Theihthaina 19

¹ ABEIPA ta Mawsi chho ta.

² Izarel pathla zawpi sahlao zydua cha chho la, ama hnohta, nama pathaih awpa a châ: Kei ABEIPA nama Khazohpa he pathaih tlôh na ta.

³ Chyhsa to ta, nama nô nata nama paw nama za awpa châ ta, ei pahânohzy cha nama ô awpa a châ: Kei he ABEIPA nama Khazohpa cha ei châ.

⁴ Khazohpa nohthlapa lâ a heih khah ula, nohthlapa patlaipa khazohzy nama châta tao hra khah u: Kei he ABEIPA nama Khazohpa cha ei châ.

⁵ ABEIPA chata adyhna hlâna namâ theih tita, a pyh tlâh châ awpata nama hlâ awpa a châ.

⁶ Nama hlâna noh nata a mylâ ta nie awpa châ ta, noh thôh noh taihta a y khiahtala mei ta rao awpa a châ.

⁷ Noh thôh noh ta niepa a châ rai khiahtala pasichhihpa châ ta; a pyhpa châ leipa aw ta.

⁸ a niepa maih chata ABEIPA hmo pathaihpa a papuapaleipa vâta a hmo paraona maoh phaoh aw ta, cha chyhsa cha a chiheihzy hry tawhtapa pathluapa ta a y aw.

⁹ Nama lyu liata sâh nama hria tita, nama lyu sâh adihliapazy taihta nama tai khai awpa châ leipa ta, a kâmo chhao nama tho awpa châ vei.

¹⁰ Nama kresadô liata a kâmo nama tho awpa châ leipa ta, nama kresadô liata a thei a zôpa chhao namâ huah awpa châ leipa ta, sipasapa nata râh hropa chyhsazy châta nama pahlôhpa awpa a châ: Kei he ABEIPA nama Khazohpa cha ei châ.

¹¹ Nama paru awpa châ leipa ta, dôpakheipa ta hmo nama tao awpa châ leipa ta, haipa ta nama chho awpa châ hra vei.

¹² Nama Khazohpa moh pachhiepa ta ei moh reipa ta, haipa ta chhie nama sa awpa châ vei: Kei he ABEIPA cha ei châ.

¹³ Na vaihzy na dô awpa châ leipa ta, na paru pa awpa châ hra vei. A hlaopa hlao cha azo zâkhidei ta a mylâ taihta nâ vao awpa châ vei.

¹⁴ Nahpâpa cha chhie na sapa awpa châ leipa ta, mochaopa hmiakô liata chapiasana na soh awpa châ hra vei, na Khazohpa na chi awpa a châ mâ tâh: Kei he ABEIPA cha ei châ.

¹⁵ Ryureina liana chata a sia leipa ta nama pachia awpa châ vei, sipasapa châ leipa ta, chyhsa hmo a tao theipa na za hlei awpa châ leipa ta, a sia ngaitapa ta na vaih ryu na reih awpa a châ.

¹⁶ Na chiheihzy hry liata chyhsazy kyh reipa ta nâ khie awpa châ leipa ta, na vaih thisaih kyh liata a no leipa ta na châkhei awpa châ hra vei: Kei he ABEIPA cha ei châ.

¹⁷ Na palôhrupa ta na unawhpa nâ hao awpa châ vei, na vaih cha na chhorei awpa a châ, a moleina liata na pathaih nawpa ta.

¹⁸ Phuh na la awpa châ leipa ta, na chiheih pathlazy a haona na hnei awpa châ hra vei, nâma kyh nâ pachâpa hawhta na vaih kyh na pachâ awpa tlao a châ: Kei he ABEIPA cha ei châ.

¹⁹ Ei biepiepazy cha nâ pyh awpa a châ. Na sahroh cha chi hropazy pathlasa khâ; na lyu liata âhnalasi chi no, a chi cheih khah la; hmo chi hropa miano sa pahlaopa poh nâ bu awpa châ hra vei.

²⁰ Ahyrai seichanô vahpa a pahawhtuhpa a hneipa, chatlai leipa, pathlie leipa chanô nata â zia khohpa maih cha, hriepa ama châ aw, thie awpa la châ vei, ano cha pathlie leipa a châpa vâta.

²¹ Ahmaohpakhyna poh-o chhikao liata ABEIPA lâta a paraopa hlâna, mietahkupa tôhpa tlai paraopa hlâna châta a chhi awpa a châ.

²² Chatawhcha a hmo parao hawpa a paraona liana chata ABEIPA hmiakô liata paraona hlâna mietahkupa tôhpa cha ta, theihthaipa ta aryhna a tao pa aw; chatanachata a hmo parao hawpa a paraona liana chata a ngiahthaipa a châ aw.

²³ “Râh cha pahrâpa ta niepa châta theilâpa kô chi to nama loh tita, a theilâpa cha pathai leipa ta nama pachâ awpa a châ; nama châta kô thôh pathai leipa ta nama pachâ awpa châ ta; nie chachei lei awpa a châ.

²⁴ A kô palih kô chata a theipa zydua cha ABEIPA reithai nawpata a eih ta panano awpa a châ.

²⁵ chatawhcha a kô pangawh kô chata nama châta a pôh lymâ thei nawpa ta, a theilâpa cha nama nie awpa a châ: Kei he ABEIPA nama Khazohpa cha ei châ.

²⁶ A thisaih chhaota khâpahmah nama nie awpa châ leipa ta, na dyuzy hmâpata, pachaopazy nama hmâh awpa châ hra vei.

²⁷ Na siali tawhta â dôpata na luh nâ ngyu awpa châ leipa ta, kâhmi kâ â lâna taih tai awpa châ hra vei.

²⁸ A thihpa vâta nama pôhpa nama â awpa châ leipa ta, namâ chapai awpa châ hra vei: Kei he ABEIPA cha ei châ.

²⁹ Sihrypa ta tao awpa ta na sawchanônô papuapalei khâ, râh cha apheina râh ta vaw châ aw ta, moleina ta a bie pathlei aw na.

³⁰ Ei pahânohzy cha namâ ô awpa châ ta, ei su pathaihpa cha nama za awpa a châ: Kei he ABEIPA cha ei châ.

³¹ Lyurâhripa pachao thaipa a peihpazy cha pangai khah ula, dyuthaipazy chhao nama pualei nawpa ta âmo cha tlua khah u: Kei he ABEIPA nama Khazohpa cha ei châ.

³² Luh pawhpazy hmiakô liana chata nâ duah lymâ tyh awpa châ ta, machâpa hmia cha na za awpa a châ; Khazohpa cha na chi awpa a châ: Kei he ABEIPA cha ei châ.

³³ Râh hropa chyhsa nama râh liata a y hrapa ama y khiahtala, âmo chôta â do leipata tao aw vei eichi.

³⁴ Râh hropa chyhsa nama hry liata a ypazy cha, nama châta nama râh liata chyhsa hawhta ama châ awpa châ ta, nâma kyh nâ pachâpa hawhta kyh na pachâ awpa a châ; nâmo chhao Izi râh liana khata râh hropa chyhsa nama châpa kha: Kei he ABEIPA nama Khazohpa ei châ hih.

³⁵ Ryureina kyh liata zy, thliena liata zy, khopathliana liata zy, panuana liata zy a sia leipata nama tao awpa châ vei.

³⁶ Khopathliana â do ngaitapa, khopathliana lô â do ngaitapa, ephah â do ngaitapa, hin â do ngaitapa nama hnei awpa a châ: Kei he ABEIPA nama Khazohpa Izi râh tawhta châ chhihthatuhpa kha ei châ.

³⁷ Chatawhcha ei biepiepa zydua nata ei ryhpa zydua a pyh aw eichi ta, nama zyh awpa a châ: Kei he ABEIPA cha ei châ, tah teh,” tahpa ta.