Ezekiel 34

¹ ABEIPA bie cha ei hnohta vaw tlô ta:

² “Chyhsa y, Izarel sahlao mietahkuvaihtuhpazy chô liata chhochhielie teh, chhochhielie teh, âmo hnohta; mietahkuvaihtuhpazy hnohta tlai chata, he tana heta Abeipa KHAZOHPA ta a tah: Izarel sahlao mietahkuvaihtuhpa âmo a pasâhpazy cha ama hu a po na! Mietahkuvaihtuhpazy chata mietahkupazy cha pasa aw veih ei ma?

³ A thawpazy cha nie eichi ta, a hmi ta a tobi eichi ta, a thawpazy cha thie eichi ta; mietahkupazy pasa tlôh eichi va.

⁴ Hri a hneipazy tha patlôsa leipa eichi ta, tlâh leipa zy patlâh leipa eichi ta, phei thliepazy chahry leipa eichi ta, topazy a vaw chhi hra veih eichi, aleipazy tlua hra veih eichi, a pachyu ngaitapa nata a pasa ngaitapa ta tlao chhorei eichi ta.

⁵ Mietahkuvaihtuhpazy ama y leipa vâta papaipa ta y haw ei ta; pai ei ta, sahrâhpazy niepa vaw châ haw ei ta.

⁶ Kei mietahkupazy cha tlâh to nata a sâhpa to liata viavi ei ta, ei mietahkupazy cha alei chô zydua liata amâ paih pathla haw, a tluatuhpa nata a pachâtuhpa rai y veih ei, tahpa ta reih mah y,” tah ta.

⁷ “Chavâta mietahkuvaihtuhpazy saih u, ABEIPA bie nahthlie teh u:

⁸ Ei hro na, Abeipa KHAZOHPA ta a tah, mietahkuvaihtuhpa y leipa ta, mietahkuvaihtuhpazy ta ei mietahkupazy tlua leipa ta, mietahkuvaihtuhpazy ta ei mietahkupazy pasa leipa ta, âmo tlao ama pasapa vâta ei mietahkupazy cha sahrâhpazy niepa dei vaw châ haw ei ta, ei mietahkupazy cha taipa dei châ haw tlai ei ta;

⁹ chavâta, nâmo mietahkuvaihtuhpazy saih u, ABEIPA bie he thei teh u.

¹⁰ He tana heta Abeipa KHAZOHPA ta a tah: Pachâ teh u, mietahkuvaihtuhpazy cha ei dyuh na; ama kuzy tawhtapa ei mietahkupazy chhu aw na ta, ei mietahkupazy ama mohôna pachhâsa aw na ta; mietahkuvaihtuhpazy chhao âmosasy ta a pasa khao hra aw veih ei. Ama kalachhôh tawhta ei mietahkupazy la khai aw na ta, ama châta niepa a châ khao lei nawpa ta,” tahpa ta.

¹¹ “He tana heta Abeipa KHAZOHPA ta tah tlôh ta: Pachâ teh, kei, keima tlai heta, ei mietahkupazy tlua aw na ta, ei hmô aw.

¹² Mietahkuvaihtuhpa ta a mietahkupa paipazy hry liata a mietahkupa zawzy a tlua no hawhta ei mietahkupazy ei tlua aw; vâ panoh no nata zohna ry liata ama paina zydua tawhta ei pachha aw.

¹³ Chatawhcha chyhsazy hry tawhta la aw na ta, râh to tawhta pakhy aw na ta, ama râh tlai liata ei chhihtha aw; Izarel tlâhzy liata tihnawhzy liata chyhsa pahrâna su zydua liata ei pasa aw.

¹⁴ Sibiepa phapa suzy liata pasa aw na ta, ama mietahkupa sahdô cha Izarel tlâh sâhpazy liata a y aw; mietahkupa sahdô phapa chô liata a byu aw ei ta, Izarel tlâh chô liata sibiepa a ypa suzy liata ama bâ aw.

¹⁵ Keima tlaita ei mietahkupazy cha pasa aw na ta, ei pabyusa hnolo aw, Abeipa KHAZOHPA ta a tah.

¹⁶ A leipa cha tlua aw na ta, ama phei a thliepazy cha chahry aw na ta, a tlâh leipa tha ei patlôsa aw, a thawpa nata a thatlôpazy cha vaih aw na ta; a dopata ta ei pasa aw.

¹⁷ “Nâmo kyh liata cha, hy ei mietahkupa zawzy saih u, he tana heta Abeipa KHAZOHPA ta a tah: Pachâ teh u, mietahkupazy likawh ta, mietahkupa tôhpazy nata mietôhpazy likawh ta ei pachia aw.

¹⁸ Sibiepa su phapa liata bâpa cha nama châta hmo chyhnawhpa hawhta alâpa ta nama bâna hnei chhôhpa cha phei ta tlypa ta tlao nama parao ma? Ti paso ngaitapazy cha nama doh khai nahta nama phei ta nama panôh ma?

¹⁹ Ei mietahkupazy deikua chata nama phei ta tly chiehpa nie ei ta, nama phei ta nama panôh chiehpa ama doh.

²⁰ “Chavâta âmo hnohta he tana heta Abeipa KHAZOHPA ta a tah: Pachâ teh u, kei, keima tlai heta, sahroh thawpazy nata sahroh zaohpazy likawh ta ei pachia aw.

²¹ A chiehleipazy cha kâ lâta nata ngiatlâh ta chakho eichi ta, nama kizy ta daih eichi ta, papai eichi ta.

²² Ei mietahkupazy cha pachha aw na ta, taipa dei châ khao leipa aw ei ta; mietahkupazy likawh bie ei pachia aw.

²³ Chatawhcha âmo chô liata vaihtuhpa pakha soh aw na ta, na chakaotuhpa Davi tlai cha, ano chata âmo cha a pasa aw; ano cha âmo vaihtuhpa châ aw ta, âmo cha a pasa aw.

²⁴ Chatawhcha kei ABEIPA he ama Khazohpa châ aw na ta, na chakaotuhpa Davi cha ama chô liata abeisaw a châ aw; kei ABEIPA tlai heta ei reih haw.

²⁵ “Âmo nata adyhna biehrai tao aw na ta, sahrâhpazy cha râh tawhtapa ei pahlei aw, râhpathohpazy lâta chhao aboh ngaitapa ta pahrâ aw ei ta, thothizy liata ama mô hra aw.

²⁶ Âmo nata ei tlâh byupa kiapâh ta suzy cha byhnâ pachâsa aw na ta; a daihti ta vâsua pasuasa aw na ta; vâ byhnâzy a vaw suah aw.

²⁷ Chatawhcha lyu liata tho chata a thei pathei aw ta, alei ta a thôhna papua aw ta, ama râh liana chata a bohpata ta ama y aw; ama raopakypazy thlie na ta, sei ta a taotuhpazy ku tawhtapa ei pachha tina chata kei he ABEIPA ei châ tahpa ama pahno aw.

²⁸ Phopi hropazy hraona dei châ khao leipa aw ei ta; râh sahrâhpazy niepa dei châ khao hra leipa aw ei ta; a bohpata ta tlao y aw ei ta ahy hmah ta pachisa beih khao aw veih ei.

²⁹ Âmo chata tho lopa moh pathâh ngaitapa taopa aw na ta, cha râh liana chata chakâhna ta patlô khao leipa aw ta, pho hropazy nawhtawna pasa tao khao hra aw veih ei.

³⁰ Chatawhcha kei ABEIPA ama Khazohpa he ama hnohta ei y tahpa pahnopa ta, âmo Izarel chhôhkhapazy chhao, ei chyhsa ama châ tahpa ama pahno aw, Abeipa KHAZOHPA ta a tah.

³¹ Chatawhcha nâmo, ei mietahkupazy, ei sibiepa su liata mietahkupazy cha châ eichi ta, kei he nama Khazohpa ei châ, Abeipa KHAZOHPA ta a tah,” tahpa ta.