2 Thatihzy Rona 10

¹ Rehôbaw cha Sekhe lâta sie ta; Izarel sahlao zydua chata Sekhe lâta a bei ta tao awpa ta sie haw tlôh ei ta.

² Neba sawchapawpa Zerôbaw ta cha bie cha a thei nahta (Abei Sawlawmaw tawhta a râna Izi râh liata a ypa châ tlôh ta), Izi râh tawhtapa Zerôbaw cha vaw kua haw heih ta.

³ Chyhsa tuah ei ta, za aw ei ta; chatanachata Zerôbaw nata Izarel sahlao zydua cha a vy ei ta, Rehôbaw hnohna chata,

⁴ “Na paw khata eima raopakypa pahrisa ngaita tyh ta. Chavâta na paw ta rietheipa ta maniah a hmâna nata a raopakypa a hri ngaitapa eima chô liata a pahniehpa he maniah pahuapa la, chatanachata eima cha chakao aw,” tahpa ta reih ei ta.

⁵ Ano chata ama hnohta, “Noh thôh tawhta tlao avy heih teh u,” tah ta. Chatanachata zawpi zy cha a pai ha chy ei ta.

⁶ Abei Rehôbaw chata, “He zawpizy achhyna awpa heta aryhna khâpa e, eina raokhei aw eichi”? tahpa ta a paw Sawlawmaw a hro no ta a kiapâh liata a y tyhpa machâ sahlao zy cha a chhohia ta.

⁷ Âmo chata a hnohta, “He zawpi zy he ngiachhiepa ta palysapa ta ama hnohta bie pha ngaitapa zy na reih khiahtala, chhâzaw ta na chyhsa zy ama châ aw,” tahpa ta reih ei ta.

⁸ Châhrasala machâ sahlao aryh raokheipa cha a pyh leipa ta ano richâhpa satlia sahlao a kiapâh liata a ypa zy cha tlao a chhohia ta.

⁹ Ama hnohna chata, “He zawpi sahlao ei hnohta, ‘Na paw ta eima chô liata raopakypa a pahniehpa he maniah pahuapa teh,’ tahpa ta a reituhpa zy he ei chhyna zie awpa a ryhna khâpa e, eina raokhei aw eichi?” tah ta.

¹⁰ Chatawhcha a richâhkha satlia sahlaozy chata a hnohta, “He zawpi sahlao ‘Na paw khata eima raopakypa pahrisa ngaita tyh ta, nâma ta maniah pahuapa teh,’ na hnohta a tahtuhpa zy hnohna chata; he tana heta ama hnohta reih mah y, ‘Ei pâ chai hlâta cha ei tieta lai via ta.

¹¹ ‘Ei pâ khata raopakypa a hri ngaitapa cha pakysa ei ta, kei chata nama raopakypa cha ei baichha aw mâ tâh. Ei pâ ta chheina ta cha chhei tyh ei ta, kei deikua chata byuthôh ta ei cha chhei aw ei,’ tahpa ta,” reih ei ta.

¹² Chatawhcha Zerôbaw nata zawpi sahlao zydua cha abeipa ta, “Noh thôh rakha tawhta avy heih muh vy,” tahpa ta a chhopa hawhna khata, a noh thôh noh liata Rehôbaw lâta avy ei ta.

¹³ Abeipa chata reih chahrapa ta a vaw chhy ta, Abei Rehôbaw chata machâ sahlaozy a ryhraokheipa cha a pyh leipa ta,

¹⁴ satlia sahlao zy a ryhraokheipa hawhna khata, “Ei pâ ta nama raopakypa vaw pahri ta, keima ta cha cha tlao ei baichha aw; ei pâ ta chheina ta cha chhei ei ta, kei deikua chata byuthôh ta ei cha chhei aw ei,” tah ta.

¹⁵ Chatanachata abeipa chata zawpi zy bie reipa kha a pyh khao leipa ta; cha cha Khazohpa vâta a châ. ABEIPA ta Shilôh chyhsa Ahizah hmâpa ta Neba sawchapawpa Zerôbaw hnohta, bie a vaw rei hawpa kha a pa-i thei nawpa ta.

¹⁶ Chatawhcha abeipa ta ama bie a pyh vei tahpa, Izarel sahlao zydua ta ama pahno nahta zawpi zy chata, “Davi liata tovyuh khâpa eima hnei tly? Zese sawchapawpa liata ryuto awpa hnei hra ma pi. Izarel mozy saih u, nama poh-o lâta a di chyu teh u! Davi y, na chhôhkha pachâ teh, ”tahpa ta abeipa cha a chhy ei ta. Chatanachata Izarel mo zydua cha ama poh-o lâta a di haw ei ta.

¹⁷ Izarel pathla Zudah râh khih liata a pahrâpa zy deikua cha ama chô liata Rehôbaw a bei ta.

¹⁸ Chatanachata Abei Rehôbaw chata rai a pahriasapa zy hyutuhpa Hadôra tuah ta, ano cha Izarel sahlao zydua chata alô ta vawh ei ta, thi haw ta. Chatawhcha Abei Rehôbaw cha Zerusale lâ a râ a chhuahpa ta, a talaili liata thlai kiah ta.

¹⁹ Izarel sahlaozy cha Davi chhôhkha zy chô liata aty haw ei ta, atanoh taihna heta.