Malureina 13

¹ ABEIPA ta Mawsi chho ta.

² Izarel pathlazy ei piepa Kana râh mohparu awpa ta chyhsazy tuah teh; ama pho chhôhkha to liatahpa, ama chhihthatuhpa hry liatahpa, pakha chyu na tuah awpa a châ,” tah ta.

³ Chatawhcha Mawsi chata Paran râhpathohpa tawhna chata ABEIPA bie piepa hawhta pasiesa ta, ama zydua chata Izarel pathlazy hry liata pawhrâhpa sai ama châ.

⁴ Hezy he ama moh a châ: Rubena pho hry liatahpa, Zaku sawchapawpa Shamua.

⁵ Simeona pho hry liatahpa, Hori sawchapawpa Shaphata.

⁶ Zudah pho hry liatahpa, Zephune sawchapawpa Kaleba.

⁷ Iskara pho hry liatahpa, Zawsi sawchapawpa Ikala.

⁸ Ephrai pho hry liatahpa, Nuna sawchapawpa Hosia.

⁹ Benzami pho hry liatahpa, Raphu sawchapawpa Palti.

¹⁰ Zebulawna pho hry liatahpa, Sodi sawchapawpa Kadiel.

¹¹ Zawsi pho, Manase pho ama tahpa hry liatahpa, Susi sawchapawpa Kadidi.

¹² Dana pho hry liatahpa, Kemali sawchapawpa Amiel.

¹³ Asera pho hry liatahpa, Mikael sawchapawpa Sethu.

¹⁴ Nathalai pho hry liatahpa, Vophasi sawchapawpa Nahbi.

¹⁵ Kada pho hry liatahpa, Makhi sawchapawpa Kuel.

¹⁶ Hezy he mohparu awpa ta Mawsi ta a tuapazy moh cha a châ. Nuna sawchapawpa Hosia cha Mawsi ta Zawsua bi ta.

¹⁷ Mawsi ta Kana râh mohparu awpata âmo sahlao cha tuah ta, ama hnohta, “Neke lâ lapi lâta sie ula, tlâhzy lâta kiah ula.

¹⁸ râh cha kheihawhpa ma a châ tahpa zy, chazy liata a pahrâpa zawpizy cha thatlôpa ama châ ma, thatlô leipa ama châ ma, tahpa zy, ama chyh nata ama hluhpa zy.

¹⁹ ama yna râh cha a pha ma, a chhie ma, tahpa zy, ama yna khihzy cha kheihawhpa ma a châ, poh-o deita ma, kuh a hneipa tahpa zy.

²⁰ râh cha kô a veih ma, veih vei ma, thothihpa ma, thothih leipa ma tahpa zy, kei moh ula. Chatawhcha riahpha ngaitapa ta y ula, cha râh liata theilâpazy cha vaw phaoh muh vy,” tah ta. Kre thei pathei tuapa patheina daihti no châ ta.

²¹ Chatanachata pua ei ta, râh cha Zin râhpathohpa tawhta Hama a ngiana Reho taihta moh khai ei ta.

²² Neke lâta khy ei ta, Hebraw tlô ei ta; cha liana chata Anaki pathla Ahima sahlao zy, Shesai sahlao zy, Talmai sahlao zy y ei ta. (Hebraw cha Izi râh liata Zoana a dua hlâta kô sari liata padua hawpa a châ..

²³ Chatawhcha Eskawl Saikao tlô ei ta, cha liata kre sao kha, a chiah duata chhawh ei ta, chôchahrei ta chyhsa pano ta a sy ei ta; pawmikranat zy nata theiku zy chhao vaw phaoh ei ta.

²⁴ Cha su cha Eskawl Saikao bi ei ta, Izarel pathlazy ta cha liata kre sao cha ama chhawhpa vâta.

²⁵ Cha râh ama mohparupa cha noh sypali hawh ei ta, vaw tlô haw heih ei ta.

²⁶ Paran râhpathohpa liata Kadesa liana chata Mawsi nata Arawna nata Izarel pathla zawpi zydua hnohna cha vaw tlô ei ta; ama hnohta nata zawpi zydua hnohna chata bie vaw tlô khei ei ta, cha râh theilâpazy cha pamosa ei ta.

²⁷ Chatawhcha a hnohta, “Maniah na tuapa râh lâna chata sie pi ta; sâhpiti nata kheihti lona a vaw châ tlaina, he he a râh liata theilâpa a châ.

²⁸ Anodeikuacha a râh liata chyhsa a pahrâpazy cha chyhsa thatlô ngaitapa châ ei ta, khihzy chhao kuh a hneipa, rôhnah ngaitapa a châ, Anaki pathlazy chhao hmô hra pi ta.

²⁹ Amale sahlao cha chho lâ râh liata pahrâ ei ta, Hiti sahlaozy, Zebu sahlaozy, Amawri sahlaozy cha tlâh liata zy y ei ta; Kana sahlaozy cha tilaipi kiah nata Zawdah kao liata pahrâ ei ta,” tahpa ta chho ei ta.

³⁰ Mawsi hmiakô liana chata Kaleba ta zawpi cha chalihsa ta; “Khy parah ei suh la, kaw la ei suh u, eima pahnie tlai aw,” tah ta.

³¹ Châhrasala a sielâhpazy chata “Pahnie thei aw ma pi; keimo hlâta ama thatlô via tlôh ta,” tah ei ta.

³² Izarel pathlazy hnohta, “Râh ama mohparupa cha râh mohparu awpata eima chahryhpa cha a chhôh liata a pahrâpazy a palâ khaipa châ ta; a pahrâpazy eima hmôpa cha chyhsa pahreihpapi châ ei ta.

³³ Cha liana chata Anaki pathlazy chyhsa laipa sahlao pahreihpapi hmô pi ta, keimo cha khawsu hawh deita ta a hmô pi ta, âmo chhaota khawsu hawh deita ta maniah ama hmô,” tahpa ta a chhiena lâta reih ei ta.