Nehemia 13

Lernen

   

1 Cha noh liana cha zawpi nahkhao theina liata Mawsi châbu reih ei ta; cha liana chata Amawna mozy nata Môaba mozy cha Khazohpa chyhsa zy apakhyna liana chata khati nota hmahta ama hlao awpa châ vei tahpa ropa ta y ta;

2 Izarel pathlazy viahchhâ nata ti ta dy leipa ta âmo chhiesakhâh awpa ta Balama amâ chhohiapa vâna khata; châhrasala eima Khazohpa ta chhiesana cha byhnâ awna ta tlao pachâsa haw ta.

3 Chatawhcha ryhpa cha ama nahthlie khai nahta, Izarel mozy hry tawhtapa a pahlaopahlituhpa zawpizy panano haw ei ta.

4 Cha hlâna chata eima Khazohpa o chhôhpadâhpa zy liata hyutuhpa châta raopa theihthaipa Eliashi, Tôbiah a zaokhipa châ ta,

5 cha hlâta Livai sahlaozy, hla satuhpa zy, ochhivaihtuhpa zy tovyuh, niepa hlâna zy, rohpahâhpa zy, hmobaoh zy, sâh su hrawh liata su kha zy, kresawti nata sathaw nata theihthaipa zy châta hiepa hlâna zy ama so tyhna chhôhpadâhpa kawh ngaitapa Tôbiah chata a chhuanoh ta.

6 Châhrasala cha hmo zydua y nona chata Zerusale liata y leipa na ta, Babylaw beipa Artazerzia kô sythôh nata kô no a bei kô ta abei lâta vawh na ta. Noh khazie tawhta tlyma pasaina hiah heih na ta,

7 chatawhcha Zerusale lâ vawh na ta Khazohpa o dôhpachhôh tlyhmia zy liata chhôhpadâhpa a chhuahnoh papata Tôbiah chata Eliashi ta hmo pha leipa a taopa cha pahno ha ta.

8 Palôh châ lei ngaitapa ta na paysa ta, chavâta Tôbiah o chhôh hmobaoh zydua cha chhôhpadâhpa tawhtapa cha ei papua khai haw.

9 Chatawhcha bie pie na ta, chhôhpadâhpa zy cha pathai ei ta; chatanachata Khazohpa o hmobaoh zy cha niepa hlâna zy nata rohpahâhpa zy chhaota a ngiakhei heih na ta.

10 Livai sahlao hnohta âmo tovyuh cha âmo lâta ama pie leipa ta pahno na ta; chavâta Livai sahlaozy nata hla satuhpazy cha âmo lyu chyu lâta amâ râpai khai haw.

11 chatanachata ryureituhpa zy lâta paphôh na ta, “Khazia e Khazohpa o cha uasa leipa ta a y tly?” tah na ta. Chatawhcha âmo cha awpakhy na ta, ama su chyu liata paysa na ta.

12 Zudah mo zydua chata sâh su hrawh liata su kha zy, kresawti zy, sathaw zy thyuna sôh sona liata vaw cheih ei ta.

13 Chatawhcha theihthaipa Shalemiah nata chârohtuhpa Zadôka nata Livai sahlao hry liatahpa Pedai zy cha thyuna sonazy hyutuhpa châta tao na ta, âmo a baotuhpa châta Matanaiah saw Zaku sawchapawpa Hana y ta, ngâchhihpa ta pachâpa châ ta; ama raihria cha ama unawhzy hnohta hmo raipa a châ.

14 Hy ei Khazohpa y, he kyh liana heta nâ thei thlâh ha la, ei Khazohpa o nata a chakaona châta ei hmotao phapazy cha pahlei chachei ta khah y.

15 Cha nona chata Zudah râh liata pahânoh ta kresawti saohna khaoh zy liata saopa zy, sapiah a vaw phaohpa zy, alâ ama paphaosapa zy hmô na ta; kresawti zy, krezy, theikuzy nata phaohripa to paphaosapa ta chazy cha pahânoh ta Zerusale lâta vaw phaoh ei ta; niepa zuana nohzy â do leizie pahnosa na ta.

16 Tyre râh liatahpa, cha liata a pahrâpa zy chhaota ngazy nata hmobaoh to vaw cheih ei ta, pahânoh ta Zudah mozy lâta nata Zerusale lâta zuah ei ta.

17 Chatanachata Zudah molaipa zy cha chakhia na ta, ama hnohta, “Pahânoh papuapaleipa ta nama hmo pha leipa taopa he, kheihta zie ta e a châ?

18 Nama mahpaw zy chhao khata he hawhna heta tao veih ei mâ? Eima Khazohpa chata he hmo pha leipa zydua he eima chô liata nata he khih chô liana heta a vaw patlôsa hawpa châ vei mâ? Cha chôna chhaota pahânoh papuapaleipa ta Izarel mozy chô liata pathi-iana nama patlôsa ngâ tly,” tah na ta.

19 Chatawhcha pahânoh hlâta Zerusale ochhi a zoh nata ochhizy khaw awpa ta bie pie na ta, pahânoh ta hmo phaohpa rai ama ngia lei nawpa ta ei satlia thokhazy ochhi pavaisa na ta.

20 Chatanachata sôhdaopa chyhsa zy nata hmo to a zuahpa chyhsa zy cha ei kha tlyma, ei no tlyma, Zerusale khôtho lâta a rie ei ta.

21 Châhrasala â do leina zie pahnosa na ta, ama hnohta, “Khazia e kuh kiapâh ta namâ rie? He hawhta nama tao heih khiahtala nama chô liata ei ku ei hy aw,” tah na ta. Cha rakha tawhta cha pahânoh cha a vy khao leipa ei ta.

22 Chatawhcha Livai sahlaozy cha a pathaipa ta pahânoh pathaisa nawpa ta kuh ochhi vaih awpa ta bie pie na ta. Hy Khazohpa y, he kyh liana chhao heta nâ thei thlâh ha la, na ngiachhiena hluhna zie lymâ hawhta na pahlôh mah y.

23 Cha no chata Zudah chyhsa Asadô chanô zy, Amawna chanô zy, Môaba chanô zy lahpinô ta a hneipazy hmô na ta;

24 ama saw khophie zy cha Asadô reih tlao cheih ei ta, cha sahlao reina zie hawhna dei leipa cha Zu reih ta reih thei leipa ei ta.

25 Chatawhcha âmo lâta paphôh na ta; chhie sa na ta, thokhazy cha tu na ta, ama sâzy phia na ta, “Nama sawchanôzy cha chazy sahlao sawchapawpazy pahneisa aw veih eichi, chazy sahlao sawchanôzy cha nama sawchapawzy châta tlyma nâmo châta tlyma, hnei aw veih eichi, tahpa reipa ta Khazohpa moh ta chhie pasasa na ta.

26 Izarel beipa Sawlawmaw chhao kha he hawhpa hmozy liata a moleipa châ vei mâ? Cha chôna chhaota pho hluhpi hry liana chata ano hawhta abei y leipa ei ta, a Khazohpa chyhsa kho chaipa châ ta. Khazohpa ta Izarel râh zydua chô liata abei ta tao ta; châhrasala ano tlai chhao cha râh hropa chanô ta pamoleisa haw ei ta.

27 Chatanachata râh hropa chanô zy hneipa ta eima Khazôhpa chô liata hmo pha lei ngaitapa he tao awpa ta nama bie eima zyh aw mâ?” tah na ta.

28 Chatawhcha theihthaipa beichaipa Eliashi saw Zehôiada sawchapawpa pakha Hôrô chyhsa Sanbala piahpa châ ta; chavâta kei tawhta a chadai syulyu ha na ta.

29 Hy ei Khazohpa y, theihthaipa raihria biehrai nata Livai sahlao biehrai ama papuapaleipa vâta a thei thlâh ha mah y.

30 Cha hawhna chata râh hropa chyhsa zy tawhta pathaisa na ta, theihthaipa zy, Livai sahlaozy chata ama raihriana chyu liata tho hlâna châta nata chichei hmiatua chaipa châta zy chhaota. Hy ei Khazohpa y, a phana lâta nâ thei thlâh ha mah y.