Zawsua 5

¹ Zawdâh khô lâ notla lâta a ypa Amawri abei zydua nata tilaipi kiah liata a ypa Kana râh abei zydua chata ama chaka hlâ lei ABEIPA ta Zawdâh tizy cha Izarel pathlazy hmiakô liata a pakua tahpa ama thei nahta, Izarel pathlazy vâna chata ama pathipalôh zy cha lei khai haw ta, a chi leipa rai y veih ei.

² Cha nona chata ABEIPA ta Zawsua hnohta, “Meilô chaizôh tao la, Izarel pathlazy he ama chopaw a ei nona ta taipa heih teh,” tah ta.

³ Zawsua ta meilô chaizôh zy cha tao ta, Izarel pathlazy cha vo pawhmao tlâh liata ama chopaw taipa ta.

⁴ Zawsua ta âmo chopaw a tai chhâpa cha he he a châ: Izi tawhta a puapa sahlao zydua, chapaw chariah adyuhpa zydua kha Izi râh tawhta ama pua tawhna khata râhpathohpa liata ama thi khai haw.

⁵ Izi râh tawhta a puapa sahlao zydua kha chopaw tai chiehpa sai cha ei ta, anodeikuacha Izi râh tawhta puapa ta râhpathohpa lâpi liata a pihpa zydua kha cha chopawtaipa châ veih ei.

⁶ ABEIPA ao ama nahthlie khoh leipa vâta zawpi sahlao zydua, Izi râh tawhtapa a vaw puapa, chariah adyuhpa zy taihta pahleipadiapa ta ama y khaina taihta Izarel pathlazy cha râhpathohpa liata kô sypalih tlai viavi ei ta; ABEIPA ta ama pathlatuhpa zy hnohta sâhpiti nata kheihti lona râh chhiesapa ta pie maniah a taihpa kha, cha râh cha hmô lei awpa ta ABEIPA ta ama hnohta chhie a sa.

⁷ Chatanachata ama pathlazy âmo vyuhpa ta a paduapa zy cha Zawsua ta ama chopaw taipa ta; lâpi liana khata ama chopaw taipa a châ leipa vâta chopawtai leipa châ thlâh ha tlôh ei ta.

⁸ Zawpi sahlao zydua ama chopaw ama tai khai tawhna chata, ama tlâh hlâ lei cha amâ riena su, ama yna chyu liana chata y ei ta.

⁹ ABEIPA ta Zawsua hnohta, “Atanoh he Izi mo ama cha mohnaona he nâmo tawhtapa ei pahlei haw,” tah ta. Chatanachata cha su cha atahmâ taihta Kilkal ama bi haw.

¹⁰ Izarel pathlazy chata Kilkal liata ariena su tao ei ta, Zerikô bypi zy liana chata cha thla noh hrawhleipalih noh zâ lâna chata zawpakhô a ô ei ta.

¹¹ Chatawhcha zawpakhô a mylâpa chata cha râh liata sâh viahchhâ thinô pahlao leipa nata sa raopa nie ei ta.

¹² Chatawhcha cha râh liatahpa sâh ama nie mylâpa tawhna chata mâna kha tla khao leipa ta; Izarel pathlazy cha mâna cha hnei khao hra veih ei. Cha kô chata Kana râh liata sâh cha tlao ama nie haw.

¹³ Zawsua cha Zerikô khih kiapâh liata a y nona chata, mohmia pasaih ta, moh ta, a dady ta liana chata chyhsa pakha zaozi phia chiehpa chabapa ta a vaw duah thlâh ha ta; Zawsua ta pangai ta, a hnohta, “Keima chhâh a châpa ma na châ, eima khakhaipa zy chhâh a châpa chi maw?” tah ta.

¹⁴ Chatawhcha ano chata, “Châ bao va, ABEIPA pheisaih zy hyutuhpa ta a vypa na ei châ,” tah ta. Zawsua cha alei liata â khu lâta pao ta, a chhy ta, a hnohta, “Ei beipa ta a chakaotuhpa hnohna heta khâpahmah reih awpa a hnei tly? tah ta.

¹⁵ ABEIPA pheisaih zy hyutuhpa chata Zawsua hnohta, “Na phei tawhtapa na pheiky kha pahluh teh; nâ duana su kha a pathaih na,” tah ta. Chatanachata Zawsua chata pahluh haw ta.