Ryhpachaneina 28

¹ ABEIPA nama Khazohpa ao cha pakhâta ta nahthliepa ta, atanoh ta bie ei cha piepa zydua a chado ngaitapa ta nama zyh khiata la, ABEIPA nama Khazohpa chata “khizaw pho zydua liata chônô chaipa ta a cha tao ei.

² ABEIPA nama Khazohpa bie namâ pyh khiahtala, he byhnâ zydua he nama chô liata y aw ta, a cha zi lymâ aw ei.

³ O lâ nata râh lâna zy chata byhnâ piepa ta y aw eichi ta.

⁴ Nama saw zy, nama chhaolei patheipa zy, nama sahroh zaw pôhpa, nama viahchao nata nama mietahkupa zaw a pôhpa zy cha byhnâ piepa ta a y aw.

⁵ Nama hrâbyh nata nama viahchhâ nyna beihkoh zy byhnâ piepa ta y aw ta.

⁶ Namâ ngia nota byhnâ piepa ta y aw ta, nama puapazy chhao byhnâ piepa ta nama y aw.

⁷ Nama khakhaipa nâmo châ dyuhtuhpa zy cha ABEIPA ta nama hmiakô liata panawhsa pa aw ei ta, cha dyuh awpa ta lâpi miakha liata a vaw ngia aw ei ta, lâpi miasari ta amâ râpai aw.

⁸ ABEIPA ta nama sawva chô liata zy, nama hriapa zydua chô liata zy, byhnâ cha pie aw ta; ABEIPA nama Khazohpa ta râh a cha piepa liana chata byhnâ a cha pie aw ei.

⁹ Nama hnohta chhie a sa hawpa hawhta ABEIPA chata ano châta pho pathaihpa ta a cha pa-isa aw ei, ABEIPA nama Khazohpa biepiepa zy zyhpa ta a lâpi zy namâ chhih khiahtala,

¹⁰ chatanachata khizaw pho to ta ABEIPA moh bipa nama châpa pahno aw ei ta, a cha chi aw ei.

¹¹ Chatawhcha namo pie awpa ta nama mahpaw zy ABEIPA ta a vaw taipa râh liana chata nama sawzy, nama sahroh zaw pôhna liata zy, nama chhaohlei patheipa liata zy, ABEIPA ta thata cha papôh pa aw ei.

¹² ABEIPA chata a daihti liata nama râh a pasa awpa ta vâsua cha pie awpa nata nama ku hriapa zydua byhnâ pie awpa ta avâ, a ryubyh phapa cha cha pahypa aw ei ta; chatanachata phopi hluhpi dyu pacheisa aw eichi ta, nâmo deikua chata chei aw vei eichi.

¹³ Chatawhcha ABEIPA ta chaolahmei châ leipa ta luh ta cha tao aw ei ta; a ry châ leipa ta a chô lymâ ta nama châ aw; ABEIPA nama Khazohpa biepiepa zyhpa ta atanoh ta ei cha piepa ei he, a chado ngaitapa ta a pyhpa ta,

¹⁴ atanoh ta bie ei cha piepa, a biezy he a kheihawhpa liata hmahta chachâh lâ tlyma, chavei lâ tlyma liata khazoh hropa zy zipa nata chakao awpa ta nama tleisai vei khiahtala.

¹⁵ Anodeikuacha ABEIPA nama Khazohpa ao cha pakhâta ta nahthliepa ta, atanoh ta bie ei cha piepa biepiepa zydua a chado ngaitapa ta nama zyh leipa khiahtala, he chhie zydua he nama chô liata vaw y aw ta, a cha tlô thlu aw ei.

¹⁶ O lâ chhiesapa ta y aw eichi ta, râh lâta chhiesapa ta nama y hra aw.

¹⁷ Nama hrâbyh nata nama viahchhâ nyna beihkoh zy chhiesapa ta a y aw.

¹⁸ Nama sawzy nama chhaolei patheipa zy, nama viahchao pôhna nata nama mietahkupa zaw pôhna zy cha chhiesapa ta a y aw.

¹⁹ Namâ ngiahpa zy chhiesapa ta y aw ta, nama puapazy chhao chhiesapa ta nama y aw.

²⁰ ABEIPA ta nama chô liata nama ku hriapa zydua liata zy, chhiesana zy, tymâna zy, rana zy, vaw tuah aw ta, nawh aw eichi ta, thlai nama leidia aw, nama hmotaopa zy moleipa ta eina pathluapa vâ eichi ta.

²¹ Hnei awpa ta namâ ngiahna râh tawhtapa cha a cha pahleipadia khai hlâ lei cha ABEIPA ta hri a cha pavaosa aw ei.

²² ABEIPA ta chaohna zy, chasipa zy, thlohna zy, palona zy, zaozi zy, chawhkaraina zy, hmyna zy ta cha hri aw ei ta, nama leidia khai hlâ lei cha a châ chadai lymâ aw ei.

²³ Nama chô lâta nama avâ cha dawh châ aw ta; nama ry lâta alei cha thua a châ aw.

²⁴ Nama râh vâsua cha doh lei nata meichado lâta ABEIPA ta pachâsa aw ta; nama leidia khai hlâ lei cha, avâ tawhta nama chô liata a za tla aw.

²⁵ ABEIPA ta nama khakhaipa zy hmiakô liata pahniepa ta cha paysa aw ei ta; âmo a dyu awpa ta lâpi miakha liata pua aw eichi ta, lâpi miasari ta a râpai aw eichi ta; leilô khihnarâh zydua hry liata pasichhihpa ta nama y aw.

²⁶ Nama ri cha avâ pavaw zydua nata lyurâhpa sa zydua niepa châ aw ta; a totuhpa y chachei aw veih ei.

²⁷ Patlâh thei leipa Izi kheihlu zy, sa thlohna zy, riatha zy ta ABEIPA ta a cha hrie aw ei.

²⁸ Hruna zy, mochaona zy, riahchhiena zy ta ABEIPA ta cha hrie aw ta;

²⁹ mochaopa ta a zopa liata a pathâ ngâpa hawhta nohchhôh pavâhpa liata chhao pathâ ngâ aw eichi ta nama khihsana kyh liana chata thlao a chhi aw veih eichi; chatawhcha pasaipa-ina chata nata hraona châta nama châ ngâthlâh ha aw, cha pachha awpa ta ahyma y aw veih ei.

³⁰ Lahpinô a pahawh aw eichi ta, chyhsa hropa ta amâ ziakhei aw; o sa aw eichi ta pahrâ aw veih eichi; kresadô tao aw eichi ta, a theilâpa nie aw veih eichi.

³¹ Nama mohmô liata nama viahchao tôhpa zy cha thiepa châ aw ta, a sapa cha nie aw veih eichi; nama alâzy cha cha lapa raruah aw ei ta, cha pie khao aw veih ei; nama mietahkupa zy cha nama khakhaipa zy lâta piepa a châ aw, cha pachhatuhpa ahyhmah hnei aw veih eichi.

³² Nama sawchapaw zy, nama sawchanô zy pho hropa lâta piepa châ aw ei ta, no y ta âmo vâpa ta nama sai thlâh ha tyh aw, nama saina lâta nama mo zy a bâ aw; khâpahmah ta tao theipa hnei tlôh leipa aw eichi ta.

³³ Nama chhaohlei patheipa zy nata nama hriapasapa theizy cha nama pahno leipa pho ta nie khai aw ei ta, pasaipa-ipa nata riepatheipa ta nama ch aw;

³⁴ chatanachata cha hmozy cha nama hmô nata nama hrupâ aw.

³⁵ ABEIPA ta nama pakhuh liata zy, nama phei liata zy, patlâh thei leipa kheihlu pasapa chi cha pathlasa aw ei ta, nama pheipazah tawhta nama laki taihta.

³⁶ Nâmo nata nama abeipa chhaota, nama mahpaw zy taihta nama pahno beih leipa phopi hnohta ABEIPA chata châ chhi aw ei ta; cha liana chata khazoh hropa tho nata alô nama chakao aw.

³⁷ Chatanachata ABEIPA chata a châ chhina awpa pho zydua hry liana chata noâhpa nata rapa nata a chhiena lâta pakhona nama châ aw.

³⁸ Lyu liata sa chi a hluhpi puakhei aw eichi ta, a chyhta deita nama hria aw; khawsu ta a nie khai aw.

³⁹ Kresadô tao aw eichi ta, mohôh aw eichi ta, chârahsala a kresawti cha doh leipa aw eichi ta, kre cha lyu hra aw veih ei chi; châkariepa ta a nie khai aw.

⁴⁰ Nama râh zydua liata ôli tho loh aw eichi ta, châhrasala a thaw cha a thu aw veih eichi; nama ôli theizy cha a zô khai aw.

⁴¹ Sawchapaw zy, sawchanô zy sa aw eichi ta, châhrasala nâmo eih châ aw veih ei; sei ta amâ chhi aw.

⁴² Nama theilâpa kô zydua nata nama chhaolei patheipa cha khawsu châta a châ aw.

⁴³ Râh hropa chyhsa nama hry liata a ypa zy chata a sapa ta cha khoh lymâ aw ei ta; nâmo cha namâ hnai laih lymâ aw.

⁴⁴ Dyu cha pacheisa aw ei ta, nâmo ta dyu pacheisa aw veih eichi; âmo cha luh châ aw ei ta, nâmo cha chaolahmei nama châ aw.

⁴⁵ He chhiesana zydua he nama chô liata y aw ta, châ chadai aw ei ta, a cha pha aw ei, a cha pahleipadia khaina taihta a biepiepa zy nata a ryhpa a cha piepa zyh awpa ta ABEIPA nama Khazohpa ao cha nama nahthlie leipa vâta.

⁴⁶ Nama chô liata nata nama pathlazy chô liata chhâzaw ta pahnona noâh tahna chata a y aw.

⁴⁷ Hmo a to liata nama vaw hneirôhpa chhaota ABEIPA nama Khazohpa cha palôhrupa aly ngaitapa nata thapha ngaitapa ta nama chakao leipa vâta,

⁴⁸ nâmo châ dyuh awpa ta ABEIPA ta a vaw tuah awpa nama khakhaipa zy cha nodina chôta zy, dâhphina chôta zy, thluahruana chôta zy, hmo a to a phahlana chôta zy ta chakao aw eichi ta; ama cha pahleipadia khai hlâ lei ta cha nama rao liata thua raopaky ama cha paky aw.

⁴⁹ Lâhlapi tawhta kaokih tawhtapa nâmo châ dyuh awpa pho ABEIPA ta pahmôpi a pathlôpa hawhta a vaw tuah aw, ama reih nama pahno leipa pho,

⁵⁰ machâzy chhao a papeisa leipa nata satliazy chhao a khokhei hlei leipa pho a hrâh ngaitapa cha,

⁵¹ chatawhcha nama sahroh zaw pôhna zy nama chhaolei patheipa zy, ama leidia khai hlâ lei cha nie aw ei ta; sâh zy, kresawti zy, thaw zy, nama viahchao pôhna zy, nama mietahkupa zaw tawzy cha pahlôhpa aw veih ei, nama leidiana ama cha tlôkheipa awpa ta.

⁵² Nama zydua liata nama ngâpa, nama kuh a sâhpa zy a chona taihta, nama kuh chhikao zydua liata cha dôh aw ei ta; ABEIPA nama Khazohpa ta a cha piepa, nama râh zydua liata, nama kuh chhikao zydua liata a cha dôh aw ei.

⁵³ Nama khakhaipa zy ta ama cha dôhna vâta ama cha padôna nata ama cha dôhna liana chata nama saw ABEIPA ta a cha piepa nama sawchapawzy nata nama sawchanô zy sa nama nie aw.

⁵⁴ Nama hry liata chyhsa nôphapa, chyhsa pha ngaitapa zy chhaota, ama unawhpa zy, ama lahpinô kho ngaitapa zy, ama sawnawhzy dâhdei chhao moh thei aw veih ei;

⁵⁵ khâpahmah ama hnei khao leipa vâta nata ahyhmah ta ama pie eipa tâtâh, ama sawzy sa ama nie aw; ama cha dôhna nata ama cha padôna, nama khakhaipa zy ta nama kuh chhikao liata ama cha padôpa vâta.

⁵⁶ Nama hry liata chanô a panyusapa nata chiehleipa zy, ama chieh leina nata ama panyusapa vâta alei chhao a tly khoh leipa zy chata ama vahpa kho ngaitapa zy, ama sawchapawpa zy, ama sawchanônô zy,

⁵⁷ amâ pyh haipa hawsaihpa zy nata ama saw a pih awpa zy chhao, moh thei leipa aw ei ta, a to amâ phahla hawpa vâta a ru lâta ama nie aw, ama cha dôna nata ama cha padôna nama khakhaipa zy ta nama kuh chhikao liata ama cha padôna vâta.

⁵⁸ ABEIPA nama Khazohpa moh rôhnah ngaitapa nata chichhih ngaitapa he, nama chi thei nawpa ta he châbu liata â rohpa bie zydua he a chado ngaitapa ta nama zyh vei khiahtala,

⁵⁹ ABEIPA ta nâmo nata nama pathlazy chô liata hriena noâhchhih ngaitapa, hri ru ngaitapa a y thlâh hapa, pasana rietheichhi ngaitapa a y thlâh hapa a chareisa aw.

⁶⁰ Nama chi kaw tyhpa, Izi râh hrizy kha nama chô liata chareisa heih aw ta; khâchâ a cha patu aw ei.

⁶¹ He ryhpa châbu liata ro leipa pasana nata hri to chhao, nama leidia hlâlei cha ABEIPA ta nama chô liata a chareisa aw.

⁶² Avâ liata awhsi zie a châ tyhpa zy kha a chyhta deita nama vaw châ ha aw; ABEIPA nama Khazohpa ao nama zyh leipa vâta.

⁶³ Chatawhcha a phapa ta a cha tao awpa nata a cha papôh awpa ta ABEIPA cha alypa hawhna khata a cha pahleipadia awpa nata a cha parao awpa ta ABEIPA cha aly aw ta; nama hnei awpa ta namâ ngiapa râh tawhtapa cha phiapa ta nama châ aw.

⁶⁴ Chatawhcha ABEIPA ta kaokih taihta kaokih hiakha lâ taihta chi to hry liata cha papai aw ei ta; cha liana chata tho nata alô nama mahpaw zy taihta nama pahno beih leipa khazoh hropa zy nama chakao aw.

⁶⁵ Cha pho hry liana chata huhnona rai hmô leipa aw eichi ta, nama phei chata a pahâna rai y leipa aw ta; cha liana chata ABEIPA ta a chalyuna palôhrupa zy, mo bâna zy, panaona palôhrupa zy, tlao a cha pie aw ei;

⁶⁶ nama hrona cha chichhih ngaitapa ta y aw ta; chhô nata zâ chi ngâthlâh hâpa ta y aw eichi ta, nama hrona ta chhôhmo ngaitapa ta yna hnei aw vei.

⁶⁷ Myta cha, ‘Zâlâ a châ bâ mawh la,’ tah aw eichi ta, zâlâ ta, ‘My a châ bâ mawh la.’ nama tah aw, hmo chichhihpa nama pathipalôh ta a chi awpa vâta nata nama mo ta nama hmô awpa vâna chata.

⁶⁸ Hmô beih khao aw veih eichi, nama hnohta ei tahpa lâpi liana chata balyh ta Izi râh lâta ABEIPA ta a châ chhi heih aw ei; cha liana chata nama khakhaipa zy, seichapaw châta zy, seichanô châta zy, nâmosasyh ta a zuah aw eichi ta, ahyhmah ta cha khoh aw veih ei,” tahpa ta.