aw.

²⁰ Chyhsa ta a paw unawhpa lahpinô â ziakhei khiahtala, a paw unawhpa no pazasapa châ ta, ama moleina maophaoh aw ei ta; saw leipa ta ama thi aw.

²¹ Chyhsa ta a unawhpa lahpinô a hnei khiahtala, hmo pathaih leipa a châ; unawhpa no a pazasapa châ ta, saw leipa ta ama thi aw.

²² Chavâta ei bie piepa zydua, ei bie pachiapa zydua a pyh aw eichi ta, nama zyh awpa a châ; chatanachata pahrâ awpa ta ei cha chhithana râh chata cha pali aw veih ei.

²³ Nama hmialâta ei to hawpa pho ryhpazy cha namâ chhi awpa châ vei; he hmo zydua he tao tyh ei ta, cha vâna chata ei pasi ei.

²⁴ Anodeikuacha nâmo hnohna chata, ‘Ama râh, sâhpiti nata kheihti lona râh cha, pahrâ aw eichi ta, nama pahrâ awpata ei cha pie aw ei’. Kei he ABEIPA nama Khazohpa, pho hropazy tawhtapa cha pananotuhpa ei ei châ.

²⁵ Chavâta sa pathaihpa nata pathaih leipa, pavaw pathaihpa nata pathaih leipa panano aw eichi ta; sa tlyma, pavaw tlyma, alei liata alyhpa chi rai tlyma nama châta pathaih leipata ei pananopazy chata nama hrona pasichhihpa ta nama tao awpa châ vei.

²⁶ Ei châta chyhsa pathaihpa nama châ awpa a châ: Kei ABEIPA cha pathaih tlôh na ta, kei eih nama châ nawpata, pho hropazy tawhtapa ei cha panano haw ei.

²⁷ Chapaw rai, chanô rai lyurâhripa pachao thaipa tlyma, apeihpa tlyma, dyuthaipa tlyma cha thie thlyu awpa a châ, alô ta ama vawh awpa a châ, ama thisaih cha ama chô liata a y awpa a châ, tah heih teh,” tahpa ta.