Zeremiah 51

¹ ABEIPA chata he tana heta a tah: “Babylaw chô liata nata Kaldia liata a pahrâpazy chô liata paraotuhpa thlihpi ei tuah aw na;

² a zituhpazy ei tuah aw, Babylaw chô liata ano zipa ta, a khihnarâh ama zi pasia aw, vâchhiena noh liana chata chadôpa ta siehnao tlôh aw ei ta.

³ Libaw a hmâhtuhpa ta libaw a kei leipa ta, thua viahpakao a kypa ta a duah rai a duah kha se. A satlia sahlao pakha hmah pahlôh leipa ta, a pheisaih zydua liahsa pahleipadia khai teh u.

⁴ Kaldia râh liata thiepa ta pao aw ei ta, a othliahzy liana chata a chôsaopa ta ama châ aw.

⁵ Izarel nata Zudah cha ama Khazohpa, Pheisaihzy ABEIPA chata siesai tlôh lei khâh ta; ama râh cha Izarel Mo pathaihpa chô liata moleina ta a bie tarawpa ta.

⁶ “Babylaw khih chhôh tawhta a râ ula, chyhsa to ta ama hrona pachha mawh sy! A hmoparaona vâta leidia khah u,ABEIPA phulana daihti cha tlô ta, ano chata viari a thô tlai aw na.

⁷ Babylaw cha ABEIPA ku liata ngôh ryu, alei zydua pariesana châ ta; phopizy ta a kresawti cha doh ei ta, chavâta phopizy cha ama hru khai haw.

⁸ Babylaw cha sôkha ta pao ta, a leidia haw; ano cha thata chakhei teh u! Patlâh thei awpa a châpa khiahtala, thohna hniapa la pâ teh u.

⁹ Babylaw cha patlâh a chhuah pi ta, tlâh hlei tlôh va. Ano siesaipa ta, eima râh chyu lâta sie ei suh u, a thaileina ta avâ pha ta avâ taihta chalopa a châ.

¹⁰ ABEIPA chata eima siana a phuah haw; a vy teh u, Zaio liata phuah ei suh u, ABEIPA eima Khazohpa hmotaopa cha.

¹¹ “Châtaizy cha patiah ula! Vyhphao zy patu teh u! Mede abei palôhrupa cha ABEIPA ta a pathyu haw, a hmo a chhuahpa cha Babylaw parao awpa kyh châ tlôh ta, cha cha ABEIPA phuh lana noh tlô ta, achhyna-o phuh lana tlai cha.

¹² Babylaw kuh pâhchhôzy liata pahnona chaluah teh u, vaihna tha patlôpa ta; Babylaw chyhsazy kyh liata ABEIPA ta a reipa kha, a chhuahdy ta, tao khai haw tlôh ta.

¹³ Hy, na ti hluhpi liata a pahrâpa, sôh nata piah a hnei ngaita tuhpa y, na chhâna cha a tlô haw, na hrona ri a chie haw na.

¹⁴ Pheisaihzy ABEIPA chata ano moh areipa ta chhie sa ta: Khawsu hawh tlaita chyhsapa ta ei cha pabie tlai aw,thata ei cha rahao chie.

¹⁵ “A hmotaotheina ta alei tao ta, a sona ta khizaw padua ta, a novâhna ta avâ parai ta.

¹⁶ A ao a papua nota avâ liata ti paro ngâpa ta, kaoki tawhtapa meihdo pakiasa ta, vâsua châta dôhla pathlisa ta,a ryubyh tawhtapa thlih pathlisa ta.

¹⁷ Chyhsa to ama hru, pahnona leipa ta; ngôh a daihtuhpa to a khazoh nohthlahpa daipa cha pakei ta; a khazoh nohthlahpa leipa cha haipa dei châ tlôh ta,âmo liata hu chhao y vei.

¹⁸ Khâpa hrao leipa dei ama châ, dôna hriana dei; ama hriena daihti liata ama lei aw.

¹⁹ Zakaw tovyu cha he hawhta châ vei, hmo zydua thabypa châ tlôh ta, Izarel he a ryutopa pho châ ta; a moh cha Pheisaihzy ABEIPA a châ.

²⁰ “Nâ cha ei dyuhna ahrei nata chaihrai châ tyh chi ta; nâma hmâpa ta phopizy cha paraona ta; nâma hmâpa ta khihnarâh zy cha pahleipadia na ta;

²¹ nâma hmâpa ta arâ nata a kiahtuhpa parao na ta; nâma hmâpa ta talaili nata a chô liata a kiahpa parao na ta;

²² nâma hmâpa ta chapaw nata chanô parao na ta; nâma hmâpa ta pawpipa nata satliapa parao na ta; nâma hmâpa ta satliapa nata laihsa parao na ta;

²³ nâma hmâpa ta mietahkuvaihtuhpa nata mietahkupa zaw parao na ta; nâma hmâpa ta lyu a hneituhpa nata viahchao tôhpa bao parao na ta; nâma hmâpa ta râh a vaotuhpazy nata a baotuhpazy ei parao tyhpa kha.

²⁴ “Nâma mohmô lia tlaita Zaio chôta ama hmopha leipa a taopa zydua cha Babylaw nata Kaldia mozy chô liata viari ei thô aw, ABEIPA ta a tah.

²⁵ “Hy paraotuhpa tlâh laipa y, alei zydua a paraotuhpa; nâ ei châ dyuh na, ABEIPA ta a tah, na chô liata ei ku hmâh aw na ta, lôkâh sâhpa tawhta ei cha pahluah aw, tlâh kâ chiehpa hawhta ei cha tao aw.

²⁶ A ki châta nâ tawhta a ki alô awpah nata alô bôna awpa lapa châ khao aw vei, chhâzaw ta roryhrapa ta tlao na y aw, ABEIPA ta a tah.

²⁷ “Cha râh liata pahnosana chaluah ula, phopizy hry liata chiahmie tô teh u; ano adyuh awpa phopizy palôh patlâh ula, Ararat zy, Mini zy, Askena râhzy ano adyuh awpa ta pakhy teh u; ano adyuh awpa ta pheisaih rao ula, khawsu hawh tlaita arâzy pakhy teh u.

²⁸ Ano adyuh awpa ta phopizy patohpatia teh u, Mede bei, a vaotuhpazy nata a baotuhpazy, a biehneina râh zydua chhaota.

²⁹ Cha râh cha pasa taopa ta a chalyu, Babylaw râh a pahrâtuhpa y leipa ta rory pahrâsa awpa ta, Babylaw chô liata ABEIPA hmo achhuahpa cha a y thlâh haw.

³⁰ Babylaw riahphapazy cha adyuh khoh leipa ta y ei ta, ama kuh liata ama y thlâh haw; ama riahphana dia ta, chanô hawh tlaita ama vaw châ haw; pahrâna suzy kâ khai haw ta, a pakhâna thuatlai a tlie.

³¹ Zikyu a râpa chata mo hropa chhao a ty ta, chyhsa tuapa chata mo hropa chhao a ty hra ta, Babylaw beipa hnohta a khihpi cha su to liata lapa ta a ypa chhopa ta;

³² Chavah chakânazy cha dô ei ta, liaryhzy rao ei ta, adyuhpa chyhsazy chhao thlahhuapa ta ama y haw.

³³ Pheisaihzy ABEIPA, Izarel Khazohpa chata he tana heta a tah: Babylaw sawchanô cha sawhri tly haipa hawhta châ ta; bohpi leipa ta sâh tlyna daihti a chô liata a vaw tlô aw.”

³⁴ “Babylaw beipa Nebukareza ta na nie khai ta, na cha-eih pazao ta; beih ruapa hawhta eina tao haw, parihpi hawhta eina palâ haw; ei hmo pahâpazy ta a py pabie ta, na thy haw heih ta.

³⁵ Kei nata ei sapa chô liata thachahra ta hmotaopa he, “Babylaw chô liata y mawh sy. “Zaio liata a pahrâtuhpazy ta ama tah aw. “Ei thisaih cha Kaldia mo chô liata y mawh sy, “Zerusale ta a tah aw.

³⁶ Chavâta ABEIPA ta he tana heta a tah: “Pachâ teh, na chhâh châ aw na ta, na phuh ei cha lapa aw. Atilaipi pakua aw na ta, a tihnawh ei pachawhkarai aw;

³⁷ chatawhcha Babylaw cha a chhiepa sopakhyna, sihâ pahrâna su, noâhpa nata naih bei chiepa, pahrâtuhpa y leipa ta a vaw châ aw.

³⁸ “Hmaohkha ta a rôh aw ei ta, chakeibarôhneipa dawpa hawhta sâh aw ei ta, chakeibarôhneipa taw hawhta.

³⁹ Paripa ta palôh laipa ta ama y tita kyhchhi tao pâ aw na ta, nohkhi pahno leipa ta ei pariesa aw, a thei chachei leipa ta amâ mô pathlah theina awpa ta, ABEIPA ta a tah.

⁴⁰ Mietahkupa taw thi awpa hawhta ei chhi aw, mietahkupa tôhpazy, mie tôhpazy hawh tlaita.

⁴¹ “Babylaw cha lapa a châ haw cha zaw,alei zydua palyupalih tyhpa patupa ta a y haw hih! Phopizy hry liata Babylaw roryhrapa ta a y haw cha zaw!

⁴² Babylaw cha tilaipi ta a vao haw; a chalâparâpa ru ngaitapa ta a khu khai haw.

⁴³ Ano khihpizy cha rory hra khai haw ta, râh chawhkaraipa, râhpathohpa, chyhsapa rai pahrâ leina, chyhsapa saw ahy hmah ta ama chapia leipa râh lâta a vaw lie haw.

⁴⁴ Babylaw liata Bel cha ei hrie aw, a pala chiehpa cha a pakah tawhta ei thaoh aw. Phopizy a hnohta hmaohkha ta sie khao aw veih ei; Babylaw kuh cha a cho aw.

⁴⁵ “Ei chyhsazy saih u, a chhôh tawhta papua ula! ABEIPA hiehâhna chichhih ngaitapa tawhtapa chyhsa to âmo a pachha mawh sy!

⁴⁶ Nama pathipalôh panao khah sala, cha râh liata bie pathâhpa cha chi hra khah u, kô khata bie pathâhpa vaw tlô aw ta, kô hropa liata vaw tlô heih tlôh aw ta, ryureituhpa nata ryureituhpa râh liata adyuhpa ta a y aw.

⁴⁷ “Chavâta nohzy a vaw tlô na, Babylaw khazoh nohthlapa daipazy chô liata pachia na ta; a râh zydua nozana awpa noh cha, a chhôh liata a chyhsa thiehpazy cha ama pao aw.

⁴⁸ Chatanachata avâ nata alei nata a chhôh liata a ypa zydua ta, Babylaw chata thaphapa ta sâh awh ei ta; maw lâ tawhta hraotuhpazy a hnohta ama vaw tlô aw, ABEIPA ta a tah.

⁴⁹ Babylaw cha a pao aw, râh to chyhsa a thiepa vâta nata Izarel chyhsa hluhpi a thiepa vâta.

⁵⁰ “Nâmo zaozi a khôkhâhtuhpazy saih u, sie ula, a duah thlâh ha khah u! Lâhlapi tawhta ABEIPA a thei thlâh ha ula, nama pathipalôh liata Zerusale angia mawh sy:

⁵¹ ‘Reipachhiena bie eima theipa vâta nozapa ta y pi ta; eima hmia a chhie khai haw, ABEIPA o liata su pathaihpa lianazy chata khichhaipa chyhsazy vaw tlo ei ta.’

⁵² “Chavâta nohzy a vaw tlô aw, ABEIPA ta a tah, ama khazoh nohthlahpa daipazy chô liata ei pachiana awpa nata a râh zydua chô liata hmah a phaohpa zy a rôhnah awpa cha.

⁵³ Babylaw cha avâ taih pha hra sala, a kuh sâhpazy pa-i hra sala,a chô liata kei tawhtapa paraotuhpa cha ama vaw tlô thlyu aw, ABEIPA ta a tah.

⁵⁴ “Babylaw tawhta chapa pyu nata Kaldia râh tawhta pahleipadiana ru ngaitapa pyu cha!

⁵⁵ ABEIPA ta Babylaw cha hrao ta, ama pyu ru ngaitapa tlai cha padiasa ta. Ama pyuzy cha ti hluhpi paro ngâpa hawhta,ama pyu cha pasâhsa ei ta;

⁵⁶ a chô liata hraotuhpa a vaw tlô, Babylaw chô liana tlaita; a chyhsa thatlôpazy patupa ta y ei ta, ama libawzy a tlie haw; ABEIPA cha viarithôna Khazohpa châ tlôh ta, viari a thô thlyu aw.

⁵⁷ Chatawhcha abei sawzy nata a chyhsa sopazy nata, a vaotuhpazy nata a baotuhpazy nata chyhsa thatlôpazy ei pariesa aw; â mo palâ aw ei ta, a hra aw veih ei, Abeichaipa, a moh Pheisaihzy ABEIPA ta a tah.

⁵⁸ Pheisaihzy ABEIPA chata he tana heta a tah: Babylaw kuh pâhchhô chha ngaitapazy cha cho khai aw ta, a chhikao sâh ngaitapazy cha a kâ khai aw. A chyhsazy chata a saipa ta hria ei ta, phopizy chata mei châta deita ama rie ama pathei,” tahpa ta.

⁵⁹ Zudah beipa Zedekiah a ryureina kô palihpa liata Babylaw lâta a siekhei no ta, a hnohta a sie hrapa Maasei sawchapawpa Seraiah, Neriah sawchapawpa hnohta biepiepa cha. Seraiah cha abei o chhôh hyutuh chaipa châ ta.

⁶⁰ Zeremiah chata Babylaw chôta vâchhiena a tlô awpa zydua, Babylaw kyh liata he bie zydua he châbu liata roh ta.

⁶¹ Chatawhcha Zeremiah chata Seraiah hnohta: “Babylaw na tlô tina chata, he bie zydua he reih tlai la,

⁶² ‘Hy ABEIPA y, he phopi kyh liana heta ahy hmah chyhsa nata sa chhao pahrâ lei awpa ta chhawh pathlahpa ta chhâzaw ta rory hrapa ta tlao y awpa ta bie reih haw chi ta,’ tah mah y.

⁶³ He châbu he na rei khai nahta alô nata chahry pâpata Euphrate chavah liata thy la,

⁶⁴ ‘Babylaw cha he hawhna heta a pamôh aw ta, a chô liata vâchhiena ei patlôsa awpa vâta thyu khao aw vei, riethei ngaitapa ta ama y aw,’ tahpa ta na rei awpa a châ,” tah ta. He via he Zeremiah bie cha a châ.