Puasaina 12

¹ ABEIPA ta Mawsi nata Arawna cha Izi râh liana chata bie a chho ta,

² “He thla he nama châta thla rei pathaona châ aw ta; nam chôta kô kha chhôhta thla rei pathaona a châ aw.

³ Izarel sahlao pôhpakhypa zydua hnohna heta he thla, noh hrawh noh liana heta chyhsa tota ama chhôhkha khihsana zie lymâ hawhta ama chhôhkha châta mietahkupa taw pô kha la chyu ei sala;

⁴ ama chhôhkha cha, mietahkupa tawh thiena khi a châ leina taihta a chyh tupa ama châ khiahtala a opa chhaota ama chhôhkha chyhsazy lymâ hawhta mietahkupa taw pô kha a hly ei sala; chyhsa to nie khi awpa lymâ raopa ta mietahkupa taw cha nama rao awpa a châ.

⁵ Nama mietahkupa taw cha a chapawhpa, kô khapa, seina a hnei leipa, a châ awpa a châ; mietahkupa hry liatahpa tlyma, mie hry liatahpa tlyma a châ awpa châ ta;

⁶ cha thla, noh hrawhleipalih noh taihta nama soh awpa châ ta, chatanachata Izarel sahlao pôhpakhypa zydua chata, zâlâ ta ama thie awpa a châ.

⁷ Chatawhcha a thisaih cha la aw ei ta, ama niena awpa o chhikao tôh miano liata nata chhikao luh chô liata ama hnia awpa a châ.

⁸ Cha zâ chata a sapa cha rao ei sala; viahchhâ thihnô pahlao leipa chhaota nie ei se, ahnalasi khâpa chhaota ama nie awpa a châ.

⁹ A heipa ta nie leipa ei sala, ti chhaota chhoh cheita leipa ei sala, a rao ta tlao rao ei se, a luh nata a phei dua ta, a chhôhri chhaota.

¹⁰ A mylâ châta khâpahmah nama soh awpa châ leipa ta, a mylâ taihta a laibâhpa a ypa cha mei liata nama phôh awpa a châ.

¹¹ He hawhna heta nama nie awpa a châ, nama poh a saipa ta, pheiky a kypa ta, chôhchahrei a chhypa ta, a parah ngaitapa ta nama nie awpa a châ. ABEIPA zawpakhôpa châ tlôh ta.

¹² Cha zâ chata Izi râh chhôh cha chahryh tlôh aw na ta, Izi râh liata saw tuapa zydua, chyhsa nata sa cha thie aw na ta; Izi râh liata khazoh zydua cha ei pachia aw: ABEIPA ei châ hih.

¹³ Thisaih cha nama châta yna o pahnona châ aw ta; thisaih ei hmô nata châ zaw pakhô aw ei na ta, chatanachata Izi râh ei thie tina chata nâmo pahleipadiatuh awpa nama chô liata hri rai vaw charei aw vei.

¹⁴ “He noh he nama châta a thei thlâh hana noh châ aw ta, ABEIPA châta kyhchhi nohta nama rao awpa a châ; nama pathlazy taihta chhâzaw bie raopa châta, a y thlâh ha awpa ta kyhchhi nota nama hmâh awpa a châ.

¹⁵ Noh sari chhôh cha viahchhâ thihnô pahlao leipa nama nie awpa châ ta; noh kha noh tawhna chata nâmo o chhôh tawhtapa thihnô cha nama pathaih awpa a châ, ahyrai noh kha noh tawhta a noh sari noh taihta viahchhâ thihnô pahlaopa a niepa maih cha, cha chyhsa cha Izarel sahlao hry tawhtapa pahleipadiapa a châ aw.

¹⁶ Noh kha noh liana chata ahmaohpakhyna pathaihpa hnei aw eichi ta, chatawhcha a noh sari nohta ahmaohpakhyna pathaihpa a y heih aw: chyhsa tota ama byuhpa niepa a chhuahdyna tah leipa ta cha, cha chhôh liana chata rai ama hria awpa rai châ vei; niepa a chhuahdyna deita taopa a châ aw.

¹⁷ Viahchhâ thihnô pahlao leipa kyhchhi nota namâ ô awpa a châ, cha no tlai chata Izi râh tawhtapa nama zawpi sahlaozy cha, cha chhitha tlôh ei na ta; chavâta nama pathlazy taihta chhâzaw bie raopa châta a y awpa ta cha noh cha namâ ô awpa a châ.

¹⁸ Thla khana cha thla noh hrawhleipalih noh zâ lâna chata viahchhâ thihnô pahlao leipa cha nie aw eichi ta, cha thla noh syno nata noh kha noh zâlâ taihta.

¹⁹ Noh sari chhôh cha nama o chhôh liata rai thihnô a y awpa châ leipa ta; ahyrai thihnô pahlaopa a niepa maih cha, cha chyhsa cha pho hropa rai, nama râh liata a pihpa rai châ sala, Izarel sahlao pôhpakhypa hry tawhtapa he pahleipadia awpa a châ aw.

²⁰ Thihnô pahlaopa rai cha nama nie awpa châ leipa ta; nama pahrâna su maih liana chata viahchhâ thihnô pahlao leipa nama nie awpa a châ, tahpa ta reih mah y,” tah ta.

²¹ Chatawhcha Mawsi ta Izarel machâ sahlao zydua cha aw ta, ama hnohta, “Chhôhkha tota mietahkupa taw zy cha kei la ula, zawpakhôna awpa ta thie teh u.

²² hisaw sôh la aw eichi ta, rahô liata thisaih liana chata ny aw eichi ta, chatawhcha chhikao luh chô liata nata chhikao tôh miano liana chata rahô liata thisaih cha hnia muh vy; chatawhcha khihdei hlâ lei cha ahyhmah ama o tawhta pua awpa châ vei.

²³ ABEIPA cha Izi chyhsazy thie awpa ta a vy tlôh aw ta; chatawhcha chhikao lu chô nata chhikao tôh mianoh liata thisaih hniapa a hmô nata ABEIPA ta chhikao cha sie pakhô aw ta, nama o chhôh liana chata nâmo thie awpa ta pahleipadiatuhpa cha vaw pangiasa aw vei.

²⁴ He hawhna heta nâma nata na sawchapawpazy châta chhâzaw ta bieraopa a y thlâh ha awpa ta nama vaw tao tyh awpa a châ.

²⁵ Chatawhcha ABEIPA ta pie a vaw taih hawpa hawhta a cha pie awpa râh cha nama tlô tita, he chakaona he nama pazao awpa a châ

²⁶ Chatawhcha nama sawzy ta nama hnohta, ‘He chakaona yzie he khâpa tahna ma a châ tly?” ama vaw tah khiahtala,

²⁷ nâmo ta, ‘He he ABEIPA zawpakhô atheihna a châ hih, ano chata Izi mozy a thie nona khata eima ozy cha pahlôh tlôh ta, Izi râh liata Izarel mozy o cha a zawpakhô,’ nama tah aw,” tah ta. Chatawhcha zawpizy cha ama luh a bôh ei ta, a naoh haw ei ta.

²⁸ Chatawhcha Izarel pathlazy cha sie ei ta, cha hawhna chata tao ei ta; ABEIPA ta Mawsi nata Arawna bie a piepa hawhna chata tao haw ei ta.

²⁹ Chatawhcha zâcho chhôhta ABEIPA chata Izi râh liata saw tuapa zydua, abei dyuchhai liata a tyuhpa Phirao; saw tuapa tawhta alei ry liata atana chhô liata atâhpa saw tuapa taihta za thie khai ha ta, sahroh a pih tua chaipa zydu chhaota.

³⁰ Phirao cha ano nata a chakaotuhpa zydua nata Izi chyhsa zydua chhaota; zâ ta thyu ei ta, Izi râh liana chata chana ru ngaitapa y ta: a thipa y leina o rai miakha hmah y tlôh leipa ta.

³¹ Chatawhcha Mawsi nata Arawna cha a zo ta pa-aws ta, “Thyu ula, ei chyhsa sahlao hry tawhtapa he pua teh u, nâmo nata Izarel pathla sahlao chhaota; chatawhcha sie ula, nama reipa hawhna khata, ABEIPA chakao teh u.

³² Nama reipa hawhna khata, nama mietahkupa zawzy nata nama viahchao zawzy chhao cha siekhei teh u, sie ha teh u; kei chhao byhnâ na aw pa hra teh u!” tah ta.

³³ Izi mozy chata cha râh tawhtapa cha a chatlie ngaitapa ta papua awpa ta chyhsazy cha parahsa ei ta, “Eima thi khai thlâh ha na,” tah ei ta.

³⁴ Chatawhcha chyhsazy chata ama viahchhâ nypazy cha thihnô ama pahlao hlâta la ei ta, ama viahchhâ nyna beihkohzy cha ama poh ta pahly ei ta, ama ngiatlâh liata baih ei ta.

³⁵ Izarel pathlazy chata Mawsi bie hawhna chata tao ei ta, Izi mozy cha, tâkâ ri a tobinazy nata ngôh a tobinazy nata chysia zy hiah ei ta;

³⁶ ABEIPA chata chyhsazy cha Izi mozy pangiachhiesa ta, chatanachata ama hiapa maih pahneisa lymâ ei ta, cha hawhna chata Izi mozy hmo cha thata pahryu ei ta.

³⁷ Izarel pathlazy cha Ramese khih tawhta pua ei ta, Sukô taihta sie ei ta, hawtizy rei leipa ta, chapaw pitlohpa saita thy sycharu phei ta sie ei ta.

³⁸ Ama hnohna chata zawpi a pahlao pahlipa a hluhpi sie hra ei ta, sahroh zaw hluhpi mietahkupa nata viahchaozy a chhi hra ei ta.

³⁹ Chatawhcha Izi râh tawhta ama puakheipa viahchhâ nypa hmâpa ta viahchhâ thihnô pahlao leipazy cha tao ei ta, thihnô pahlao leipa châ tlôh ta. Izi râh tawhtapa cha papuapa ta ama ypa vâta nata y parei thei khao leipa ta niepa dâhdei chhao amâ chhuahdy hmâ leipa vâta.

⁴⁰ Izarel pathlazy Izi râh liata ama y chhôh cha, kô za palih nata kô sythôh a châ.

⁴¹ Chatawhcha kô za palih nata kô sythôh a lei tawhna chata, cha no tlai chata ABEIPA pheisaih sahlao zydu cha Izi râh tawhtapa pua haw ei ta.

⁴² Cha zâ chata Izi râh tawhtapa âmo a papuapa vâta ABEIPA châta a ô awpa zâ châ ta; Izarel pathla zydua ta chhâ zydua taihta cha zâ cha ABEIPA châta ama ô awpa a châ.

⁴³ Chatawhcha ABEIPA ta Mawsi nata Arawna hnohta, “He he zawpakhô bieraopa a châ aw: pho hropa chata ama nie hra awpa châ leipa ta;

⁴⁴ anodeikuacha chyhsa ta a chakaotuhpa tâkâ ta a chalei awpazy cha chopaw na taipa haw khiahtala a nie thei hra aw.

⁴⁵ Pho hropa nata chakaotuhpa sahlaopazy deikua chata ama nie awpa châ vei.

⁴⁶ O kha liata nie awpa a châ; khôtho lâ a sapa rai puakhei awpa châ vei; a rupa rai chhao namâ thli awpa rai châ vei.

⁴⁷ Izarel sahlao zydua ta ama zyh awpa a châ.

⁴⁸ Pho hropa nama hnohta a ypa chata ABEIPA zawpakhô he a ô hra awpa a khoh khiahtacha a chapaw zydua chopawtaipa châ sala chatanachata a ô hra mawh sy; ano cha cha râh liata a pihpa hawhta angiahpa a châ aw. Anodeikuacha chopawtai leipa chyhsa chata a nie awpa châ vei.

⁴⁹ Cha râh liata a pihpa nata pho hropa nama hry liata a ypazy chân heta ryhpa miakha ta a y awpa a châ,” tah ta.

⁵⁰ Izarel pathla zydua chata cha hawhna chata tao ei ta; ABEIPA ta Mawsi nata Arawna bie a piepa hawhna tlai chata tao ei ta.

⁵¹ Cha no tlai chata ABEIPA ta Izarel pathlazy cha Izi râh tawhtapa ama zawpi sahlao cha papua haw ta.