Ryureihtuhpazy 6

¹ Izarel pathlazy chata, ABEIPA mohmô ta hmo parao haw ei ta; ABEIPA ta Midia mo ku liata kô sari paysa ta.

² Midia mozy chata Izarel mozy cha vaw pahnie rili ei ta; Midia mozy vâna chata lzarel pathlazy chata tlâh liata khaoh zy, lôpu zy, kuh zy tao ei ta.

³ Izarel mozy ta chi ama cheih nata Midia mozy, Amale mozy, nochhi sawzy sahlao cha khy ei ta, adyuh ei ta;

⁴ khy hnao ei ta, Kaza taihta alei liata a pyupazy cha paraopa ei ta, Izarel râh liata niepa rai pahlôh veih ei. Mietahkupa zy, viahchao zy, alâ zy taih ta.

⁵ Ama sahroh zawzy nata ama poh-o zy chhaota vaw thyu ei ta, khawsu hawh tlaita a hluh ngaitapa ta vaw thyu tyh tlôh ei ta; âmo nata ama râraoseihpa zy cha reitiahpa châ vei, râh parao awpa ta amâ vy tyh.

⁶ Izarel mozy cha Midia mo vâna chata sipasa ngaitapa ta y ei ta; Izarel pathlazy chata ABEIPA cha pado haw ei ta.

⁷ Midia mo vâta Izarel pathlazy ta ABEIPA ama padona chata,

⁸ ABEIPA Izarel pathlazy hnohna chata hrohsopa vaw tuah ta; ano chata ama hnohta, “ABEIPA Izarel zy Khazohpa ta he tana he a tah; Izi râh tawhtapa cha kaw chhihtha ei na ta, sei tawhtapa cha papua ei na ta;

⁹ Izi mo ku tawhtapa nata cha pasaipa-i tuhpa zydua ku tawhtapa cha pachha ei na ta, nama hmiakô tawhtapa âmo cha to na ta, ama râh cha pie ei na ta;

¹⁰ chatawhcha kei ta, ‘Kei he ABEIPA nama Khazohpa ei cha hih; he nama yna râh hneituhpa Amawri mo khazoh zy he nama chi chachei awpa châ vei,’ tah na ta. Châhrasala ei bie reipa cha angiah tlôh eichi va,” tah ta.

¹¹ ABEIPA vâlyuhchâpa cha a vy ta, Ôphrah khih liata Abieza chyhsa Zôasha ei oaka tho ry liata a tyuh ta, a sawchapawpa Kidia cha Midia mozy hmô thei lei awpa ta kre saohna khaoh liata sâh tly ta.

¹² ABEIPA vâlyuhchâpa cha a hnohta a vaw luah ta, a hnohta, “Nâ, chyhsa thatlôpa riahphapa y, ABEIPA cha na hnohta a y na,” tah ta.

¹³ Kidia ta a hnohta, “Hy ei zibeipa y, ABEIPA eima hnohta a y tlôh khiahta cha, kheihtazie ta e he hawhta eima chô liata hmo a vaw tlô? Eima pathlatuhpa zy khata, ‘ABEIPA ta Izi râh tawhtapa cha maniah a kaw chhihthapa châ vei mâ?’ tahpa ta a hmotaopa noâh ngaitapa zy maniah ama chho tyhpa kha, khataih lâ a vawh haw? Atahmâ la, ABEIPA ta maniah pathlua haw ta, Midia mo ku liata maniah a pie haw mâ tâh,” tah ta.

¹⁴ ABEIPA chata ano cha moh ta, a hnohta, “He na thatlôna heta sie la, Izarel mo he Midia mo tawhtapa pachha mah y, cha tuah vana mâ?” tah ta.

¹⁵ Ano chata a hnohta, “Hy ABEIPA y, kheihta e Izarel mozy he ei pachha bao hra aw? Pachâ tua, Manase pathla hry liata pho riethei chaipa châ pi ta, kei hra he, ei paw chhôhkhapa zy hry liata a chyh chaipa châ tlôh na ta,” tah ta.

¹⁶ ABEIPA chata a hnohta, “Na hnohta ei y lymâ aw mâ tâh, Midia mo cha chyhsa pakha hawh tlaita na pahnie khai thlâh ha aw,” tah ta.

¹⁷ Ano chata a hnohta, “Na modypa ei châ khiahtala nâ tlaita eina chho chi tahpa pahnona khâpa ma na pamosa mah y.

¹⁸ Na hmiakô liata hlâ awpa hmopiepa ei la aw na ta, na lâta ei vy heih hlâ lei cha, he tawhtapa he ngiachhiepa ta vaw sie chachei ta khah y,” tah ta. Ano chata, “Nâ vy hei hlâ lei cha ei vaw y thlâh ha aw,” tah ta.

¹⁹ Chatawhcha Kidia cha vawh ta, mie taw nata viahdie ephah hmo kha thinô pahlao leipa tao ta; a sapa cha kachuh liata soh ta, a tihâh cha beih liata soh ta, oaka tho ry liata ano lâna chata cheih ta, hlâ ta.

²⁰ Khazohpa vâlyuhchâpa chata a hnohta, “Sâh nata viahchhâ thinô pahlao leipa kha la la, he alô chô liana heta soh la, a tihâh kha patlai thlu teh,” tah ta. Cha hawhna chata tao ta.

²¹ ABEIPA vâlyuhchâpa chata a chôhchahrei chabapa pawhmao chata sâh nata viahchhâ thinô pahlao leipa cha kei hria ta; chatawhcha alô tawhna chata mei vaw pua ta, sâh nata viahchhâ thinô pahlao leipa cha kâ khai ha ta; ABEIPA vâlyuhchâpa cha a hmô thei leipa lâta sie haw ta.

²² Chatawhchata Kidia chata ABEIPA vâlyuhchâpa a châ tahpa pahno haw ta, Kidia ta, “Cha ngaita rimâ cha, hy Abeipa KHAZOPA! ABEIPA vâlyuhchâpa cha hmia a chhypa tlaita ei hmô haw cha zaw,” tah ta.

²³ ABEIPA ta a hnohta, “Thlalôh ngaitapa ta y la; chi khâ, thi aw va chi,” tah ta.

²⁴ Chatanachata Kidia ta, cha liana chata ABEIPA chata maisâh tao ta, “ABEIPA cha thlalôhna a châ tahpa ta Zehôvasalaw bi ta. Atanoh taihta Abieza mozy khih Ôpharah liata a y thlâh haw.

²⁵ Cha zâ liana chata ABEIPA ta a hnohta, “Na paw viahchao tôhpa, viahchao tôhpa miano kô saripa cha la la, na paw hneipa Baal maisâh he pacho la, a kiapâh lâta Asherah he thlu teh;

²⁶ he kuh chô liana heta a yzie hneipa ta ABEIPA na Khazohpa châta maisâh tao la, viahchao tôhpa mianona cha la la, Asherah na thlu awpa tho hmâpa ta raopa hlâna hlâ teh,” tah ta.

²⁷ Chatanachata Kidia chata a chakaotuhpa zy hry liatahpa pahrawh a chhi ta, ABEIPA ta a hnohta a reipa hawhna chata tao ta; a paw chhôhkha zy nata khihpi liata chyhsa zy cha a chipa vâta nohchhô ta tao ngâh leipa ta, zâ ta a tao.

²⁸ Khihpi liata chyhsa zy cha mydi ta ama thyu nahta, Baal maisâh cha chati pathlapa ta y ta, a kiapâh liata Asherah cha thlupa ta y ta, maisâh taopa chô liata viahchao tôhpa pô nona hlâpa cha vaw y thlâh ha ta.

²⁹ “He he ahy taopa tlyma?” tahpa ta a chho ei ta. Chatawhcha ama hiahri nahta ama pachâ khai tawhna chata, “Zôasha sawchapawpa Kidia taopa a châ he,” tah ei ta.

³⁰ Chatanachata khihpi liata chyhsa zy chata Zôasha hnohta, “Na sawchapawpa cha a vaw chhi teh, a thi tlai awpa a châ. Baal maisâh a chati pathlahpa vâta nata a kiapâh ta Asherah a thlupa vâta,” tah ei ta.

³¹ Châhrasala Zôasha chata, ano a vaw leih tuhpa zydua hnohna chata,” Baal cha nama chakhei aw ma? Ano cha nama paboh aw mâ? Ahyrai ano a chakheipa maih cha myna tlai heta thie awpa a châ, khazoh a châ khiahtala a maisâh ama chati pathlapa vâta anosasyh ta a chakhei se,” tah ta.

³² Chatanachata a maisâh a chati pathlapa vâta, “Baal ta ano a kho mawh sy,” tahpa ta, cha nona chata Zerubaal bi haw ta.

³³ Midia mo zydua nata Amale mozy nata nochhi sawzy cha a pahmaohpakhy ei ta, chavah chaka ei ta, Zezrel saikao liata a rie ei ta.

³⁴ Châhrasala ABEIPA Thlahpa cha Kidia chô liana vaw tlô ta; chiahmie tô ta, Abieza mo chata ano lâ pangai ei ta.

³⁵ Manase mo zydua hry liata chyhsa tuah ta, cha sahlao chhao chata ano lâta pangai ei ta, Asera mo hnohta zy, Zebulawna mo hnohta zy, Nathalai mo hnohta zy chhao chyhsa zy tuah ta; âmo chhao chata a vaw pahlyh haw hra ei ta.

³⁶ Kidia ta Khazohpa hnohta, “Na reipa hawhta, keima ku ta Izarel zy he na pachha awpa khiahtala,

³⁷ sawhri liata mietahkupa hmi soh aw na ta; mietahkupa hmi liana deita chata diati ypa ta, alei zydua cha a hi khai khiahtala na reipa hawhta keima ku ta Izarel zy he na pachha aw tahpa ei pahnô aw,” tah ta.

³⁸ Cha hawhna tlai chata vaw châ ta. A mylâ mydi ta thyu ta, mietahkupa hmi cha a sao nata, mietahkupa hmi liatahpa cha diati biebu kha tlai saoh tlôh ta.

³⁹ Chatawhcha Kidia ta Khazohpa hnohta, “Ei chô liata na pathi-ia khah y, ei kha ei reih heih tua aw; ngiachhiepata ta ei kha chhâ mietahkupa hmi ta na pasiasa heih tua mah y; atahmâ cha mietahkupa hmi deita cha hi sala, alei chô zydua liata diati tlao y mawh sy,” tah ta.

⁴⁰ Cha hawhna chata Khazohpa ta cha zâ liana chata vaw tao ta; mietahkupa hmi deita cha hi ta, alei chô zydua liana chata diati cha tlao vaw y ta.