Ezekiel 22

¹ Cha tawhna heih chata ABEIPA bie cha ei hnohta vaw tlô ta:

² Chatawhcha nâ, chyhsa y, thisaih palo a hmâhpa khihpi cha, nâ kho aw ma, nâ kho aw ma? A pasichhihna zydua cha pahnosa teh.

³ Ama hnohna chata Abeipa KHAZOHPA chata he tana heta a tah: Khihpi a daihti vaw tlô nawpa ta a chhôh liata thisaih a palotuhpa nata a papuapalei awpa ta khazoh nohthlahpa a taotuhpa cha!

⁴ Na thisaih palona liana khata thai leina phaoh aw chi ta, na khazoh nohthlahpa taopa liana khata na papuapalei; na daihti pahniasa chi ta, na kôzy tlô daihmâ ta. Chavâta phopizy hnohna chata reipachhiepa ta nata râh zydua eilawna chata ei cha tao haw.

⁵ Na kiapâh liatahpa nata a hlapa ta a ypazy chata ama cha eilaw aw, na moh chhiepa a phaohpa nata tymâna ta a biepa.

⁶ “Izarel abeisawzy, chyhsa to ta, ama hmotaotheina lymâ hawhta thisaih palo awpa ta nâma liata ama y.

⁷ Nâma liana chata chyhsa ta paw nata nôzy nawhtawh ei ta; nâma liana chata khichhaipazy pasaipa-i ei ta; nâma liana chata hârapazy nata nôhmeizy chôta a su leipa ta ama tao.

⁸ Ei hmo pathaipazy nawhtawh chi ta, ei pahânohzy papuapalei chi ta.

⁹ Nâma liana chata thisaih palo awpa ta chyhsa lei a hmâhpa zy y ei ta, nâma liana chata tlâhzy liata a niepawzy y ei ta; nâma liana chata sihryna hmâh ei ta.

¹⁰ Nâma liana chata ama pawzy thluahruana a palâsapa y ei ta; nâma liana chata chanô thaitly vei nota a zialâhpa y ei ta.

¹¹ Chyhsa ta a vaih lahpinô chô liata hmo pasichhihpa tao ta; mo hropa ta sihry ngaitapa ta a myunô papuapalei ta; mo hropa ta nâma liana chata a sietanô, a paw sawchanônô tlai panawhsa ta.

¹² Nâma liana chata thisaih palo awpa ta a ryruna la ei ta; hmâna ty nata a pôhna la chi ta, na vaih cha pasaipa-ipa ta karâ-y ngaitapa ta avyuhpa tyh chi ta; kei tlai chhao he na my chi ta, Abeipa KHAZOHPA ta a tah.

¹³ “Chavâta nâ vyuhna do leipa kyh liata zy, nâma liata thisaih palopa kyh liata zy ku ei cha chabai thlu aw.

¹⁴ Nâma ei cha siehnao nona chata na pathipalôh ta tao theipa ta na ku thatlôpa ta a y thei aw ma? Kei ABEIPA tlai heta reih haw na ta, ei tao hra aw.

¹⁵ Phopizy hry liana chata cha papai aw na ta, râh to liata ei cha pavia visa aw, nâma tawhta na pualeinazy ei patlô khai aw.

¹⁶ Phopizy mohmô liana chata nâsasy ta a papuapaleipa na châ aw, chatanachata ABEIPA cha ei châ tahpa na pahno aw, a tah, tah mah y,” tah ta.

¹⁷ ABEIPA bie cha ei hnohta vaw tlô ta:

¹⁸ “Chyhsa y, Izarel chhôhkhapazy cha kei châta syu-i dei vaw châ haw ei ta; âmo zydua ta patina mei liah liana chata dawh zy, râvâ zy, thua zy, kyh zy châ ei ta, tâkâri syu-i dei ama châ haw.

¹⁹ Chavâta Abeipa KHAZOHPA chata he tana heta a tah: Syu-i dei nama vaw châ hawpa vâta, Zerusale liah liata ei cha pakhy aw ei.

²⁰ Tâkâri zy, dawh zy, thua zy, kyh zy patina mei liata soh ei ta, pati awpa ta a chô liata mei ama hmôpa hawhta; ei hiehâhna nata ei pathi-iana liana chata cha pakhy ei na ta, cha liana chata cha soh aw ei na ta, ei cha pati aw ei.

²¹ Cha pahmaoh aw ei na ta, nama chô liana chata ei hiehâhna mei pati aw na ta, a liah liana chata nama vaw ti khai aw.

²² Patina mei liah liata tâkâri a tipa hawhta, nâmo chhao cha liah liana chata ti khai aw eichi ta; kei ABEIPA heta nama chô liata ei pathi-iana ei leihtha, tahpa nama pahno ha aw,” tah ta.

²³ ABEIPA bie cha ei hnohta vaw tlô ta:

²⁴ “Chyhsa y, a hnohna chata reih la, râh pasi pathai leipa na châ na, ruchhôna noh liata vâsua ti a to leipa.

²⁵ Chakeibarôhneipa ta arôhpa ta a sa a taipa a tluapa hawh tlaita, nâma liana chata hrohsopa teinazy y ta; chyhsa hronazy nie khai ei ta; ryubyhzy nata hmo sôhpazy lapa ei ta; a liah liana chata nôhmei a hluhpi tao ei ta.

²⁶ A theihthaipazy chhaota ei ryhpa bie thata parao ei ta, ei hmo ziehpazy ama papuapalei; hmo ziehpazy nata hmo zawrâpazy rai panano leipa ei ta, chyhsazy hra hmo pathaihpa nata a pathaih leipa pananosa hlei hra vei ei, ei pahânohzy cha mopakhô ei ta, ama hry liana chata moh pachhiepa ta y na ta.

²⁷ A liah liata abeisawzy cha changie zohpa tai awpa a tluapa hawhta châ ei ta, a thisaih palopa ta chyhsa hronazy pahleipa ta a doleipa ta amâ vyuh thei nawpa ta.

²⁸ Chatawhcha a hrohsopazy chata a baina a kiah leipa ta pâhchhô bai ei ta, aluahna khâpa hrao leipa hmô ei ta, haipa ta pachaopa ei ta, ABEIPA ta khâpahmah a rei leipa chhaota, ‘Abeipa KHAZOHPA chata he tana heta a tah,’ tah ei ta.

²⁹ Râh liata chyhsazy chata pasaipa-i hmâh ei ta, hrao hrâ ei ta; sipasapa nata dyhchhiepazy riepatheisa ei ta, a do lei ngaitapa ta khichhaipazy ama pasaipa-i tyh.

³⁰ Râh cha ei pahleipadia lei nawpa ta âmo hry liata diah tao awpa nata râh pachhapa ta ei hmiakô liata adyuh awpa chyhsa tlua na ta, hmô tlôh leipa na ta.

³¹ Chavâta âmo chô liata ei ruchhôna cha leithlu haw na ta; ei hiehâhna ta mei ta ei patlô haw; ama yzie tlai cha ama chô liata ei vaw patlôsa, Abeipa KHAZOHPA ta a tah, tah mah y,” tah ta.