Hlazy 25

¹ Hy ABEIPA, nâma liata ei palôhrupa khâchâ ei pahnieh.

² Hy ei Khazohpa, nâ ei cha ngâ na, maophyuhpa ta na paysa kha y; ei khakhaipazy pahniepa ta na paysa kha y.

³ Nâma cha hâtuhpa zydua cha maophyuhpa ta y beih veih ei; a kyh y leipa ta a piepietupazy cha tlao ama maohphyu aw.

⁴ Hy ABEIPA, na lâpizy cha na pahnosa la; na lâthlôhzy cha na pachu mah y.

⁵ Na bie hmeihseihpa liana cha nâ chhi la, na pachu mah y, nâ cha ei pachhana Khazohpa châ tlôh chi; noh noh y ta ei cha hâ thlâh ha hi.

⁶ Hy ABEIPA, na zawngiahna thapasana a thei thlâh ha la, na kyhpachâ ngiachhiena chhao, hlâno tawhta a vaw y hapa châ tlôh ei ta.

⁷ Ei thyutlia noh hmoparaona nata moleina, a thei thlâh ha leipa la; hy ABEIPA, na phana vâta nata na kyhpachâna vâ tlaita nâ thei thlâh ha mah y!

⁸ ABEIPA cha phapa nata adopa a châ; chavâta moleipazy cha lâthlôh a pamosa.

⁹ Areisipa cha adona kyh liata a chhitha, areisipa cha a lâthlôh cha a pachu tyh.

¹⁰ A biehraina nata pahnosana a pyhtuhpazy châta cha, ABEIPA lâpi zydua cha kyhpachâna nata ngâchhihna sai a châ.

¹¹ Hy ABEIPA, na moh vâna chata, ei moleina a ngiahthai la, thata châ tlôh ta.

¹² ABEIPA a chipa chyhsa cha ahy e a châ? Cha chata a lâthlôh a tlyh awpa cha a pamosa aw.

¹³ A hrona kyh cha lôhrâtlô ngaitapa ta y aw ta, a pathlazy ta râh cha ama to aw.

¹⁴ ABEIPA aviasana cha ano chituhpazy hnohta y ta, a bietaipa cha âmo a pahnosa tyh.

¹⁵ Ei mozy ta ABEIPA lâ a moh tyh, ano chata ei pheizy he sao tawhta a daophi tlôh aw ta.

¹⁶ Keima lâ a vaw heih la, na ngiachhie mah y; yrupa nata pasa taopa châ tlôh na ta.

¹⁷ Ei palôhrupa tymâna he na pachha la, ei nôpona tawhtapa he na thao mah y.

¹⁸ Ei rietheina nata pasana he na pachâ la, ei moleinazy nâ ngiahthai mah y.

¹⁹ Pachâ tua, na khakhaipazy cha a hluhpi châ ei ta, thata nâ hao tlôh ei ta.

²⁰ Ei hrona he vaih la, na pachha mah y; maohphyupa ta na paysa kha y, nâma liata ei ngâna pahnieh tlôh na ta.

²¹ Ei palôhrupa siana nata phana heta na pabohsa tlai sala, cha hâ thlâh ha tlôh na ta.

²² Hy Khazohpa, Izarel sahlao he, ama nôpona zydua tawhtapa chatlai mah y.