1
Cha hnôh lâna chata Amawna pathlazy abei Nahasa cha thi ta, a sawchapawpa cha ano vyuhpa ta a bei ta.
2
Davi chata, “A paw chata eina ngiachhie tyhpa vâta kei chhaota Nahasa sawchapawpa Hanu cha ei ngiachhie hra aw,” tah ta. Chatanachata Davi chata a paw kyh liata thlahpalôh awpa ta chyhsa zy tuah ta. Davi chyhsa zy cha Amawna pathlazy râh liata Hanu lâta ano thlahpalôh awpa ta kei tlô ei ta.
3
Châhrasala Amawna pathla pawhrâhpa sahlaozy chata Hanu hnohta, “Davi heta na paw a zapa vâta thlahpalôhtuh awpa nâ lâta a vaw tuapa a châpa ta na pangiasa ma? A chyhsa zy he râh parao awpa ta mohparupa nata mopathli awpa ta nâ lâta a vypa châ vei ei mâ?” tah ei ta.
4
Chatanachata Hanu chata Davi chyhsa zy patu ta, ama kâhmi ngyu ta, ama chysia zy cha a liahliah liata ama chakhai taih a phapa ta tai ta, hriepôh haw ta.
5
ahyzy tlyma ta a chyhsa zy a vaw taona zie cha cha Davi chho ei ta, dy awpa ta chyhsa tuah ta, âmo hra cha ama noza kaw tlôh ta. Chatawhcha abeipa chata, “Nama kâhmi a seih hlâta cha Zerikô liata y chy ula, cha hnôh lâna chata a vy la vâ eichi,” tah ta.
6
Amawna pathlazy ta Davi a haopa ama vaw châ haw tahpa ama pahno nahta, Hanu nata Amawna pathla chata Mesopotamia râh tawhtapa zy, Aramaaka tawhtapa zy, Zôbah tawhtapa zy, talaili nata arâ a kiahpa pahriasa nawpa ta tâkâri talent sâh kha paphao ei ta.
7
Talaili thy thôh nata sâh no Maaka beipa nata a chyhsa zy chhaota pahlaosa ei ta, Medeba kiapâh liata riehmo tao ei ta. Amawna pathlazy cha ama khihzy tawhna chata pua ei ta, a pahmaohpakhy ei ta, adyuh awpa ta a thao ei ta.
8
Davi chata cha cha a thei nahta, Zôaba nata pheisaih riahphapa sahlao zydua cha tuah ta.
9
Amawna pathlazy cha vaw pua ei ta, khihpi ochhi kiapâh liata adyuh awpa ta a paziah ei ta, abei sahlao a vaw hlao hrapa zy cha ânano ta sibiepa su liata y ei ta.
10
Chatanachata a hmia lâta nata a hnôh lâta amâ vaw dyuh aw tahpa Zôaba a pahno nahta, Izarel mozy hry liatahpa a phapa maih a tlyh ta, Suria mozy adyuh awpa ta a paziah ei ta;
11
mo hropa zydua cha a unawhpa Abisai ku liata soh khai ta, Amawna pathlazy adyuh awpa ta a paziah hra ei ta.
12
Ano chata, “Suria mozy he ei pahnie leipa khiahtala nâma ta na bao aw chi ta; Amawna pathlazy na pahnie leipa khiahtala ei cha vaw bao aw.
13
Riahpha ngaitapa ta y ula, eima chyhsa zy nata eima Khazohpa khihzy pachhapa ta riahphapa ta y ei suh u; ABEIPA ta a pha a tahna zie lymâ hawhta tao mawh sy,” tah ta.
14
Chatanachata Zôaba nata a hnohta chyhsa zy chata adyuhna su lâta Suria mozy cha a kei hnia ei ta; a hmiakô liana chata a râpai haw ei ta.
15
Amawna pathlazy ta Suria mozy amâ râpai tahpa ama pahno nahta, âmo chhao cha a unawhpa Abisai hmiakô liana chata a râpai haw hra ei ta, khih liata a ngia ei ta. Chatanachata Zôaba cha Zerusale lâta a di haw ta.
16
Suria mozy ta Izarel zy hmiakô liata panawhpa ta ama y haw tahpa ama pahno nahta, chyhsa tuah ei ta, Euphrate haosâ lâta Suria mozy cha aw ei ta, Hadadeza pheisaih hyutuhpa Sôpha cha ama hyutuh chaipa a châ.
17
Cha cha Davi chho ei ta, ano chata Izarel mo zydua aw pakhy ta, Zawdah chaka ei ta, kei hmô ei ta, adyuh awpa ta a paziah ei ta. Chatanachata Davi sahlaozy cha amâ paziah khai nata Suria sahlaozy cha adyuh ei ta.
18
Suria mozy cha Izarelzy hmiakô liana chata a râpai haw ei ta, Davi chata Suria mo talaili sâh sari chô liata a kiahpa nata pheisaih thy palih thie ta, pheisaih hyutuhpa Sôpha chhao thie ta.
19
Chatanachata Hadadeza chyhsa zy chata Izarel zy hmiakô liata panawhpa ta ama y tahpa ama pahno nahta. Davi nata adyhna tao ei ta, a chakaotuhpa ta y haw ei ta. Suria mozy chhao chata Amawna pathlazy cha bao khoh khao veih ei.