Daniel 11

¹ ‘Kei cha Medai chyhsa Daria kô khana liana khata ano pa-i awpa nata thapatlô awpa ta aduah na ta."

² Atahmâ he bie dopa cha ei cha chho aw ei. “Persia liana chata abei pathôh vaw pua aw ei ta; a papalihna cha a hropa zydua hlâna khata a hneirôh via chai aw; a hneirôna vâta a tha a patlô tita cha Krika râh adyu awpa ta chyhsa zydua a pathyu aw.

³ Chatawhcha abei thatlô ngaitapa, biehneina rôhnah ngaitapa ta ryu a reih awpa cha vaw pua aw ta, ano reisai ta a tao aw.

⁴ A vaw pua tina chata a khihnarâh cha a hie patlapa châ aw ta, kaokih miapalih lâta pachhaihpa ta a y aw, a pathlazy hnohta châ leipa ta, a biehneina ta a pachia tyhnazie hawhta châ leipa ta a khihnarâh cha he chyhsazy a châ leipa, chyhsa hropa châta chhupa ta tlao a y aw.

⁵ “Chatanachata chho lâ abei cha a thatlô aw ta; a hyutuhpazy hry liata pakha deikua cha ano hlâta a thatlô via aw ta, biehneina hnei aw ta, a biehneina cha biehneina rôhnah ngaitapa a châ aw.

⁶ Kô thokha a lei tawhta mianopazy cha a pazao aw ei ta; chho lâ bei sawchanônô cha maw lâ bei hnohna chata adyhna tao awpa ta a vy aw; châhrasala a thatlôna cha bopi ta hnei leipa aw ta, ano chhao kha aduah hra leipa aw ta; a thatlôna chhao abei sawchanô cha pie khaipa ta y aw ta, a vaw chhituhpa nata a satuhpa, cha nota ano tha a patlôtuhpa chhaota.

⁷ “Châhrasala a thari tawhta a kaw thaopa tawhtapa cha chyhsa pakha ano su liata aduah aw ta; cha cha pheisaih sahlao chhaota a vy aw ta, maw lâ abei kuh liana chata angia aw ta, âmo adyuh aw ta, a pahnie aw.

⁸ Ama khazohzy, ama khazoh nohthlahpa leipazy chhaota, ama tâkâri nata ngôh hmobaoh pha ngaitazy chhaota, Izi lâta siekhei khai aw ta; kô khazie tlyma cha maw lâ bei liata a pahâ chy aw.

⁹ Chatawhcha chho lâ bei khihnarâh liana chata maw lâ bei cha a vaw ngia aw ta, châhrasala ano râh lâta angia heih aw.

¹⁰ “A sawchapawpazy ta adyuh aw ei ta, pheisaih hri hluh ngaitapa aw pakhy aw ei ta, adyu aw ei ta, a kuh tlai chhao.

¹¹ Chho lâ bei cha a pathi-ia ngaita aw ta, vaw puapa ta ano adyuh aw, maw lâ bei tlai cha; chatawhcha zawpi hluh ngaitapa chhaota pua aw ta, chyhsa hluhpi a ku liata piepa a châ aw.

¹² Chyhsa hluhpi cha paviasapa châ aw ei ta, a pathipalôh a sa aw ta, thy hluhpi papao aw ta, châhrasala aduah patlô aw vei.

¹³ Maw lâ abei cha vaw thyu heih aw ta, zawpi a hmiakô liatahpa hlâta hluh via chhaota pua aw ta; daihti chhâna, kô chhâna tlai liana chata pheisaih hri hluh ngaitapa nata chhaichhi hluh ngaitapa chhaota a vaw pangai aw.

¹⁴ “Cha daihtizy liana chata chyhsa hluhpi, chho lâ bei adyuh awpa ta amâ duah aw; na chizy hry liata thachahra ta a taotuhpa zy chhaota aluahna cha patlôsa awpa ta a hmâh aw ei ta; châhrasala ama pao aw.

¹⁵ Chatanachata maw lâ bei cha a vy aw ta, tlâh byuhpa tao aw ta, khihpi kuh a ipa a hneipa cha a la aw. Chatawhcha chho lâ thatlôna chata pakhâ thei aw vei, a chyhsa tlypazy chhaota; a pakhâ thei awpa thatlôna rai y aw vei.

¹⁶ Chatanachata a vaw dyuhtuhpa chata a khopa hawhta tao aw ta, a hmiakô liata ahyhmah ta aduah aw veih ei; ano cha khihnarâh rôhnahpa liana chata a duah aw ta, a ku liata paraona a y aw.

¹⁷ A khihnarâh tlokhu thatlôna chhaota a vy a chhuah aw ta, a dyhna ta” ô aw ta, cha hawhta a tao aw. A parao nawpa ta a hnohta chanôzy sawchanônô pie aw ta, châhrasala aduah leipa aw ta, ano chata cha hra aw vei

¹⁸ He hnôh lâ heta cha liahpahlô lâ a heih aw ta, a hluhpi a la aw; châhrasala hyutuhpa pakha chata reipachhiena a reipa cha pabâ aw ta; a reipachhiena cha ano chô lilaw liata a paliesa aw.

¹⁹ Chatanachata ano khihnarâh tlai kuhzy lâna cha a heih aw ta; châhrasala a hluahpa ta pao aw ta, hmô theipa châ khao aw vei.

²⁰ “Ano su liana chata chyhsa pakha, khihnarâh rôhnahna liata chhiekheituhpa a sie pahliesatuh awpa cha a vaw duah aw ta; châhrasala bohpi leipa ta pathi-iana vâta châ leipa ta, adyuhna vâta chhao châ hra leipa ta, pahleipadiapa ta a y aw.

²¹ A su liana chata chyhsa mohnao chhihpa, palyupalihna ama pie leipa cha a vaw duah aw; châhrasala khihnarâh thlahlôh nota a vy aw ta, reikah thaipa ta khihnarâh cha a to aw.

²² A hmia lâta chyhsa cha ti laipa thatlôna ta pahleipa ta y aw ta, kei parao khaipa ta ama y aw; biehrai hyutuhpa taihta.

²³ A hnohta biehrai tao hnôh lâna chata piepie ngaitapa ta y aw ta; a vaw duah aw ta, zawpi chyhpatazy chhaota a tha vaw tlô aw.

²⁴ Thlahlôhna daihti nota khihnarâh kao pha chaipa liata vaw hria aw ta; a pawzy nata a paw pawzy tao beih leipa cha a tao aw, chyhsazy hry liana chata hraona nata hraona hmozy, sôhzy a hie patla aw: kuh a ipazy chô liana chata daihti buakha chhôhta adyuh awpa ta a chhuahnoh aw.

²⁵ A hmotaotheina nata a riahphana cha pheisaih hri hluh ngaitapa chhaota, chho lâ abei chô liata pathyu aw ta; chatawhcha chho lâ bei chata pheisaih hri hluh ngaitapa nata thatlô ngaitapa chhaota adyuh aw ta; châhrasala aduah thei aw vei, a chô liana chata teina kheihawhpa tlyma vaw tei aw ei ta.

²⁶ A pati pahâhpa a nietuhpazy tlai chata ano pahleipadia aw ei ta; a pheisaih hrizy cha topa ta y aw ei ta, a hluhpi cha thiepa ta ama y aw.

²⁷ He abei panozy he ama pathipalôh liata hmo peipa tao khohpa cha rairieh aw ei ta; tlâhkhai su kha liata haipa ama reih aw, châhrasala khâpa hrao leipa a châ aw; a chhâna cha daihti raopa liata châ tlôh aw ta.

²⁸ Sôh hluhpi chhaota ano khihnarâh lâta kua heih aw ta, a pathipalôh cha pathipalôh pathaihpa adyuhpa ta a y aw. Cha hawhta tao aw ta, ano khihnarâh tlai lâta aduah heih aw.

²⁹ “Daihti raopa liana chata vaw kua heih aw ta, chho lâta sie aw ta; châhrasala a hnôh lâ viapa liana heta cha a hmia lâtahpa hawhna cha châ aw vei.

³⁰ Kitima balyhzy chata ano amâ vaw dyuh aw, chatanachata a palôh châ leipa aw ta, kua aw ta, biehrai pathaihpa chô liana chata a pathi-ia aw ta, cha hawhta a tao aw, kua heih aw ta, biehrai pathaihpa a heisaituhpazy cha a ly aw.

³¹ Pheisaihzy chata ano châta adyuh aw ei ta, supathaihpazy papuapalei aw ei ta, kuh tlai chhao cha; raopa hlâna a y lymâpa cha pahlei aw ei ta. Roryhrana pasichhihna cha tlao ama paduasa aw.

³² Biehrai chô liata molei ngaitapa ta a taotuhpazy cha reikah thaipa ta parao aw ta; châhrasala chyhsa ama Khazohpa a pahnotuhpazy kha cha a i aw ei ta, hmo rôhnah ngaitapa ama tao aw.

³³ Chyhsa hryta a sopazy chata chyhsa hluhpi pachu aw ei ta, châhrasala zaozi zy, mei paleih zy, seichâna zy nata hraona zy ta chyhsa hluhpi ama pao aw.

³⁴ Ama pao no chhaota baona a chyhta ta deipa ta y aw ei ta. Chyhsa hluhpi ta reikah thaipa ta âmo ama vaw zy aw;

³⁵ a sopazy hry ta thokhazy chata âmo pasia awpa nata pathai awpa nata padisa awpa ta ama pao pâ aw, chhâna daihti taih chhaota, daihti raopa liata khâ a châpa vâta.

³⁶ “Abei chata a khopa hawhta tao aw ta; ano a pasâhsa aw ta, khazoh to chô liata a palai aw ta, khazohzy Khazohpa adyuhpa ta hmo noâhchhi ngaitapazy a reih aw. Pathi-iana papaipa a châ hlâta cha tao thei aw ta; rao chiehpa cha tao tlai awpa châ tlôh ta.

³⁷ A pathlatuhpazy khazohzy cha apapeisa leipa aw ta, chanôzy kho viapa nata khazoh rai a papeisa hra aw vei, chyhsa zydua chô liata a palai tlôh aw ta.

³⁸ Cha hlâta cha cha kuhzy khazoh cha palyupalih aw ta; khazoh, a pawzy chhaota ama pahno beih leipa kha ngôh zy, lôsôhpazy nata hmo khochhihpazy chhaota a palyupalih aw.

³⁹ Khazoh nano ngaitapa baona ta kuh a i ngaitapazy cha adyuh aw ta; ahyrai a pyhpa maih cha a parôhnahsa aw. A hluhpi chô liata ryu pareisa aw ta, khihnarâh cha a ty hneipa ta a rai aw.

⁴⁰ “Chhâna daihti liana chata chho lâ abei ta ano a vaw dyuh aw ta; maw lâ bei chata talaili zy, arâ a kiahpa chyhsa nata balyh hluhpi chhaota khisô hawh tlaita ano a vaw dyuh aw; khihnarâh cha a ngia aw ta, pahnie aw ta, a siepalâh aw.

⁴¹ Khihnarâh rôhnahpa chhao a ngia aw ta. A hluhpi papaopa a châ aw, châhrasala a ku tawhtapa hezy he cha pachhapa ama châ aw: Edôma nata Môaba nata Amawna chyhsa phapazy.

⁴² Khihnarâhzy chô liata chhao a ku hy aw ta, Izi chhaota khôkhâh aw vei.

⁴³ Ano cha ngôh nata tâkâri so pakhypazy chô liata nata Izi hmo sôhpa zydua chô liata bie a hnei aw; chatawhcha Libia mozy nata Ethiôpia mozy cha ano baokhâtuhpa ama châ aw.

⁴⁴ Châhrasala nochhi lâ nata maw lâ tawhta bie pathâhpa ta ano a patypamâ aw, chatanachata chyhsa hluhpi pahleipadia awpa nata pamo awpa ta pathi-ia ngaitapa ta a pua aw.

⁴⁵ Chatawhcha tilaipi nata tlâh pathaihpa rôhnah ngaitapa likawh liana chata abei poh-o cha patyu aw ta; châhrasala a chhâna a tlôpa châ aw ta, ahy hmah ta bao aw veih ei.