Ezekiel 31

Lernen

   

1 Kô hrawhleikhana, thla thôhna, cha thla noh kha noh liana chata ABEIPA bie cha ei hnohta vaw tlô ta:

2 “Chyhsa y, Izi râh beipa nata a zawpi hnohta reih la: “Rôhnahna liata ahyma na lyu tly?

3 Pachâ teh, Lebanaw sidy chiah a ngiapa nata buh rôpa, nohdi phapa a sâhpa a ngiapa, a ki thlao meihdo taihta a phapa na lyu na.

4 Ti ta pasapa ta, a thupa taopa ta a laiseih ngâpa, a lona chavahzy ta loh chadô ei ta, lyurâhpa tho ta pasana chata a palosa.

5 Chatanachata lyurâhpa tho zydua hlâta a sâh via ta; a chiah laiseih ta, a chhy a seih, ti hluhpi ta pasapa vâta seih ta.

6 A chiah liata avâ pavawzy ta bu râ ei ta; a chiah ry liata sa to ta taw ama patawh; a nohdi ry liata phopi rôhnahpa zydua ama pahrâ.

7 A rôhnahna liata â ngia, a chiah seih lymâpa ta; ti hluhpi lâta a thari thla ta.

8 Khazohpa sahdô liata sidy thozy ta pahli veih ei, a chiah meisa tho ta a kho vei; a chiah chhao asi tho ta a kho hra vei; Khazohpa sahdô liata tho rai ta angiana zie hawhta a lyupa y vei.

9 A chiah bu pahluhsapa ta a ngiapa ta tao na ta, Khazohpa sahdô liata Idâh tho zydua ta ama uava.

10 “Chavâta Abeipa KHAZOHPA chata he tana heta a tah: A vaw sâh ngaitapa ta meihdozy hry liata a kithlao chaluahpa ta, a pathipalôh ta a sâhzie cha a palaikheipa vâta,

11 phopizy hry liata chyhsa thatlô ngaitapa ku liata ei patusa aw; a moleina zie lymâ hawhta hri tlai aw ta, ei papua aw.

12 Khichhaipa chyhsa phopizy hry liata chichhih ngaitapazy chata thlu aw ei ta, ama siesai aw. Tlâh liata zy, saikao liata zy, a chiahzy tla hôlô aw ta, cha râh ti lona saikao zydua liata a chiahzy cha a tlie hôlô aw; khizaw liata chyhsa zydua cha a nohdina tawhta pua aw ei ta, ano cha ama siesai aw. "13 A raona liana chata avâ pavaw zydua pahrâ aw ei ta, a chiah chô liana zy chata lyurâhpa sazy ama y aw."

14 Hezy he ti ta pasapa tho zydua a pasasa leipa ta ama kithlao meihdo hryta chaluah leipa ta, ti ta pasapa tho rai ta ama sâhna zie amâ palai lei nawpa a châ; lei su a ry chaipa liata khaotlô lâta a zu hawpa chyhsapa sawzy hry liata sie awpa ta, thina ta patusapa châ khai haw tlôh ei ta.

15 “Abeipa KHAZOHPA chata he tana heta a tah: Sheôl lâta a zu noh liana chata ti a thu ngaitapa cha a mâchhie pasasa na ta, a chavahzy pahâsa na ta, ti hluhpizy cha lo leipa ei ta; Lebanaw ano mâchhie pasasa hra na ta, lyurâhpa tho zydua ano vâta ama panao khai haw.

16 Phopizy chhao a paona pyu liana chata chalyusa na ta, khaotlô liata a zu hawpazy hnohta Sheôl liata ei thy pathla nona chata; Idâh tho zydua, Lebanaw liata tho phapazy, ti ta pasapa zydua cha alei ry chaipa liana chata thlah palôhpa ta ama y haw.

17 Zaozi ta thiepazy hnohna chata Sheôl lâta zu haw hra ei ta; chatatlyh, phopizy hry liata a nohdi ry liata a pahrâtuhpa a ku pheizy tlai chhao cha,

18 Idâh thokôzy hry liata a rôhnahna nata laina liata ahy e nâ hawhpa a y? Châhrasala Idâh thozy chhaota alei su ry chaipa liata thypa na châ aw; zaozi ta thiepa chopawtai leipazy hry liata nâ zia awpa a châ. “He he Phirao nata a zawpi zydua cha ama châ, Abeipa KHAZOHPA ta a tah.