Puasaina 32

¹ Zawpizy chata Mawsi cha tlâh tawhtahpa a zu hawh ngaitapa ta pahno ei ta, zawpizy cha Arawna lâta apahmaohpakhy ei ta, a hnohta, “Maniah a chhihtha awpa ta khazohzy maniah taopa teh, he Mawsi Izi râh tawhta maniah a chhithatuhpa hra he, a thâtih pahno khao tlôh lei khâh pi ta,” tah ei ta."

² Arawna ta ama hnohta, “Nama lahpinôzy, nama sawchapawpazy nata nama sawchanôzy a pataopa ngôh rahyzy kha la ula, ei hnohta vaw chei teh u,” tah ta.

³ Chatanachata zawpi zydua chata ngôh rahy amâ bâh haipazy cha su ei ta, Arawna hnohna chata vaw cheih ei ta.

⁴ Ano chata ama ku tawhtapa cha la ta, thua pazaohpa ta tao ta, viahchao taw nohthlahpa ta leih ta; âmo chata, “Hy Izarelzy saih u, hezy he Izi râh tawhtapa châ chhithatuhpa nama khazohzy ama châ hih!” tah ei ta.

⁵ Cha cha Arawna ta a hmô nahta a hmiakô liana chata maisâh tao ta; chatawhcha Arawna cha tlâh awh ta, “Mylâ ABEIPA châta kyhchhi y mawh sy,” tah ta.

⁶ A mylâ mydita thyu ei ta, raopa ta hmohlâpazy hlâ ei ta, a ryhna hmohlâpazy vaw cheih ei ta, zawpi cha nie nata do awpa ta a tyuh ei ta, palaopalâ awpa ta thyu heih ei ta.

⁷ ABEIPA ta Mawsi cha chho ta, “Zu la; na chyhsazy Izi râh tawhta na vaw chhithapazy khu, âmosasy ta ama parao khai haw; ei biepiepazy cha amâ heisai hmâ kaw; viahchao taw nohthlahpa leipa a tao ei ta, a chhy ei ta, ano lâna chata a theih ei ta,

⁸ ‘Hy Izarelzy saih u, hezy he Izi râh tawhta châ chhithatuhpa nama khazohzy ama châ hih!’ ama tah,” tah ta.

⁹ Chatawhcha ABEIPA ta Mawsi hnohta, “He chyhsazy he moh thlâh ha ei na ta, phopi chhoru ngaitapa ama châ he;

¹⁰ a chalih teh, amo a kâ khai awpa ta âmo chô liata ei hiehâhna cha ei patlôsa thei nawpa ta; chatawhcha nâ he, phopi rôhnah ngaitapa ta ei cha tao aw,” tah ta.

¹¹ Mawsi ta ABEIPA a Khazohpa hnohta, “ABEIPA y, hmotaotheina thata nâ ta ku thatlô ngaitapa ta na chyhsa Izi râh tawhta na vaw chhipazy chô liana heta khazia e na hie a hâh ngaita tly?

¹² Izi chyhsazy ta, khazia ma, ‘Ama châta pha lei awpa tlâhzy liata thie awpa nata alei chô tawhta kâ patlô khai awpa ta a chhithapa a vaw châ hih,’ ama cha tah aw tly? Na hiehâh ngaitana he padia la, na chyhsazy chô liata he hmo pha leipa tao nâ chhuahpa he pathlei mah y.

¹³ Na chakaotuhpa Abaraha zy, Aisika zy, Zakaw zy hnohta, ‘Avâ liata Awhsi zie ta na pathlazy cha papôh aw na ta, he râh ei vaw rei hawpa zydua he na pathlazy pie hra aw na ta, chatanachata chhâzaw ta ama pahrâ palâh aw,’ tahpa ta, nâma tlaita reipa ta chhie nâ sa hawhna zy kha a thei thlâh ha mah y,” tahpa ta a haw chaimâh ta.

¹⁴ Chatanachata ABEIPA ta a chyhsazy chô liata hmo pha leipa a tao awpa cha pathlei haw ta.

¹⁵ Mawsi cha tlâh tawhta bie pahnosana alô phia miano cheipa ta za chô haw ta, alô phia chavei chachâh ta ropazy cha; a chavei chachâh liana zy chata ropa a châ.

¹⁶ Chatawhcha alô phiazy cha Khazohpa taopa châ ta, a ropazy chhao cha Khazohpa ropa tlai, alô phiazy chô liata ropa a châ.

¹⁷ Zawsua ta zawpi awpa pyu a thei nahta, Mawsi hnohta, “A riena su liata a dyuhna pyu a y,” tah ta.

¹⁸ Ano chata, “Pahnietuhpa awpa pyu châ vei, pahniepazy awpa pyu châ hra vei, hla sapa pyu tlao ei thei,” tah ta.

¹⁹ Mawsi cha a riena su kiapâh a kei tlô nahta viahchao taw nohthlahpa nata lâpa cha hmô ta, chatanachata Mawsi cha a hie thata hâh ta, alô phiapa cheipazy cha thy ta, tlâh ry liana chata kei khai haw ta.

²⁰ Chatawhcha viahchao taw nohthlahpa ama taopa cha la ta, mei liata ti ta, a dina taihta charoh pazao khai ha ta, ti liata hie ta, Izarel pathlazy cha padosa haw ta.

²¹ Mawsi ta Arawna hnohta, “He sahlaozy heta na chô liata khâpa ma tao ei ta, he hawhta hmo molei ngaitapa ama chô liata na patlôsa tly? tah ta.

²² Arawna chata, “Ei zibeipa hiehâhna he sôkha ta hâh kha se; he zawpi sahlao he, moleina lâ a heipa ama châ tahpa na pahno mâ tâh.

²³ Ei hnohta, ‘Maniah a chhitha awpa ta khazohzy maniah taopa teh; he Mawsi Izi râh tawhta maniah a chhithatuhpa hra he, a thâtih pahno khao tlôh lei khâh pi ta,’ vaw tah ei ta.

²⁴ Chatawhcha kei ta ama hnohta, ‘Ahyrai ngôh a hneipa mai pahluh ei se,’ tah na ta, na vaw pie ei ta, kei ta mei liata phôh na ta, chatanachata he viahchao taw nohthlahpa he a vaw pua thlâh ha he tlyma,” tah ta.

²⁵ Chatawhcha zawpizy cha âmo khopa hawhta ama y tahpa Mawsi ta pahno ta, (Arawna chata ama khakhaipazy liata mohnao chhipa ta yna taihta ama khopa hawhta vaw paysa haw tlôh ta),

²⁶ chatanachata Mawsi cha a riena su a ngiana chhikao liata a duah ta, “Ahyrai ABEIPA chhâh a châpa maih cha, ei hnohta a vy mawh sy,” tah ta. Chatanachata Livai sawchapawpa zydua cha, a hnohta vawh ei ta.

²⁷ Ama hnohta, “ABEIPA IZarelzy Khazohpa ta, ‘Chyhsa tota nama zaozi chaba ula, a riena su chhôh liana heta a ngiana chhikao tawhta, chhikao hiakhalâ taihta a khiekhâ ula, chyhsa tota nama uhnawhpa chhao, chyhsa tota nama viasapa chhao, chyhsa tota nama vaihpa chhao, thie lymâ teh u,’ a tah na,” tah ta.

²⁸ Livai sawchapawpazy ta Mawsi bie hawhta tao ei ta; cha noh liana chata chyhsa sâh thôh rachhôh thie ei ta.

²⁹ Mawsi ta, “Atanoh he, ABEIPA lâta a panano teh u, chyhsa tota âmo sawchapawpazy, âmo uhnawhpazy, a dyuh haw tlôh ei ta, chatanachata atanoh he byhnâ ta a cha vao hei aw ei ta,” tah ta.

³⁰ A mylâ chata, Mawsi ta zawpizy hnohta, “Hmo molei ngaitapa tao haw eichi ta, ABEIPA lâta ei khy aw; nama moleina liana heta a ryhna ei tao thei ngyu la,” tah ta.

³¹ Chatanachata Mawsi cha ABEIPA lâta khy heih ta, “He sahlao heta hmo molei ngaitapa tao haw ei ta, amo chata ngôh khazohzy cha a tao ei ta.

³² Anodeikuacha ama molei na ngiathai thei aw tly ma? Na thei leipa khiahtala, na châbu liata na vaw ro hawpa tawhtapa kha eina phie awpa chi ta ei châ haw na,” tah ta.

³³ ABEIPA ta Mawsi hnohta, “Ahyrai ei chô liata hmo a paraopa maih cha ei châbu tawhtapa ei phie aw.

³⁴ Sie la, siena awpa ei cha chho hawpa su liana khata zawpi sahlao he chhitha teh; ei vâlyuhchâpa ta a cha chhi lymâ aw. Anodeikuacha ei vaw hrie tita cha ama moleina tlai liata ei vaw hrie aw,” tah ta.

³⁵ Chatawhcha Arawna taopa viahchao taw nohthlahpa cha amâ chhypa vâta ABEIPA ta zawpizy cha hrie haw ta.