Daniel 3

¹ Abei Nebukaneza chata ngôh nohthlahpa, a sâhna lâ dy sycharu, a phiana lâ dy charu tao ta, Babylaw kao liata Dura bypi liata padua ta.

² Chatawhcha Abei Nebukaneza chata biehneituhpa zy, vyuhpa ta a ytuhpazy, ryureituhpa zy, sôh mokhâhtuhpa zy, a ryhna a raotuhpa zy, ryhpa a pahnopazy nata khihnarâh ryureituhpa zydua cha Abei Nebukaneza nohthlahpa paduapa liata ahmaohpakhyna liata ahlao awpa bie tah ta.

³ Chatawhcha biehneituhpa zy, vyupa ta a ypazy, a vaotuhpa zy, ryureituhpa zy, sôh mokhâhtuhpazy, a ryhna a raotuhpa zy, ryhpa a pahnopa zy nata râh chhôh ryureituhpa zydua cha Abei Nebukaneza nohthlahpa paduana pahmaopakhyna liana chata a vaw pakhy ei ta, Abei Nebukaneza nohthlahpa paduapa hmiakô liana chata a duah chyu ei ta.

⁴ Chatawhcha ao paro ngaitapa ta tlâh-awhpa vaw awh ta, “Hy, chyhsa to saih u, reih to saih u,

⁵ chiahmie zy, ramo zy, totâ zy, tlaipi zy, totâ laipa zy, baza zy nata paropasyupa chi zydua nama thei tita Abei Nebukaneza ngôh nohthlahpa paduapa cha a khupa ta a naoh awpa ta biepiepa nama châ;

⁶ ahyrai a khupa ta a naoh leipa cha, cha nohna tlai chata patina meihô liata thy awpa a châ aw,” tahpa ta.

⁷ Chavâta cha noh liata zawpi zydua ta chiahmie zy, ramo zy, totâ zy, tlaipi zy, totâ laipa zy nata paropasyu theipa zydua ama thei nata chyhsa tozy, pho tozy, reih to zydua chata Abei Nebukaneza ngôh nohthlahpa paduapa cha a khupa ta a naoh ei ta.

⁸ Cha nona chata Kaldia chyhsa thokhazy a vaw hnia ei ta, Zu chyhsazy cha vaw leih ei ta.

⁹ Abei Nebukaneza hnohna chata “Hy beichaipa y, chhâzaw ta hroh mah y.

¹⁰ Nâma ta, hy beichaipa y, chyhsa ahyrai chiahmie zy, ramo zy, totâ zy, tlaipi zy, totâ laipa zy, baza zy, paropasyu theipa chi zydua a theipa maihta a khupa ta ngôh nohthlahpa amâ naoh awpa a châ;

¹¹ ahyrai a khupa ta a naoh leipa maih patina meihô liata thypa ama châ aw, tahpa ta biepiepa tao chi ta.

¹² Zu chyhsa thokha Babylaw râh kyh liata hyutuhpa ta na taopa Shadraka zy, Mesaka zy, Abenekô zy kha y ei ta. He chyhsazy heta hy beichaipa y, châ papeisa veih ei; na khazohzy chakao leipa ei ta, ngôh nohthlahpa na paduapa cha a naoh hra veih ei,” tahpa ta reih ei ta.

¹³ Chatanachata Nebukaneza chata pathi-iapa nata hiehâh ngaitapa ta Shadraka zy, Mesaka zy, Abenekô zy cha a vaw chhi awpa ta bie pie ta. He chyhsazy he abei hmiakô liana chata a vaw chhi ei ta.

¹⁴ Nebukaneza chata adaih ei ta ama hnohta, “Hy Shadraka, Mesaka, Abenekô, ei khazohpa chakao leipa ta, ei ngôh nohthlahpa taopa a naoh lei awpa namâ chhuahpa rai ma a châ?

¹⁵ Atahmâ he chiahmie zy, ramo zy, totâ zy, tlaipi zy, totâ laipa zy, baza zy nata a paro theipa zydua nama thei tita a khupa ta ei nohthlahpa taopa namâ naoh ha khiahtala a pha na; namâ naoh leipa khiahta deikua cha noh liana tlai chata patina meihô liata thypa nama châ aw; ei ku tawhtapa cha pachha awpa khazoh cha ahy e a châ?” tah ta.

¹⁶ Shadraka zy, Mesaka zy, Abenekô zy chata abei cha achhy ei ta, a hnohta, “Hy Nebukaneza y, he kyh liana heta eima châ chhy awpa chhao byuh vei.

¹⁷ Eima Khazohpa, eima chakao tyhpa chata patina meihô tawhtapa maniah pachha thei tlôh ta, na ku tawhtapa chhao, hy beichaipa, na khazohzy chakao leipa aw pi ta, na ngôh nohthlahpa paduapa chhao a naoh hra aw ma pi, tahpa pahno mah y,” tah ei ta.

¹⁹ Chatanachata Nebukaneza cha a pathi-ia ngaita ta, Shadraka zy, Mesaka zy, Abenekô zy liana chata a hmia cha anano khai ha ta. Patina mei cha a sanazie tyhpa hlâta ei sari ta pasah awpa ta bie pie ta.

²⁰ Chatawhcha a pheisaih sahlao hry liata chyhsa thatlôpa thokhazy cha Shadraka zy, Mesaka zy, Abenekô zy chahry awpa nata patina meihô liata thy awpa ta bie pie ta.

²¹ He chyhsazy he ama viahpakao ry zy, ama khutho zy nata ama chysia hropa zy chhaota chahrypa ta patina meihô liata thypa cha haw ei ta.

²² Abei biepiepa cha a parah ngaitapa vâta nata mei cha a sah ngaitapa vâta Shadraka zy, Mesaka zy, Abenekô zy a chalotuhpazy cha mei-paleih chata thie haw ei ta.

²³ He chyhsa pathôh Shadraka zy, Mesaka zy, Abenekô zy he chahryna chôta patina meihô liah liana chata pao ei ta.

²⁴ Chatanachata Abei Nebukaneza chata a noâh kaw ta, a chatliepa ta thyu ta, a ryhna a raokheituhpazy hnohna chata, “Chyhsa pathôh kha chahrypa ta mei liata thy ma pi ma khâ?” tahpa ta reih ta. Abei cha a chhy ei ta, “Y, abeichaipa y, eima thy na,” tah ei ta.

²⁵ Ano chata, “Pachâ teh u, chyhsa papalih pathlapa ta mei liata a khie ei ta, pasa chachei leipa ta hmô na ta, a papalihna a lânazie chhochhi cha khazoh hawhta a châ,” tah ta.

²⁶ Chatanachata Nebukaneza cha patina meihô chhikao liana chata a vaw hnia ta, “Shadraka, Mesaka, Abenekô y, nâmo Chônôchaipa Khazohpa chakaotuhpazy saih u, vaw pua ula, he lâ a vy teh u,” tahpa ta chho ta. Chatanachata Shadraka, Mesaka nata Abenekô zy cha mei tawhta vaw pua ei ta. Biehneituhpa zy, vyuhpa ta a ytuhpa zy, râh a vaotuhpa nata abei a ryhna a raokheituhpazy a vaw pahmaopakhypa chata he chyhsazy pôhpa chô liana heta mei ta hmotaotheina hnei leipa ta, ama sâ chhao kâ hra vei, ama viahpakao pasihpa zy a nano hra leipa ta, mei roh rai chhao pahnâh hra vei, tahpa hmô ei ta.

²⁸ Nebukaneza chata bie reih ta, “Shadraka zy, Mesaka zy, Abenekô zy Khazohpa cha reithaipa ta y mawh sy; ano chata a vâlyuhchâpa vaw tuah ta, a chakaotuhpa ano angiapâtuhpazy cha pachha ta, cha chyhsazy chata ama Khazohpa dei leipa ta cha khazoh hropa rai chakao leipa ta amâ naoh lei nawpa ta abei biepiepa pananopa ta ama pôhpa hlâ ngâh ei ta.

²⁹ Chavâta chyhsa to, pho to, reih to, Shadraka zy, Mesaka zy, Abenekô zy Khazohpa chô liata bie pha leipa a reihpa maih cha chhawh pathlahpa châ aw ei ta, ama ozy cha ie sona ta taopa a châ aw tahpa biepiepa ei tao; he hawhna tlaita a pachha theipa Khazohpa hropa rai y tlôh lei khâh ei ta,” tah ta.

³⁰ Chatanachata abei cha Shadraka zy, Mesaka zy, Abenekô zy cha Babylaw bia liana chata palai haw ta.