Theihthaina 16

¹ Arawna sawchapawpazy pano ta ABEIPA a hniapa ta ama thi tawhna chata ABEIPA ta Mawsi chho ta,

² ABEIPA ta Mawsi hnohta, Na unawhpa Arawna chho la, pohraipa chhôh su pathaihpa liata Byh chôta zawngiahna dyuchhai hmiakô liana chata a daihti maihta a vaw ngia cheita khah se, a thi pathlei aw na; zawngiahna dyuchhai chô liata amei liata ei vaw luah aw.

³ He hawhna heta Arawna cha su pathaihpa lâta a vawh awpa a châ, moleina atheihna châta viahchao tôh dawpa, raopa hlâna châta mietahkupa tôhpa chhaota.

⁴ Poh ri dipa viahpakao pathaihpa cha a khu aw ta, a sapa khu nawpa ta poh ri dipa chaopasypa cha a pasy aw ta, poh ri dipa chaisaihna ta a saih aw ta, poh ri dipa lakhu a khu awpa a châ; hezy he chysia pathaihpa châ ta. Ti liata a ngai a si tua aw ta, â ky awpa a châ.

⁵ Chatawhcha Izarel pathlazy zawpi sahlao tawhta mie tôhpa pô no moleina hlâna nata raopa hlâna châta mietahkupa tôhpa pô kha la aw ta.

⁶ Chatawhcha Arawna chata ano châ tlaita moleina hlâna viahchao tôhpa cha hlâ aw ta, ano nata a chhôhkhazy châta aryhna a tao aw.

⁷ Mie pô no a chhi aw ta, ahmaohpakhyna poh-o chhikao liata ABEIPA hmiakô liata soh aw ta.

⁸ Arawna chata mie pô no kyh liana chata pachao aw ta, pô kha ABEIPA châta châ aw ta, pô kha cha Azazel* châta châ aw ta.

⁹ Arawna chata ABEIPA châta a tlupa mie cha la aw ta, moleina hlâna châta hlâ aw ta.

¹⁰ Azazel châta tlupa mie deikua cha, aryhna taona châta Azazel chata râhpathohpa liata pathlie awpata ABEIPA hmiakô liata a hrohpa ta a soh aw.

¹¹ Arawna chata ano châta moleina hlâna viahchao tôhpa la aw ta, ano nata a chhôhkhazy châta aryhna tao aw ta; ano chata moleina hlâna viahchao tôhpa thie aw ta.

¹² Chatawhcha ABEIPA hmiakô liata maisâh tawhtapa mei lana mei-ia ta a biepa la aw ta, rohpahâhpa pahâh ngaitapa a dipa ta phypa pazah kha chhaota, pohraipa chhôh liata a ngiakhei aw ta,

¹³ rohpahâhpa khuh chata bie pahnosana chô liata zawgiahna dyuchhai cha a pahly nawpa ta, ABEIPA hmiakô liata mei liata rohpahâhpa cha a mia aw, thina â tyh lei nawpata.

¹⁴ chatawhcha viahchao tôhpa thisaih khazie tlyma cha la aw ta, a kudy ta zawngiahna dyuchhai nochhi lâchhâ cha hie aw ta, a kudy ta zawngiahna dyuchhai hmiakô liata thisaih chata ei sari a hie awpa a châ.

¹⁵ Chatawhcha zawpi cha moleina hlâna mie cha thie aw ta, a thisaih cha pohraipa chhôh lâta a ngiakhei aw ta, a thisaih cha viahchao tôhpa thisaih a taopa hawhna khata tao aw ta, zawngiahna dyuchhai nata zawngiahna dyuchhai hmiakô cha a he aw.

¹⁶ Izarel pathlazy pathaih leinazy vâta nata ama paraonazy, ama moleina zydua vâta su pathaihpa châta aryhna a tao aw, cha hawhna hra chata ama pathaih leinazy hry liata a ypa ahmaohpakhyna poh-o châta chhao a tao hra awpa a châ.

¹⁷ Su pathaihpa liata aryhna tao awpa ta â ngia nona chata, ano nata a chhôhkhazy nata Izarel zawpi sahlao châta aryhna a tao khai nahta a vaw pua heih hlâ lei cha ahyrai ahmaohpakhyna poh-o chhôh liana chata ama y awpa châ vei.

¹⁸ ABEIPA hmiakô liata maisâh lâna chata pua aw ta, chatanachata aryhna tao aw ta, viahchao tôhpa thisaih nata mie thisaih khazie tlyma cha la aw ta, maisâh kizy liata â dôna taih a hnia aw.

¹⁹ Chatawhcha a kudy ta ei sari hie aw ta, pathai aw ta, Izarel pathlazy pathaih leinazy tawhtapa cha a pathai aw.

²⁰ Chatawhcha su pathaihpa nata ahmaohpakhyna poh-o nata maisâh châta aryhna a tao khai nahta mie hropa cha hlâ aw ta; Arawna châta mie hropa luh chô liana chata a ku karâ no pahnieh aw ta, a chô liata Izarel pathlazy paraona zydua, ama tao pasina zydua, ama moleina zydua taihta reih aw ta; chazy cha mie luh chô liana chata pahnie aw ta, chyhsa pakha ama raopa khata, râhpathohpa lâta â chhi syulyu aw.

²² Mie chata ama paraona zydua cha pahrâ leipa râh lâta phaoh aw ta, mie cha râhpathohpa liana chata a pathlie awpa a châ.

²³ Chatawhcha Arawna cha ahmaohpakhyna poh-o liana chata a ngia aw ta, su pathaihpa liata â ngia nota poh dipa chysia a taopa cha pahluh aw ta, cha liana chata siesai aw ta.

²⁴ su pathaihpa liata ti liata a ngai a si aw ta, a chysia a tao aw ta, vaw pua aw ta, ano chata raopa hlâna nata zawpi châta raopa hlâna cha hlâ aw ta, ano nata zawpi châta aryhna a tao aw.

²⁵ Chatawhcha moleina hlâna thaw cha maisâh liata a rao aw.

²⁶ Azazel châta mie a pathlietuhpa chata a poh pasu aw ta, ti liata a ngai a si aw ta, cha khai tawhna chata ariena su lâta a di heih awpa a châ.

²⁷ Moleina hlâna viahchao tôhpa nata moleina hlâna mie thisaih aryhna taona châta su pathaihpa lâta amâ ngiakheipa cha, ariena su khôtho lâta siekhei awpa châ aw ta, a vo zy, a sapa zy, a ie zy cha mei liata ama rao awpa a châ.

²⁸ A raotuhpa chata a poh pasu aw ta, ti liata a ngai a si aw ta, cha khai tawhna chata ariena su lâta a di heih awpa a châ.

²⁹ He he nama chhâzaw ryhpa awpah châ aw ta, thla sarina, cha thla, noh hrawh noh liana chata, nama palôhrupa zy rie pathei aw eichi ta, nama râh liata chyhsa tlyma, râh hropa chyhsa nama hryta a pahrâpa tlyma chata, rai khâpahmah ama hria awpa châ vei.

³⁰ he noh liana heta nama pathaisa nawpata nama châta aryhna taopa a châ aw; ABEIPA hmiakô liata nama moleina zydua tawhtapa nama pathai aw.

³¹ Nama châta a pahâ molona noh a châ, nama palôhrupazy rie pathei aw eichi ta, chhâzaw ryhpa awpa a châ.

³² Chatawhcha theihthaipa a paw vyuhpa ta theihthaipa châ awpa ta sathaw thu awpa nata panano awpa châta aryhna tao aw ta, poh ri dipa chysia, chysia pathaihpa cha a ky aw ta.

³³ su pathaihpa châta aryhna tao aw ta, ahmaohpakhyna poh-o nata maisâh châta a ryhna tao hra aw ta, theihthaipazy nata zawpi sahlao châta aryhna a tao aw.

³⁴ Ama moleina zydua vâta kô chareih, ei kha, Izarel pathlazy châta aryhna taopa he, nama chhâzaw ryhpa awpa a châ,” tah ta. Chatanachata ABEIPA ta Mawsi bie a piepa hawhta tao ta.