Zawhana 19

¹ Cha nona chata Pila ta Zisu a chhi ta, chhei ta."

² Chatawhcha pheisaihzy chata hloh lakho tao ei ta, pakho ei ta, poh sailawpa pabusa hra ei ta;

³ a kiapâh lâ a vy ei ta, “Zuzy Beipa y, eima châ naoh na!” tah ei ta, chabaih ei ta.

⁴ Pila cha pua heih ta ama hnohta “Moh teh u, khâpahma a moleina hmô va na tahpa nama pahno nawpa ta nâmo lâ ei vaw chhi hih,” tah ta.

⁵ Zisu cha hloh lakho nata poh sailawpa cha a buna chôta vaw pua ta. Pila ta ama hnohta, “Moh teh u, chyhsa hih!” tah ta.

⁶ Theihthaipa abeizy nata hyutuhpazy chata ano ama hmôpa ta nahta, awh ei ta, “Kraws liata khaipâ teh, kraws liata khaipâ teh!” tah ei ta. Pila ta ama hnohta, “Nâmo ta siekhei ula, kraws liata khaipâ teh u, kei la khâpahma a moleina hmô va na,” tah ta.

⁷ Zuzy chata a hnohta, “Eima ryhpa kyh kha a y, cha ryhpa lymâ hawhta Khazohpa Sawchapawpa ta a taopa vâta a thi awpa a châ,” tah ei ta a chhy ei ta.

⁸ Pila ta cha bie a thei nahta chi pachai ta;

⁹ a o lâ a ngia heih ta Zisu hnohta, “Khataih lâta chyhsa ma na châ?” tah ta. Châhrasala Zisu ta a chhy vei.

¹⁰ Pila ta a hnohta, “Nâma ta kei na chho aw va chi mâ? Cha pathlie theipa ei châ, kraws liata cha khaipâ theipa ei châ tahpa pahno va chi mâ?” tah ta.

¹¹ Zisu ta, “Chôlâ tawhta piepa na châ vei khiahtala, ei chô liana heta tao theipa rai hnei aw va chi; chavâta nâ lâta na pietuhpa khata a molei via,” tah ta.

¹² Cha rakha tawhna cha Pila ta pathlie a chhuah ta, châhrasala Zuzy ta awh ei ta, “He chyhsa he na pathlie khiahtala Kaisara viasa châ aw va chi; ahyrai anosasy ta abei ta a taopa maih Kaisara adyuhpa ama châ,” tah ei ta.

¹³ Pila ta cha bizy cha a theipa ta nahta Zisu a chhi ta, a mo Lôparaipa, Hebrai rei deikua cha Kabatha ama tah, cha su liana chata ryureina dyuchhai liata a tyuh ta.

¹⁴ Chatawhcha cha noh cha Zawpakhô kyhchhi pachynoh châ ta; my pati nie daihti no a châ. Pila chata Zuzy hnohta, “Moh teh u, nama Beipa hih!” tah ta.

¹⁵ Âmo cha aw ei ta, “Pahleipadia teh, pahleipadia teh, kraws liata khaipâ teh!” tah ei ta. Pila ta ama hnohta, “Nama Beipa he kraws liata ei khaipâ aw ma?” tah ta. Theihthaipa abeizy ta, “Kaisara leipa ta cha abei hropa hnei ma pi,” tah ei ta a chhy ei ta.

¹⁶ Chatanachata Pila ta kraws liata khaipâ awpa ta ano cha ama hnohta pie ha ta.

¹⁷ Chatanachata Zisu cha a chhi ha ei ta, anosasy chata kraws a pupa ta luhru su ama tahpa, Hebrai reih ta Kôlkôtha ama tahpa cha, cha su taihna chata pua ta.

¹⁸ Cha liana chata kraws liata khaipâ ei ta, mo hropa pano chhao, a kâ lâta pakha rairieh ta, a lialiah liata Zisu.

¹⁹ Pila ta châ roh ta, kraws pawhmao liata bai ta, “Nazari Zisu, Zuzy Beipa,” tahpa ta ropa a châ.

²⁰ Cha cha Zuzy thokha a hluhpi ta reih ei ta, Zisu kraws liata ama khaipâna su cha khihpi kiapâh châ ta; Hebrai reih ta zy, Rawma reih ta zy, Krika reih ta zy ropa châ tlôh ta.

²¹ Zuzy theihthaipa abeizy chata Pila hnohta, “Zuzy Beipa,’ tahpa ta roh khâ, ‘Zuzy Beipa ei châ a tah,’ tahpa ta tlao roh teh,” tah ei ta.

²² Pila ta, “Ei ropa kha ei roh khai haw,” tah ta a chhy ta.

²³ Pheisaihzy ta Zisu cha kraws liata ama khaipâ khai nahta, a chysiazy la ei ta, su palih ta pachhaih ei ta, pheisaihzy ta su kha sai to ei ta; a viahpakao la hra ei ta. Viahpakao cha bieh leipa viapakao châ ta, a rao tawhta a pôhpa dua ta sapa a châ;

²⁴ chavâta âmo chata, “Hrie kha ei suh u, ahy chata ma tlao pachao ei suh u,” a tah chyu ei ta, Khazohpa cha bi ta,“Ei chysiazy a rai ei ta,ei viapakao châta pachao ei ta,” tahpa a tlô thei nawpa ta, cha hmozy cha pheisaihzy ta tao ei ta.

²⁵ Zisu kraws kiapâh liata a nô nata a nô narônô, Mari Klôpa lahpinô nata Mari Madali a duah ei ta.

²⁶ Zisu ta a nô nata pachupa kyh a pachâpa kha a kiapâh liata a duahpa hmô ta, a nô hnohta, “Ei nâ, moh tua, na sawchapawpa khaw!” tah ta.

²⁷ Chatawhcha pachupa hnohta chata, “Moh tua, na nô khaw!” tah ta. Cha rakha tawhna cha cha pachupa chata ano o lâta a nô cha a chhi ha ta.

²⁸ Cha tawhna chata Zisu ta hmo ato atahmâ â ki haw, tahpa pahno ta, Khazohpa châ bie kha a tlô nawpa ta, “Ei dâh na a phi,” tah ta.

²⁹ Cha liana chata beih miakha kresawti thaopa ta a biepa patyu ei ta; chatanachata sponge miakha cha kresawti thaopa liata nypa ta hisaw chôchahrei liata patao ei ta, a hmao papha ei ta.

³⁰ Zisu ta kresawti thaopa cha a do khai nahta, “A tlo haw,” tah ta; chatawhcha a luh a kô ta, a thlahpa pathlie ha ta.

³¹ Pachynoh a châpa vâta a rizy cha pahânoh ta kraws liata a y thlâh ha lei nawpa ta, (cha pahânoh cha noh rônahpa châ tlôh ta). Zuzy ta Pila hnohta ama pheizy thliepa ta, ama ri siekhei awpa ta a haw ei ta.

³² Chatawhcha pheisaihzy cha a vy ei ta, a hnohta kraws liata ama khaipâpa tytuapa nata mo pakha cha ama pheizy thlie ei ta:

³³ châhrasala Zisu kiapâh lâ a vy ei ta, a thi hawpa pahno ei ta, a pheizy thlie leipa ei ta.

³⁴ Châhrasala pheisaihzy hry liatahpa pakha ta a kâ liata a sei ta a chô ta, chatanachata thisaih nata ti vaw pua pâ ha ta.

³⁵ A hmôtuhpa chata a pahnosa haw, a bie pahnosapa â do, a reipa â do tahpa anosasyh ta a pahno, nâmo chhaota namâ ngiapâ nawpa ta.

³⁶ Khazohpa châ bie, “A ru miakha hmah thliepa châ aw vei,” tahpa tlô nawpa ta cha hmozy cha a vaw y haw.

³⁷ Chatawhcha Khazohpa châ bie hropa ta, “Amâ chôpa cha ama moh aw,” tah hra ta.

³⁸ Cha hmozy hnôh lâna chata Zawsi Arimathai khihpa Zisu pachupa cha ta, châhrasala Zuzy a chipa vâta a ru lâta a ypa châ ta, ano chata Zisu ri cha la awpa ta Pila liata hiah ta, Pila ta pasaih ta. Chatanachata a vy ta a ri cha la ha ta.

³⁹ Nikadima, cha hlâta zâ ta ano lâta a vypa kha, myr nata alôs a pahlao chiehpa khô sypangawh vaw cheipa ta, a vy hra ta.

⁴⁰ Zisu ri cha la ei ta, Zuzy pabunazie hawhta khâpaleipa ropahâhpazy chhaota poh rih dipa ta pahly ei ta.

⁴¹ Chatawhcha kraws liata ama khaipâna su liana chata sahdô miakha y ta, sahdô liana chata ahyhma pazia beih leina thlâ thiehpa miakha a y.

⁴² Chatawhcha Zuzy Pachynoh a châpa vâta thlâ cha ama kiapâh ta liata châ tlôh ta, cha liana chata Zisu cha pazia ha ei ta.;