Theihthaina 10

¹ Arawna sawchapawpa Nada nata Abihu zy chata ama mei lana cha la rairieh ei ta, cha liana chata mei soh ei ta, rohpahâhpa mia ei ta, ABEIPA hmiakô liata a biepiepa leipata mei hmâh leipa chi hlâ ei ta.

² ABEIPA hmiakô tawhta mei vaw pua ta, âmo cha kâsao ta, ABEIPA hmiakô liana chata thi haw ei ta.

³ Chatanachata Mawsi ta Arawna hnohta, ’”Nâ vaw hniatuhpazy liana chata pathaihpata a luah aw na ta, zawpi zydua hmiakô liana chata palyupalihpata ei y aw,’ tahpata ABEIPA ta a reipa kha, he he a châ hi,” tah ta. Arawna cha a chalih thlâh ha ta.

⁴ Mawsi ta Arawna paw unawhpa Uziel sawchapawpa Misael nata Elzapha zy cha aw ta, ama hnohta, “A vaw hnia ula, nama unawhpazy he su pathaihpa tawhtapa ariena su khôtho lâ puakhei teh u,” tah ta.

⁵ Chatanachata a vaw hnia ei ta, viahpakao a kyna chôta ariena su khôtho lâ puakhei ei ta, Mawsi reipa hawhna khata.

⁶ Chatawhcha Mawsi ta Arawna hnohta nata a sawchapawpa Eliaza nata Ithama zy hnohta, “Nama sâ pathlia kha ula, nama pohzy hrie hra kha u, chata leipatala thi aw ei chi ta chyhsa zydua chô liata pathi a ia aw; nama unawhpa Izarel chhôhkhapa tlokhuh ta mei, ABEIPA patipa cha pachâroh ngaitapata y ei se.

⁷ Chatawhcha ahmaohpakhyna poh-o chhikao tawhtapa cha nama pua awpa châ vei, chata leipatala nama thi aw, ABEIPA sathaw a thupa cha nama chô liata y tlôh ta,” tah ta. Chatanachata Mawsi bie hawhna chata tao ei ta.

⁸ Chatawhcha ABEIPA ta Arawna cha chho ta.

⁹ “Nâ tlyma, na sawchapawpazy tlyma rai ta ahmaohpakhyna poh-o chhôh lâta nama vaw nota, kresawti nata paritheipa rai dôh khah u, chata leipata la nama thi aw; nama pathlazy taihta chhâzaw ryhpa awpa châ aw ta.

¹⁰ Cha cha a pathaihpa nata a pathaih leipa nata ânapa nata âna leipa panano theina awpa.

¹¹ nata ABEIPA ta Mawsi hmâpata ama hnohta a reipa biepiepa zydua cha Izarel pathlazy cha nama pachu thei nawpata a châ,” tahpata.

¹² Chatawhcha Mawsi ta Arawna hnohta nata a sawchapawpa a hropa Eliaza nata Ithama zy hnohna chata, ABEIPA chata mei ta hmohlâpa liatahpa niepa hlâna la bâhpazy cha la ula, maisâh kiapâh ta thinô pahlao leipata nie teh u, hmo pathaihpa châ tlôh ta;

¹³ ABEIPA chata mei ta hmohlâpa liata na vyuh nata na sawchapawpazy vyuh a châpa vâta su pathaihpa liata nama nie awpa a châ; cha hawhta biepiepa ei châ.

¹⁴ A palôh hipa nata a phei chachâh lâ hipa cha a pathaihpa su liata nama nie awpa a châ, Izarel pathlazy adyhna hlâna atheihna liata na vyuh nata na sawchapawpazy vyuh ta raopa châ tlôh ta.

¹⁵ A phei chaluahpa nata a palôh hipa cha ABEIPA hmiakô liata hipa hlâna ta hie awpata, mei ta hmohlâpa thaw nata ama vaw chei awpa châ ta, cha cha nâma nata na sawchapawpazy chhaota chhâzaw ta nama vyuh awpa a châ aw; ABEIPA biepiepa hawhna khata,” tah ta.

¹⁶ Mawsi chata moleina hlâna mie cha pakhâta ta tlua ta; ama vaw rao hawpa cha hmô ta: Chatanachata Arawna sawchapawpa a hropa Eliaza nata Ithama chô liana cha a pathi-ia ta.

¹⁷ “Khâzia e moleina hlâna cha su pathaihpa liata nama nie vei, hmo pathaihpa zawpi sahlao hmo paraona a phaoh awpata ABEIPA hmiakô liata aryhna taopa awpata a cha piepa ei châ tlôh ta.

¹⁸ A thisaih cha su pathaihpa liata a ngiakhei vei eichi. Bie ei piepa hawhna khata su pathaihpa liata nama nie tlai awpa a châ mâh tâh,” tahpa ta.

¹⁹ Arawna ta Mawsi hnohta, “Moh teh, atanoh he ABEIPA hmiakô liata ama moleina hlâna nata ama raopa hlâna cha ama hlâpa châ ta; he hawhpa hmo he ei chô liata vaw y thlâh ha tlôh ta, atanoh he moleina hlâna cha vaw nie ha aw sala, ABEIPA mohmô ta hmo aly tlâhpa a châ aw ma?” tah ta.

²⁰ Mawsi ta cha cha a thei nahta a palôh tlâh ha ta.