Athaona 34

¹ Chatawhcha Liah sawchanônô Dina, Zakaw a sa papa cha, cha râh laihsazy hmô awpa ta charei ta;

² Hivi mo Hamôra, cha râh abei sawchapawpa Sekhe chata ano cha vaw hmô ta, patu ta, a ziakhei ta, panawhsa haw ta.

³ Chatawhcha a palôhrupa cha Zakaw sawchanô Dina chô liana chata khâchâ y ta; cha laihsa cha a kyhpachâ ta, ano cha reikah pha ngaitapa ta bie a chho ta.

⁴ Chatawhcha Sekhe chata a paw Hamôra cha chho ta, “Cha laihsa cha lahpinô châta na hiapa mah y,” tah ta.

⁵ Zakaw chata a sawchanônô Dina cha Sekhe ta a papuapalei tahpa vaw pahno ta; a sawchapawpazy cha sibiepa su liata a sahroh hry liata y ei ta, amâ vy hlâ lei cha Zakaw cha a thlih thlâh ha ta.

⁶ Sekhe paw Hamôra cha Zakaw bie a chho awpa ta a hnohta vawh ta.

⁷ Zakaw sawchapawpazy chata ama pahno pata nahta sibiepa su tawhna chata vaw tlô ei ta; chatawhcha Zakaw sawchanônô a ziakheipa ta Izarel ahlao hry liata hmo molei ngaitapa, hmo tao chachei lei awpa cha, a tao hawpa vâta ama pachârôh ta, ama hiehâh ngaita ta.

⁸ Châhrasala Hamôra chata âmo bie chho ta, “Ei sawchapawpa Sekhe palôhrupa cha, nama sawchanônô chô liata khâchâ y ta; ngiachhiepa ta lahpinô châta pahneisa muh vy.

⁹ A hnei rairieh ei suh u; nama sawchanôzy maniah pahneisa ula, eima sawchanôzy chhao hnei hra teh u.

¹⁰ Eima hnohta y aw ei chi ta; lyurâhpa chhao he a kawpi a y thlâh ha aw; hezy liana heta ypa ta sôh daoh ula, hezy liana heta a pa-i teh u,” tah ta.

¹¹ Sekhe chata laihsa paw nata a rilâhpazy hnohta, “Na ngiachhie teh u, ei hnohta nama reipa maih, ei cha pie aw ei.

¹² Mâ nata hmo piepa cha, khazie rai haw ula nama reipa lymâ hawhta ei cha pie aw ei; khâparai châ sala laihsa cha lahpinô ta na pahneisa teh u,” tah ta.

¹³ Zakaw sawchapawpazy chata, ama sietanô Dina cha a papuapaleipa vâta Sekhe nata a paw Hamôra cha dôveipa ta a chhy ei ta.

¹⁴ Ama hnohta, “He chopawtai leipa chyhsa, eima sietanô piepa he, tao thei ma pi; cha cha eima châta mohchhiena awpa châ tlôh ta.

¹⁵ He hawhta bie namâ taih khiahta deikua cha, nama bie hawhna cha eima paryhsa aw; nama hry liata chapaw maihta chopawtaipa ta keimo hawhta y ula.

¹⁶ Chatanachata eima sawchanôzy cha pahneisa aw pi ta, keimo chhaota nama sawchanôzy hnei hra aw pi ta, nama hnohta y aw pi ta, chi kha eima châ aw.

¹⁷ Châhrasala chopawtai kyh liata eima bie nama zyh leipa khiahtala eima sawchanô cha a chhi aw pi ta, eima sie thlâh ha aw,” tah ei ta.

¹⁸ Ama bie chata Hamôra nata Hamôra sawchapawpa Sekhe cha palysa ta.

¹⁹ Chatanachata satliapa chata Zakaw sawchanônô cha a khoh kawpa vâta, cha hmo cha hawh leipa ta tao haw ta. Ano cha a paw chhôhkha zydua hry liatahpa za chaipa châ ta.

²⁰ Chatawhcha Hamôra nata a sawchapawpa Sekhe chata ama khih kuh ochhi châ tlôh ei ta, ama khih mozy cha bie a chho ei ta.

²¹ Hao chyhsazy hao maniah a ryh ngaitapa ta y ei ta; chavâta he râh liana heta ypa ta hezy liana heta sôhdao mawh sy, ama châta chhao lyurâhpa he kawh kaw tlôh ta; ama sawchanôzy hao lahpinô ta zy hnei ei sihla, eima sawchanôzy chhao pahneisa hra ei suh u.

²² Chi kha eima châ nawpa ta eima hnohta ypa cha, he hawhta bie eimâ taih khiahta deikua cha: hao chyhsa haota â ryh maniah ama tahkhei aw: chopawtaipa ama châpa hawhta eima hry liata chapaw maihta cha chopawtaipa vaw châ hra ei sihla.

²³ Ama sahrohzy, ama sôhzy, ama sâh zydua zy, keimo eih châ khai aw vei mâ? Ama bie he â ryh tahkhei ei suh u, eima hnohta ama pahrâ aw,” tah ei ta.

²⁴ Hamôra nata a sawchapawpa Sekhe bie cha a khih kuh ochhi liata apuapa zydua chata zyh ei ta, a khih kuh ochhi liata a puapa zydua chapaw maih chata chopaw pataisa khai ei ta.

²⁵ A noh thôh noh liata ama pasa locho ta, Zakaw sawchapawpazy hry liatahpa pano, Dina rilâhpa Simeôna nata Livai chata ama zaozi chaba rairiehpa ta a ru lâta khih cha a dyuh ei ta, chapaw zydua cha thie khai haw ei ta.

²⁶ Hamôra nata a sawchapawpa Sekhe cha zaozi tiahpa ta thie ei ta, Sekhe o tawhtahpa Dina cha a chhi ei ta, pua haw ei ta.

²⁷ Zakaw sawchapawpazy chata ama chyhsa thiepazy cha kei pachhai ei ta, ama sietanô ama papuapaleipa vâta khih cha hrao ei ta.

²⁸ Ama mietahkupa zawzy, ama viahchao zawzy, ama alâzy, ama khih liata hmo a ypazy, ama lyu liata hmo a ypazy cha lapa ei ta.

²⁹ ama sôh zydua nata ama sawnah chyhpatazy nata ama lahpinô zydua, ochhôh liata a ypa maih cha patu ei ta, hrao hrâ ei ta.

³⁰ Zakaw ta Simeôna nata Livai hnohta, “Nâmo ta he râh liata a ypazy hry liata, Kana mo nata Pereza mozy hry liana heta, maniah pahaosapa ta, nôpopa ta maniah nama paysa; ei sahlao chyh tlôh ei ta, nâ dyuh awpa ta a pahmaohpakhy aw ei ta, eina thie thlâh ha aw ei, pahleipadiapa ta ei y aw, kei nata ei o chhôhkhapazy chhao heta,” tah ta.

³¹ Âmo chata, “Eima sietanô he sihrypa taopa hawhta na tao awpa a châ mâ?” tah ei ta.