Ezekiel 6

¹ ABEIPA bie cha ei hnohta vaw tlô ta:

² “Chyhsa y, Izarel tlâhzy lâna cha a heih la, ama hnohta chhochhielie la,

³ Izarel tlâhzy saih u, Abeipa KHAZOHPA bie he nahthlie teh u! Abeipa KHAZOHPA chata tlâhzy nata tlâh byupazy hnohta nata saikaozy nata athuhpazy hnohna chata he tana heta a tah: Kei, keima tlai heta nama chô liata zaozi vaw patlôsa aw na ta, nama asâhpa suzy cha ei parao khai aw.

⁴ Nama maisâhzy cha roryhrapa ta y aw ta. Nama noh khazoh nohthlahpazy cha paraopa ta a y aw; nama chyhsa thihpa rizy cha nama khazoh nohthlapazy thaby liata ei thy aw.

⁵ Chatawhcha Izarel pathlazy ri cha ama khazoh nohthlahpa thaby liana zy chata soh aw na ta; nama ryhpazy cha nama maisâhzy kiapâh liana chata ei hie aw.

⁶ Nama pahrâna su zydua liana chata khihpizy cha rao aw ta, asâhpa suzy cha roryhrapa ta a y aw, nama maisâhzy paraopa nata roryhrapa ta a châ thei nawpa nata nama khazoh nohthlahpazy paraopa ta a lei thei nawpa nata nama noh khazoh nohthlahpa cha thlupa ta y thei nawpa ta nama raihriazy cha a leidia thei nawpa ta.

⁷ Chatawhcha chyhsa thipazy cha nama hry liata pao aw ei ta, chatanachata ABEIPA ei châ tahpa nama pahno aw.

⁸ “Anodeikuacha râh to liata nama pai patla tina chata phopizy hry liata zaozi a khôkhâhpazy ama y awpa vâta, thokha cha ei pahlôh aw.

⁹ Chatawhcha nâmo hry tawhta a puapazy chata seichâna ta ama chhiena phopizy hry liana chata nâ thei thlâh ha aw ei ta, amâ pheina pathipalôh ei la hawpa nata ama mokhaoh ama khazoh nohthlahpa lâta a pheipazy cha ei paraopazie zy ama pahno aw; ama pasichhihnazy liata hmo moleipa âmo mohmô tlai liata ama vaw tao hawpa kyh liana zy chata amosasy ta ama pasie aw.

¹⁰ Chatawhcha ABEIPA cha ei châ tahpa pahno aw ei ta; he hmopha leipazy he ama hnohta tao aw na ta, khâpa hrao leipa ta reih va na tahpa ama pahno aw, tahpa ta,” tah ta.

¹¹ Abeipa KHAZOHPA chata he tana heta a tah: “Na ku chabaihpa ta, na phei a tlai la, Aw! he Izarel chhôhkhapazy pasichhihna moleipa vâta; zaozi ta, chakâhna ta, potla ta pao tlôh aw ei ta.

¹² Lâhlapi ta a ypa cha potla ta thi aw ei ta, lâhniata ta a ypa cha zaozi ta pao aw ei ta; a laibâhpa padopa ta a ypazy cha chakâhna ta ama thi hra aw. He hawhna heta ei hiehâh ngaitana cha ama chô liata ei patlôsa aw.

¹³ Chatawhcha tlâh sâhpa liata zy, tlâh laki zydua liata zy nata tho hropa maih ry liata nata oaka thokô buh to ry liata, ama khazoh nohthlahpazy hnohta rohpahâhpa ama hlâna su liata ama maisâh kiapâh ta ama khazoh nohthlahpazy kiapâh liata ama athihpa ri zy a y tina chata kei he ABEIPA ei châ tahpa ama pahno aw.

¹⁴ Chatawhcha ama chô liata ei ku pazawh aw na ta, râhpathohpa tawhta Diblah lâta ama pahrâna su zydua liata râh cha rorypahrasapa ta ei parao aw. Chatanachata kei he ABEIPA ei châ tahpa ama pahno aw,” tahpa ta.