Puasaina 18

¹ Zetharô Midia liata theihthaipa Mawsi puhpa chata, Khazohpa ta Mawsi nata a chyhsa Izarel sahlaozy chata hmo a taozie zydua nata ABEIPA ta Izarel sahlao zy cha Izi tawhta a chhitha ziezy cha vaw thei ta.

² Mawsi puhpa Zetharô chata Mawsi lahpinô Zipôrah Mawsi ta a pasiesapa kha,

³ sawchapawpazy pano chhaota a chhi ta, cha pakhapa moh cha Kesaoma châ ta, “Chyhsa râh liata a ypa ei châpa vâta,” tah ta;

⁴ pakhapa moh cha, Elieza a châ. “Ei paw Khazohpa cha, nâ baotuhpa châ ta, Phirao zaozi tawhtapa cha eina pachha hapa vâta,” tah ta.

⁵ Mawsi puhpa Zetharô chata Mawsi sawchapawpazy nata a lahpinô cha a hnohta râhpathohpa liata a riena Khazohpa tlâh lâna chata vaw chhi ta.

⁶ Chatawhcha Mawsi hnohta, “Na puhpa Zetharô, na lahpinô nata na saw panozy chhaota a mâ vy,” tahpa ta chhopa châ ta.

⁷ Chatawhcha Mawsi cha a puhpa dy awpa ta pua ta, a naoh ta, sy ta, thâtihzy a hiahri ei ta, chatanachata poh-o liata a ngia haw ei ta.

⁸ ABEIPA ta Izarel sahlaozy vâta Phirao nata Izi chô liata a taozie zydua nata lâpi liata riethei ama taona zydua nata ABEIPA ta âmo a pachha ziezy cha Mawsi chata a puhpa chho ta.

⁹ ABEIPA ta Izarel sahlaozy cha Izi mo tawhta pachha ta; amo chata hmo a vaw taozie nata ama chô liata a phana zydua vâna chata Zetharô cha a ly ngaita ta.

¹⁰ Zetharô chata, “ABEIPA Izi sahlao tawhta nata Phirao tawhta cha pachhatuhpa ei cha reithaipa ta y mawh sy, ano chata Izi sahlao bie ry liata a ypa zawpizy cha a pachha haw hi.

¹¹ Atahmâ cha ABEIPA cha khazoh zydua hlâna chata a rôhnah via tahpa ei pahno haw, a palai ngaitapa ta ama taona liana tlai chata a vaw la,” tah ta.

¹² Chatawhcha Mawsi puhpa Zetharô chata, raona hlâna nata Khazohpa châta atheihna awpazy la ta; chatawhcha Arawna nata Izarel machâ sahlao zydua cha, Mawsi puhpa hnohta Khazohpa hmiakô liata viahchhâ nie awpa ta vawh ei ta.

¹³ A mylâ ta cha Mawsi cha zawpizy pachia awpa ta a tyuh ta, chatawhcha zawpizy cha my tawhta zâ taihta Mawsi kiapâh liata a duah thlâh ha ei ta."

¹⁴ Mawsi puhpa ta cha hawhta zawpizy chata hmo a taopa zydua cha a hmô nahta, “Zawpizy he hmo khâpa ma na taopa tly? Kheihtazie ta ma nâma deita he a tyuh thlâh ha chi ta, my tawhta zâ taihta zawpi zydua he na kiapâh liata amâ duah thlâh ha tly?” tah ta.

¹⁵ Mawsi ta a puhpa hnohta, “Zawpizy he Khazohpa a chhohia awpa ta ei hnohta amâ vy;

¹⁶ bie khâpa tlyma ama hnei khiahtala, kei lâta a vy tyh ei ta, chatanachata keima ta ano vaih nata ama chi cha vaw pachia pa ta, chatawhcha Khazohpa ryhraopa nata a ryhpazy cha ei vaw pahnosa tyh,” tah ta.

¹⁷ Mawsi puhpa chata a hnohta, “Na hmo taozie cha pha vei.

¹⁸ Nâma nata na hnohta zawpi a ypazy he nama tha nama pazei aw, he raihria he na châta a ru tu na; nâma deitata tlô theipa châ vei.

¹⁹ Ei bie nahthlie tua; a ryhna cha raokhei aw na ta, na hnohta Khazohpa y mawh sy! Nâma he Khazohpa lâta zawpi vyuhpa ta ama biepeipazy cha Khazohpa lâta tlôkhei mah y;

²⁰ bieraopazy nata ryhpazy cha pachu aw chi ta, ama yzie awpa nata nama taonazie awpazy cha na pamosa lymâ awpa a châ.

²¹ Cha dei châ leipa ta zawpi hry tawhta chyhsa hmâtlâh a châ viapa, Khazohpa a chipa chyhsazy, chyhsa dopazy, hlaona a do leipa a haopa chyhsazy a tlyh la, cha hawhpa chyhsazy cha sâhkha chô liata hyutuhpazy, za kha chô liata hyutuhpazy, sypangawh chô liata hyutuhpazy, pahrawh chô liata hyutuhpazy rao la,

²² Chazy chata khati no raita chyhsazy pachia mawh sy; bie lai viapa maihzy cha nâma lâta vaw tlôkhei tyh aw ei ta, bie chyhnawhpa deikua cha âmo ta pachia mawh sy; chatanachata na châta nao via aw ta, âmo chata a cha chapawh aw ei.

²³ Cha hawhta taopa ta Khazohpa chhaota bie a cha pie khiahtala tlô thei aw chi ta, chatanachata he zawpi sahlao chhao he palôh tlâhpa ta âmo yna lâ amâ di thei aw,” tah ta.

²⁴ Mawsi ta a puhpa bie reipa cha a pyh ta, a reipa zydua hawhna chata tao ta.

²⁵ Mawsi chata Izarel sahlao zydua hry tawhna cha, chyhsa hmâtlâh viapa a tlyh ta, zawpi chôta hyutuhpa tao ta, sâhkha chô liata hyutuhpazy, za kha chô liata hyutuhpazy, sypangawh chô liata hyutuhpazy, pahrawh chô liata hyutuhpazy rao ta.

²⁶ Chazy chata khati no raita chyhsazy pachia tyh ei ta; bie lai viapa maih cha Mawsi lâta tlô khei tyh ei ta, bie chyhnawhpa deikua cha, âmo sahlao ta ama pachia tyh.

²⁷ Mawsi ta a puhpa cha pasiesa ta, a yna râh lâna chata sie haw ta.