Ezra 10

¹ Chatawhcha Khazohpa o lâ aheihpa ta â khu lâta paopa ta, chana chôta, Ezra cha thlahchhâ ta, reihpha a cheih nona chata a hnohta Izarel chyhsa, chyhsa hluhpi a chanô a chapaw ta hawti zy chhaota a vaw pahmaohpakhy ei ta; zawpizy cha thata cha ei ta.

² Chatawhcha Elama pathla hry liatahpa Zehiel sawchapawpa Shekaniah chata Ezra hnohta, “Eima Khazohpa chô liana chata hmo parao haw tlai pi ta, he râh liata pho hropa chanô zy cha lahpinô ta hnei pi ta, anodeikuacha Izarel mozy chata he kyh liana heta hnabeiseina khâ a y thlâh haw.

³ Chavâta a vy teh u, ei zibeipa nata eima Khazohpa biepiepa ta a chalyupa maih ryhraopa lymâ hawhta chazy lahpinô zydua nata âmo liata a pihpa maih cha pachhaih awpa ta eima Khazohpa lâta bie hraih ei suh u; cha cha ryhpa lymâ hawhta taopa châ mawh sy.

⁴ Thyu teh, he he na vyuhpa châ ta, keimo chhao na chhâh a châpa châ pi ta, riahpha ngaitapa ta y la, tao teh,” tahpa ta taokhei ta.

⁵ Chatanachata Ezra cha thyu ta, theihthaipa pawhrâh viapa zy nata Livai chizy nata Izarel mo zydua cha cha bie hawhta tao awpa ta chhie pasasa ta. Chatanachata chhie sa haw ei ta.

⁶ Chatanachata Ezra cha Khazohpa o lâ a heihpa cha thyu ta, Eliashi sawchapawpa Zôhana chhôhpadâhpa liata a ngia ta, cha liata a vaw ngia nahta viahchhâ nie chachei leipa ta, ti chhao doh vei, seichâna tawhta a puapa sahlaozy hmotaopa moleipa vâta pacharôhpa ta a ypa châ tlôh ta.

⁷ Chatawhcha Zudah râh zydua nata Zerusale liata sei a puapa sahlao zydua hnohna chata Zerusale liata a pakhy khaipa ta,

⁸ ahyrai ama molaipa zy nata ama machâ zy ryhraopa hawhta noh thôh chhôh ta a vy leipa maih cha a hmobaoh zydua la khaipa ta, ano chhao cha sei a puapa sahlao hry tawhta papua awpa a châ aw; tahpa bie phuah ei ta.

⁹ Chatanachata Zudah chyhsa nata Benzami mozy cha, cha noh thôh chhôh liana chata Zerusale liata a pakhy khai ei ta; cha cha thla chakina noh syno noh châ ta. Khazohpa o tlyhmia kawhpa lialiah liana chata zawpi zydua cha atyuh ei ta, cha biezy vâta nata vâsua ru ngaitapa vâna chata a chalyu ngâ kaw ei ta.

¹⁰ Chatawhcha theihthaipa Ezra cha a duah ta ama hnohta, “Hmo parao haw eichi ta, Izarel mozy thai leina bailai ta, pho hropa chanô zy lahpinô ta hnei ei chi ta.

¹¹ Chavâta ABEIPA nama mahpaw zy Khazohpa lâna chata reihpha chei ula, a kho viapa tao teh u; he râh liata pho hropa nata ama chanô zy tawhtapa he a panano teh u,” tah ta.

¹² Chatanachata zawpi zydua chata achhy ei ta, a paro ngaitapa ta, “A châ tlaina; na reipa hawhna tlai chata eima tao awpa a châ.

¹³ Anodeikuacha chyhsa hluh tlôh pi ta, vâsua daihti châ tlôh hra ta; khôtho liana heta a duah thlâh ha thei leipa pi ta. Noh kha tlyma noh no tlyma ta tao thlâh awpa châ hra vei; he kyh liana heta thata vaw parao haw tlôh pi ta.

¹⁴ Zawpi zydua chata eima molaipa zy raopa châ sala; eima khih liata pho hropa chanô a hneituhpa zydua cha khi to liata ama machâzy nata ryureituhpa zy chhaota ama vyna daihti raopa liata a vy lymâ ei sala, eima chô liata Khazohpa hiehâhna ru ngaitapa he paipa ta he bie he eima pasia hlâ lei cha.” tah ei ta.

¹⁵ Asahel sawchapawpa Zawnatha nata Tikvah sawchapawpa Zahzeiah zy deita ta he bie he khoh leipa ei ta, chatawhcha Livai chi Mesula nata Shabethai ta a châkhei ei ta.

¹⁶ Chatawhcha seichâna tawhta a puapa sahlao chata cha hawhna chata tao ei ta. Theihthaipa Ezra cha ama chhôhkha pawhrâhpa thokha chhaota, ama chhôhkha pawhrâhpa lymâ hawhta ama moh rei khaipa ta rao ei ta. Thla hrawhna noh kha noh ta cha bie cha pachâpa ta a pakhy ei ta;

¹⁷ thla khana noh kha noh ta pho hropa chanô a hneituhpa zy cha pasia khai ei ta.

¹⁸ Theihthaipa sawzy hryta pho hropa chanô lahpinô ta a hneipa ama pahnopa zy cha Zesua pathlazy hry liata, Zôzada sawchapawpa nata a unawhpa Maasei, Elieza, Zari nata Kedaliah zy.

¹⁹ Âmo chata ama lahpinô zy a chhaih awpa ta bie hraih ei ta, chatawhcha ama thai leipa vâta ama thai leina cha mietahkupa zaw hry liatahpa mietahkupa tôhpa pô kha ta atheih ei ta.

²⁰ Ima pathlazy hry liata: Hanani nata Zebadia.

²¹ Hari pathlazy hry liata: Maasei, Elaiza, Shemaiah, Zahiel nata Uziah zy.

²² Pashu pathlazy hry liata: Eliônai, Maasei, Ishmael, Nethanel, Zôzaba nata Elasa zy châ ei ta.

²³ Livai chizy hry liata: Zôzaba zy, Shimei zy, Kelaiah (Kelita ama tah tyh hra), Pathahia, Zudah nata Elieza zy châ ei ta.

²⁴ Hla satuhpa zy hry liata: Eliashi châ ta. Ochhivaihtuhpa zy hry liata: Shaluma, Telema nata Uri zy châ ei ta.

²⁵ Chatawhcha Izarel sahlaozy hry liata: Paro pathla liata: Ramiah, Iziah, Malkizah, Mizami, Eliaza, Malkizah nata Benai zy,

²⁶ Elama pathla liatahpa: Mataniah, Zekaria, Zehiel, Abdi, Zeremô nata Elaiza zy.

²⁷ Zatu pathla liatahpa: Eliônai, Eliashi, Mataniah, Zeremô, Zaba nata Aziza zy.

²⁸ Bebai pathla liatahpa: Zehôhana, Hananiah, Zabai nata Athlai zy.

²⁹ Bani pathla liatahpa: Mesula, Malu, Adai, Zasu, Sheal nata Zeremô zy.

³⁰ Pahamôaba pathla liatahpa: Adna, Kela, Benai, Maasei, Mataniah, Bezalel, Binui, nata Manase zy.

³¹ Hari pathla liatahpa: Elieza, Ishizah, Malkizah, Shemaiah, Simeôna,

³² Benzami, Malu nata Shemariah zy.

³³ Hasu pathla liatahpa: Matenai, Matata, Zaba, Eliphele, Zeremai, Manase nata Shimei zy.

³⁴ Bani pathla liatahpa: Maadai, Amra, Uel,

³⁵ Benai, Bedei, Keluhi,

³⁶ Vania, Meremô Elisahi,

³⁷ Mataniah, Matenai nata Zaasu zy.

³⁸ Binui pathlazy liatahpa: Shimei,

³⁹ Shelemiah, Natha, Adai,

⁴⁰ Makhadebai, Shasai, Bharai,

⁴¹ Azarel, Shelemiah, Shemariah,

⁴² Shaluma, Amariah nata Zawsi zy.

⁴³ Nebô pathla liatahpa: Zeiel, Matithia, Zaba, Zebina, Zadai, Zôel nata Benai zy ama châ.

⁴⁴ He zydua heta pho hropa lahpinô ta hnei ei ta, thokha chata cha ama lahpinôzy liana chata sawzy sa ei ta.