Theihthaina 26

¹ Nâmo chata khazoh nohthlapa nama tao awpa châ leipa ta, nohthlapa tao chhyhpa tlyma, lôbôpa tlyma, nama tao awpa châ leipa ta, a naoh awpata nama râh liana heta nohthlapa a kiapâh alô nama bô awpa châ hra vei; Kei he ABEIPA nama Khazohpa châ tlôh na ta.

² Ei pahânohzy cha a ô aw eichi ta, ei su pathaihpa cha nama za awpa a châ: Kei he ABEIPA cha ei châ.

³ Ei bie raopazy cha zyhpa ta, ei biepiepazy a pyhpa ta namâ ngiah khiahtala.

⁴ vâsua zy cha a daihti ta patlasa aw na ta, alei chata papyusa aw ta, râh liata thozy chata thei pathei aw ei ta.

⁵ Nama sawhri liata sâh chata kre thei lyuna daihti taih patu aw ta, nama kre lyupata chi cheina daihti patu aw ta; nama viahchhâ cha ribiepa ta nie aw eichi ta, nama râh liana heta thlalôh ngaitapa ta nama pahrâ aw.

⁶ He râh he thlalôh ngaitapa ta paysa aw na ta, a zia molo aw eichi ta, ahyhmah ta cha pachisa aw veih ei; sahrâpa moleipazy cha he râh tawhtapa he to khai aw na ta, zaozi ta nama râh chahry hra aw vei.

⁷ Nama khakhaipazy cha a chadai aw eichi ta, nama hmiakô liata zaozi ta thiepata ama y aw.

⁸ Chyhsa papangawh ta za kha a chadai aw eichi ta, za kha ta thy kha â chadai aw eichi ta; nama khakhaipazy cha nama hmiakô liata zaozi ta thiepata ama y aw.

⁹ Chatawhcha ei cha khokheipa hawhta chi hluhpi cha pathlasa aw ei na ta, ei cha papôh aw ei, nâmo liata ei biehrai ei pa-i aw.

¹⁰ Chatawhcha bohpi nama pasopa a parohpazy cha nie aw eichi ta, a thiehpa so nawpa ta a parohpazy nama patly aw.

¹¹ Nama hry liata ei achhyna byureih cha paysa aw na ta, ei hrona chata châ heihsai aw veih ei.

¹² Nama hry liata y aw na ta, nama Khazohpa châ aw na ta, nâmo chhao ei chyhsazy nama châ aw.

¹³ Kei he, ABEIPA nama Khazohpa, ama sei nama châ lei nawpa ta, Izi râh tawhtapa châ chhithatuhpa châ na ta, nama raopakyzy cha thlie na ta â dopa ta ei cha pasiesa ei hih.

¹⁴ Anodeikuacha ei bie a pyh leipa ta, he biepiepa zydua he zyh leipa ta.

¹⁵ ei bie raopa zy khoh leipa ta, nama hro nata ei ryureipazy a haopa ta, ei biepiepa zydua zyh leipa ta, ei biehraipa nama parao khiahtala, kei chhaota.

¹⁶ nama chô liata he he ei tao aw; nama chô liata hmo chichhih ngaitapa, nama hrona a pahlei theipa nata nama mo zohna nata chasipa zy ei chareisa aw. Chatawhcha nama chicheipazy cha khâpahrao leipa a châ aw, nama khakhaipazy chata ama nie lymâ aw.

¹⁷ nama chô liana chata ei hmia châ heihnao aw ei na ta, nama khakhaipazy hmiakô liata nama nawh aw, nâmo châ haotuhpazy ta nama chô liata ryu hi aw ei ta, ahyhmah a chadai leipata namâ râ aw.

¹⁸ Chata chô chhaota ei bie namâ pyh leipa khiahtala, nama moleinazy vâta ei sari ei cha hrie aw ei.

¹⁹ nama thatlôna a palaikheipa cha parao aw na ta, nama avâ cha thua hawhta tao aw na ta, nama alei cha dawh hawhta, chatawhcha nama tha nama pahryu thlâhthlipa a châ aw.

²⁰ nama râh chata panyu leipa aw ta, râh liata thozy chata pathei hra aw vei.

²¹ Ei kho leinazie ta ypa ta, ei bie namâ pyh vei khiahtala, namo moleinazy hawhta a lie sari ta nama chô liata hriena ei patlôsa aw.

²² Chatawhcha nama hry liata sahrâhpazy vaw tuah aw na ta, cha chata nama sawzy cha lapa aw ei ta, nama sahrohzy cha siepa aw ei ta, nama chyhsazy ei pachyhsa aw, nama lâpizy dâhkaropa ta a y hra aw.

²³ Chata chôna chhaota ei chhoreina a pyh hlei leipa ta, ei kho leinazie ta nama y khiahtala.

²⁴ kei chhaota namo kho leinazie ta y aw na ta, keima tlaita nama moleina vâta ei sari ei cha hrie aw ei.

²⁵ Nama chô liata zaozi patlôsa aw na ta, cha chata biehrai phuh la aw ta, nama khih chhôh chyu liata ahmaohpakhy aw eichi ta, nama hry liata hri chareisa aw na ta, khakhaipazy ku liata piepa nama châ aw.

²⁶ Namâ ngiapâ chaipa viahchhâ ei parao khai tita cha, chanô pahrawh ta a chhona miakha liata chho aw ei ta, nama viahchhâ cha khopathliapa tlaita ama cha pie hei aw; nie aw eichi ta, nama rih bie hlei aw vei.

²⁷ Cha zydua chô chhaota, ei bie a pyh hlei leipa ta, ei kho leinazie ta nama y khiahtala.

²⁸ pathi-ia ngaitapa ta nama kho leinazie ta y aw na ta, nama moleina vâta ei sari ei cha hrie hra aw ei.

²⁹ Nama sawchapawpazy sa nie aw eichi ta, nama sawchanôzy sa nama nie hra aw.

³⁰ Chatawhcha nama su sâhpazy parao aw na ta, nama noh khazoh nohthlapazy papao aw na ta, nama rizy cha nama khazoh nohthlapazy ri chô liata ei thy aw; ei hrona ta a châ hao aw ei.

³¹ Nama khihzy cha dâhkaropa ta tao aw na ta, nama su pathaihpazy cha a ryhpata tao aw na ta, nama rohpahâhpazy cha pahnâ aw va na.

³² Chatawhcha râh cha dâhkaropa ta tao aw na ta, nama khakhaipa cha liata a ypazy chata ama no a âh aw.

³³ Chatawhcha pho hropazy hry liata cha papai aw ei na ta, châ chadai awpa ta zaozi ei phia aw, nama khihzy cha khi rypa a vaw châ aw.

³⁴ Chatawhcha râh chata dâhkaropa ta a y chhôh zydua nata nama khakhaipazy râh liata nama y chhôh chata râh cha a pahâ aw ta, a pahânohzy liana chata a tha a pha aw.

³⁵ Dâhkaropa ta a y chhôh zydua cha â pahâ aw, nama y nota nama pahâ nota a pahâ tyh hra leipazy kha.

³⁶ Chatawhcha nama hry liata a laibâhpazy cha ama khakhaipazy râh liata ama pathipalôh liata thazeina ei paysa aw; chatawhcha chhohnapa pyu ta a chadai aw ta, zaozi tawhta a râpaipa hawhta a râpai aw ei ta, ahyhmah a chadai leipa ta ama pao aw.

³⁷ Ahyhmah a chadai leipa ta zaozi ta a chadaipa hawh tlaita ama chatichahnao aw; nama khakhaipazy vaw pakhâ awpa ta, thatlôna rai hnei aw veih ei chi.

³⁸ Pho hropazy hry liata leidia aw eichi ta, nama khakhaipazy râh chata a cha nie khai aw ei.

³⁹ Chatawhcha nama hry liata a laibâhpazy cha nama khakhaipazy râh liata ama hmo paraona vâta ama leidia aw; ama mahpawzy chata ama hmo paraonazy vâta ama leidiapa hawhta âmo chhao ama leidia hra aw.

⁴⁰ Ama moleina ei chô liata ama moleina vâta nata ama hmo paraona nata ama mahpawzy hmo paraona nata ei kho leinazie ta ama ypa vâta,

⁴¹ kei chhao ama kho leina zie ta y na ta, ama khakhaipazy râh liata ei paysapazy cha a papha leipa aw ei ta; ama pathipalôh kuhchhana vâta panawhsapa ta ama hmo paraona vâta hriena cha amâ pyh khiahtala.

⁴² Zakaw hnohta ei biehraipa cha a thei thlâh ha aw na ta Aisika hnohta biehraipa nata Abarahâ hnohta ei biehraipazy chhaota a thei thlâh ha aw na ta, chatawhcha râh chhao cha ei thei thlâh ha hra aw.

⁴³ Râh chhao cha pasaih aw ei ta, âmo y leipa ta dâhkaropa ta a y chhôh chata a pahânohzy liana chata a tha a pha aw; ei ryureinazy ama khoh leipa vâta nata ama hrona ta ei bieraopazy â hao tyhpa vâta ama hmo paraona hriena cha amâ pyh awpa a châ.

⁴⁴ Chata chôna chhao chata, ama khakhaipazy râh liata ama ypa cha, amo pahleipadia awpa nata âmo liata ei biehraipa paraopa ta thy pathlah leipa aw na ta, a hao hra aw va na: Kei he ABEIPA ama Khazohpa cha châ tlôh na ta.

⁴⁵ ama Khazohpa ei châ thei nawpa ta pho tozy mohmô liata, Izi râh tawhtapa ei chhithapa ama pathlatuhpazy biehrai cha âmo vâna heta tlao ei thei thlâh ha aw: Kei he ABEIPA cha ei châ, tah teh,” tahpa ta.

⁴⁶ Hezy he Sinai Tlâh liata Mawsi hmâpa ta, Ano nata Izarel pathlazy likawh ta ABEIPA ta a taopa biepiepazy, pachiapazy nata ryhpazy cha a châ.