Ryureihtuhpazy 14

पढाई करना

   

1 Sasawna cha Timna khih lâta zu ta, cha liana chata Philistina mo sawchanônô zy hry liatahpa chanô pakha hmô ta.

2 A khy heih nahta a nô nata a paw chho ta, “Timna khih liata Philistina mo sawchanônô zy hry liatahpa chanô pakha hmô na ta; ei lahpinô châta na hiapa teh u,” tah ta.

3 A nô nata a paw chata a hnohta, “Na unawhpa zy sawchanônô zy hry liata tlyma, eima chi zydua liana heta tlyma, chanô y thlâh ha veih ei tlyma, Philistina mo chopawtai leipa zy hry liata lahpinô awpa na za tlua thlâh ha tly?” tah ei ta. Châhrasala Sasawna chata a paw hnohta, “Na hiapa thlâh ha teh, ei khoh kaw na,” tah ta.

4 A nô nata a paw chata, cha cha ABEIPA raopa a châ tahpa pahno leipa ei ta; Philistina mo chô liata rypaohna a tluapa châ tlôh ta. Cha nona chata Philistina mozy cha Izarel mozy chô liata ryu reih ei ta.

5 Sasawna cha a nô nata a paw chhaota Timna khih lâna chata zu ei ta. Timna khih liata kresahdô zy za tlô ei ta. chakeibarôhneipa dawpa a vaw rôhpa thei ta.

6 ABEIPA Thlahpa cha a chô liata thata vaw tlô ta, mie taw hriechheipa hawh tlaita hriechhei haw ta; khâpahmah a chaba tlôh leipa ta. Châhrasala a hmotaopa cha a nô nata a paw chho vei.

7 Chatawhcha zu ta, chanô cha charei ta; Sasawna chata khoh kaw ta.

8 A noh hro via ta hnei a chhuahpa ta sie heih ta; chakeibarôhneipa thi ruapa cha mo a chhuahpa ta tlei ta, chakeibarôhneipa pôhpa liana chata akheih thata vaw y ta, a tipa chhao y ta.

9 Cha cha a ku ta la ta, sie hei ta, a sie pâ ta nie lymâ ta; a nô nata paw kô a kei tlô nahta, pie hra ta, âmo chhao chata nie ei ta. Anodeikuacha kheihti cha chakeibarohneipa pôhpa liatahpa a lapa a châ tahpa khâpahmah chho leipa ta.

10 A paw cha chanô lâna chata zu ta, cha liana chata Sasawna ta kyhchhi tao ta; cha cha satliapa zy taona zie châ ta.

11 Ano cha zawpi ta ama hmô pata nahta, a hnohta y hra awpa ta viasa sythôh a chhi ei ta.

12 Sasawna chata ama hnohta, “Atahmâ he bie khiapa ei cha hiahri tua aw ei; kyhchhi noh noh sari chhôhta na chho theipa ta nama pahno thei khiahtala lini chysia sythôh nata patlyna chysia sythôh ei cha pie aw ei;

13 anodeikuacha eina chho thei vei eichi khiahtala lini chysia sythôh nata patlyna chysia sythôh eina pie awpa eichi a châ,” tah ta. Chatawhcha âmo chata a hnohta, “Na bie khiapa cha vaw reih tua teh, eima nahthlie aw na,” tah ei ta.

14 Chatawhcha ano chata ama hnohta,Nietuhpa tawhta niepa vaw pua ta:Thatlôpa tawhta a thlôh ngaitapa a vaw pua,”tahpa hi tah ta. Noh thôh chhôh ta cha bie khiapa cha chhopasia thei leipa ei ta.

15 A noh sari noh liana chata Sasawna lahpinô hnohta, “Na vahpa he he bie khiapa maniah chhopasia awpa ta reipasao teh, chata leipa ta la nâma nata na paw chhôhkha zy he mei ta eima rao aw. Maniah pahryu awpa ta ma maniah na hruapa châ vei mâ?” tah ei ta.

16 Sasawna lahpinô cha a hmiakô liata cha ta, “Kyh na pachâ leipa chi ta, tlao einâ hao chi he; ei chiheih sahlao bie khiapa hiahri chi ta, keima lâ na chhopasia tlôh hra leipa chi ta,” tah ta. Ano chata a hnohta, “Ei nâ nata ei pâ chho leipa na ta, nama ei cha chho aw mâ?” tah ta.

17 Ama kyhchhi noh sari chhôh zydua chata, a hmiakô liata cha ngâthlâh ta; a noh sari noh chata thata â hawpa vâta chho ha ta, ano chata a bie khiapa cha a chizy sahlao chho ha hra ta.

18 Chatawhcha a noh sari noh noh a tla hlâta cha khih liata chyhsa zy chata a hnohta, “Kheihti hlâta a thlôh viapa khâpa e a châ? Chakeibarôhneipa hlâta thatlô viapa khâpa e a châ?”tah ei ta. Chatawhcha ano chata ama hnohta, “Ei viahchao zeinô heta alei nama palie leipa khiahtala, ei bie khiapa he pahno chei ta vei eichi,”tah ta.

19 Chatawcha ABEIPA Thlahpa cha a chô liata thata vaw tlô ta, Askelaw khih lâta zu ta, chyhsa sythôh thie ta, âmo hrao ta, a patlyna chysiazy cha bie khiapa chhopasiatuhpa zy cha pie ta, a pathi-ia ngaitata a paw o lâta khy haw ta.

20 Châhrasala Sasawna lahpinô cha viasa châta a hmâpa a viasapa kha vaw pie ha ei ta.

Scroll to see more.