Athaona 43

¹ Cha râh liata chakâhna cha thata châ tlôh ta.

² Izi râh tawhta ama phaohpa kha ama nie khai nahta ama paw chata ama hnohta, “Sie heih ula, sâh a chyhta eima châta za chalei heih teh u,” tah ta.

³ Chatanachata Zudah chata a hnohta, “Cha chyhsa chata, ‘Nama nawhta nama hnohta â hlao leipa khiahtala ei hmia hmô aw veih ei chi; tahpa ta khâchâ maniah taih ta.

⁴ Eima nawhta he na tuah khiahtala sâh eima za chaleipa aw.

⁵ Na tuah leipa khiahta deikua cha, zu aw ma pi, cha chyhsa ta eima hnohta, ‘Nama nawhta nama hnohta a hlao leipa khiahtala ei hmia hmô aw veih ei chi,’ tah tlôh ta,” tahpa ta reih ta.

⁶ Izarel chata, “Khâpavâta e, nawhta hropa nama hneipa kyhzy taih nama chho, ei châta hmo pha lei ngaitapa nama tao tly?” tah ta.

⁷ Âmo chata, ‘Nama paw cha a hroh ma? Uhnawhpa hropa nama hnei ma?’ tahpa ta eima thâtih nata eima heihnawhzy thâtih maniah hiahri tlôh ta. Cha a bie maniah hiahripazy lymâ hawhta eima chho, ‘Nama nawhta a zâ chhi heih teh u,’ a tah aw tahpa, ahye a pahno aw pi,” tah ei ta.

⁸ Zudah chata a paw Izarel hnohta, “Ei nawhta cha ei hnohta pasiesa teh, chatanachata thyu aw pi ta, eima sie aw, keimo nata nâ nata eima sawtazy chhao he thi leipa ta eima hroh thei nawpa ta.

⁹ Ano kyh liana heta keima ta ei tôh lymâ aw; keima liata tlai na pahnie mah y. Ano cha na hnohta a vaw chhi heih leipa ta, na hmiakô liata ei paduasa heih leipa khiahtala, a maoh cha chhâzaw ta ei phaoh aw na.

¹⁰ Bohpi eima y leipa khiahta cha atahmâ a ei nona chhao eima vaw tlô ha bâ awpa a châ,” tah ta.

¹¹ Chatawhcha ama paw Izarel chata ama hnohta, “Cha hawhta a châ tlôh khiahtala, he tana heta tao teh u, nama sykhaozy liana khata, he râh liata hmo phapa thokha, tho chathli thohnazy, kheitizy, khâpaleipa rohpahâhpazy, theilâpazy, kuasâhzy, ba sai ta, cha chyhsa châna chata lymâ ta cheipa teh u.

¹² Tâkâ a lie no ta phaoh ula; nama sykhao paka liata tâkâ a cha pakuapa chhao kha phaoh heih teh u; a tao pathleipa zy châ ngyu lah.

¹³ Nama nawhta chhao a chhi ula, thyu ula, cha chyhsa lâna chata sie heih teh u,

¹⁴ nama unawhpa pakha nata Benzami he a cha pathliepa na awpah ei ta, Khazohpa Ataotaotheipa chata, cha chyhsa cha cha pangiachhiesa ei se. Chatawhcha ei sawzy cha pahleipa a châ khiahta tlâ pahlei lavâh na,” tah ta.

¹⁵ Chatanachata âmo chata lymâ phaoh ei ta, tâkâ lie nota phaoh hra ei ta, Benzami chhao a chhi ei ta; thyu ei ta, Izi râh lâta zu ei ta, Zawsi hmiakô liana chata a duah haw heih ei ta.

¹⁶ Chatawhcha Zawsi ta Benzami ama hnohta a ypa cha a hmô pata nahta a o mokhâhtuhpa hnohna chata, “Hao chyhsazy hao o chhôh lâ a chhi la, sa thie la, a chhuahnoh teh; hao chyhsazy hao ta nohchhô ta ei hnohta pati ama nie aw,” tah ta.

¹⁷ Ano chata Zawsi bie piepa hawhta tao ta, Zawsi o lâna chata a chhi ta.

¹⁸ Chatawhcha Zawsi o lâta a chhipa ta ama ypa vâta chi ei ta, “Eima sie tua nota eima sykhao liata tâkâ maniah a pakuapazy vâta maniah â chhi hih, eima chô liata ryhpaohna tluapa ta maniah teipa ta, keimo nata eima alâzy chhao heta, sei châta patu maniah â chhuah hih,” tah ei ta.

¹⁹ Chatawhcha Zawsi o mohkhâhtuhpa kiahpâh lâna chata vawh ei ta, chhikao thaby liana chata bie a chho ei ta,

²⁰ “Pâpuh y, eimâ vy tua nona khata sâh chalei awpa ta a zupa châ pi ta,

²¹ chatawhcha riebu eima tlô nata eima sykhaozy cha pahy pi ta, eima sykhao paka liata eima tâkâ vaw y chyu ta, eima tâkâ cha a khopathliana ualuata ta vaw y ta; chatanachata eima vaw phaoh heih,

²² sâh chaleina awpa ta tâkâ hropa chhao vaw phaoh pi ta. Eima tâkâ cha ahyma eima sykhao liata a soh pahno tlôh pi va,” tah ei ta.

²³ Ano chata, “Thlahlôh ngaitapa ta y ula, chi khah u; nama Khazohpa, nama paw Khazohpa chata nama sykhaozy liana chata ryu a cha pie ei chu; nama tâkâ kha hmô na ta,” tah ta. Chatawhcha Simeôna cha, ama hnohta vaw papuapa haw ta.

²⁴ Chatawhcha âmo cha Zawsi o chhôh lâ a chhi ei ta, ti pie ei ta, ama phei a si ei ta, ama alâzy chhao cha niepa pie hra ei ta,

²⁵ ama lymâ phaopa cha Zawsi nohchhô ta a vy hlâta a vaw chhuahdy chhielie ei ta, cha liana chata pati ama nie aw tahpa pahno tlôh ei ta.

²⁶ Chatawhcha Zawsi cha a o lâ a vy pata nahta ama ku liata lymâ a ypa cha, o chhôh lâ a hnohta cheih ei ta, a bôhpa ta a naoh chyu ei ta.

²⁷ Chatawhcha ano chata ama thâtih hiahri ta, “Nama paw a thâtih nama reipa pawpipa kha a tlâh nota a châ ma? A hroh thlâh ha ma?” tah ta.

²⁸ Âmo chata, “Eima paw, na chakaotuhpa cha, a tlâh nota châ ta, a hroh na,” tah ei ta. Chatawhcha ama luh a bôh ei ta, a naoh ei ta.

²⁹ Ano cha, mohmia pasaih ta, a nawhta Benzami a nô sawchapawpa cha hmô ta, “Kha kha nama seihnai chaipa, a thâtih eina chhopa eichi kha ma a châ?” “Ei sawchapawpa y, Khazohpa ta cha ngiachhie mawh sy!” tah ta.

³⁰ Chatawhcha Zawsi chata a nawhta a hmô nahta a ngia a chhie ngaitapa vâta a chatliepa ta chana su thlai tlua ta. A chhôhpadâhpa chhôh lâ a ngia ta, cha liana chata cha ta.

³¹ Chatawhcha a hmia a pahlie ta, kei pua heih ta, thata a sohsi ta, “Pati nie tao teh u,” tah ta.

³² Ano châta a nano ta, âmo sahlao châta â nano ta, Izi chyhsa a nielâhpa sahlao châta â nano ta tao ei ta, Izi sahlao ta Hebrai sahlao cha nie lâh thei tlôh lei khâh ei ta, cha hawhta taopa cha Izi sahlao châta ânapa a châ.

³³ Chatanachata machâ chaipa cha a uhthei châna hawhta, hawti chaipa cha, a seihnai chaipa châna hawhta, Zawsi hmiakô liata a tyuh ei ta; chatanachata noâh tah kaw chyu ei ta.

³⁴ Zawsi chata ano liatahpa tovyuhzy ama hnohta pahlâsa pachhuah ta, Benzami tovyuh chhochhi cha ama tovyuh zydua hlâna chata a lie pangawh ta a hluh pachai. Chatawhcha kresawtizy doh ei ta, hmaohkha ta thaphapa ta y ei ta.