Daniel 5

¹ Abei Belsaza chata a chyhsa rôhnahpa sâh khazy châta kyhchhi rôhnah ngaitapa tao ta, sâh kha hmiakô liana chata kresawti doh ta.

² Belsaza chata kresawti a do via tawhna chata ngôh nata tâkâri hmobaoh a paw Nebukaneza ta Zerusale achhyna-o tawhtapa a lapa cha vaw cheih awpa ta bie pie ta; abei nata a chyhsa rôhnahpazy nata a lahpinôzy nata a nôthozy ta kresawti ama do nawpa ta.

³ Chatanachata ngôh hmobaoh, Zerusale liata Khazohpa achhyna-o tawhtapa lapazy cha vaw cheih ei ta; abei nata a chyhsa rôhnahpazy, a lahpinôzy, a nôthozy chata dona ta hmâh ei ta.

⁴ Kresawti cha doh ei ta, ngôh zy, tâkâri zy, dawh zy, thua zy, tho zy, alô zy ta taopa khazohzy cha thata palyupalih ei ta.

⁵ Cha nona tlai chata chyhsapa kuparoh he a vaw luah ta, abei o pamihpa, meiôh sona dady lâna chata vaw roh ta; abei chata a rohtuhpa ku taipachhupa cha hmô ta.

⁶ Cha chata abei cha a hmia panano ta, a palôhrupazy cha atymâ khai ha ta; a kyu ru a pazaonazy thazei khaipa ta y ta, a pakhuzy a chakhy ngâ ta.

⁷ Abei cha, “Awhsi kyh a hmâh thaipazy, Kaldia mo chhochhieliena a hmâh thaipazy a vaw chhi awpa,” tahpa ta aw ta. Abei chata Babylaw chyhsa sopazy hnohna chata, “Ahyrai ta he ropa he reipa ta a chhopasiana na pamosapa cha poh sailawpa pabusapa châ aw ta, a rao liata ngôh bâlia pa-aosapa châ aw ta, khihnarâh liata ryureituhpa pathôhna a châ aw,” tahpa ta reih ta.

⁸ Chatanachata abei chyhsa sopa zydua cha a vaw ngia ei ta; châhrasala a ropa cha reih thei leipa ei ta, a chhopasiana cha abei pahnosa thei veih ei.

⁹ Abei Belsaza cha a nôpo ngaita ta, a hmia a nano ta; a chyhsa rôhnahpazy cha ama nôpo ngaita hra ta.

¹⁰ Abei nata a chyhsa rôhnahpazy awna pyu vâna chata abeinô cha kyhchhina o liana chata a vaw ngia ta; abeinô chata, “Hy beichaipa y, chhâzaw ta hroh mah y! Na palôhrupa cha atymâ khah sala, na hmia chhao anano khah se.

¹¹ Na khihnarâh liana heta chyhsa pakha, ano liata khazoh pathaihpazy thlahpa a ypa cha y ta. Na paw daihtizy liata chhao khaihna zy, novâhna zy, sona zy, khazohzy sona hawhpa ano liana chata a y tahpa pahnopa châ haw ta; hy beichaipa y, na paw Abei Nebukaneza, na paw chata molie thaipazy, awhsi kyh a hmâh thaipazy, Kaldia mozy, chhochhieliena kyh a hmâh thaipazy hyutuhpa ta tao ta;

¹² ano liana chata palôhrupa pha pachaipa zy, novâhna zy, pahno thaina zy, mâsapa chhopasiana zy, bierupa pasiana zy, dyu su theina zy cha Daniel, abei ta Beltesaza a bipa liana chata a y tahpa pahnopa châ haw ta. Atahmâ Daniel cha awpa châ sala, a chhopasiana cha a cha pamosa thlâh ha aw,” tahpa ta reih ta.

¹³ Chatanachata Daniel cha abei hmiako liata a vaw chhi ei ta. Abei chata Daniel hnohta, “Daniel y, Zudah seichâna liata atâhpa sawzy hry liatahpa, ei paw beichaipa ta Zudah râh tawhta a cha vaw chhipa cha na châ ma?

¹⁴ Nâma liana chata khazohzy thlahpa y ta, khaihna zy, novâhna zy, sona pha pachaipa zy nâma liana chata a y tahpa pahnopa a châ, tahpa bie vaw thei na ta.

¹⁵ Atahmâ he châ ropa he reih awpa nata a chhopasiana na pahnosa awpa ta chyhsa sopazy, dyuthaipazy, ei hmiakô liata a vaw chhi haw ei ta; châhrasala cha hmo chhopasiana cha na pamosa thei veih ei.

¹⁶ Nâ deikua chata chhopasia thei chi ta, dyu na su thei tahpa cha vaw thei na ta. Atahmâ na thei khiahtala ropa he reih la, a chhopasiana na pahnosa la, poh sailawpa pabusapa châ aw chi ta, na rao a dôpa ta ngôh bâlia pa-aosapa châ aw chi ta, khihnarâh liata ryureituhpa pathôhna na châ aw,” tahpa ta reih ta.

¹⁷ Chatawhcha Daniel chata a chhy ta, abei hmiakô liana chata, “Na hmo piepa cha nâma châta châ sala, na lymâ cha mo hropa hnohta pie mah y; châhrasala ropa he abei reipa aw na ta, a chhopasiana cha ei pahnosa aw.

¹⁸ Hy beichaipa y, Khazohpa Chônôchaipa chata na paw Nebukaneza cha khihnarâh zy, laina zy, rôhnahna zy, abeina zy pie ta;

¹⁹ laina a hnohta piepa vâna chata mo tozy, pho tozy, reih tozy chata chi ei ta, a hmiakô liana chata a chalyu tyh ei ta; a khopa maih thie ta, a khopa maih pahro ta; a khopa maih pasasa ta a khopa maih panawh tyh ta.

²⁰ Châhrasala a pathipalôh a pasâhsa ta, a palôhrupa châkaru ha ta, a palai ngaitapa ta y haw ta, abeidyuchhai tawhtapa panawhpa châ ta, a rôhnahna cha lapa haw ta;

²¹ chyhsazy hry tawhtapa topa ta y ta, a palôhrupa cha lyurâhpa sa hawhta sibiepa ta pasa ei ta; a pôhpa cha avâ diati ta padâpa ta y ta, Khazohpa Chônôchaipa chata chyhsapazy abeina khihnarâh chô liata bie hnei ta, a khokheipa maih a pahrâsa tyh tahpa na pahno hlâ lei cha.

²² Châhrasala nâma a sawchapawpa, hy Belsaza y, he zydua he na pahno tarawpa ta na palôhrupa nâ panawh leipa vâta,

²³ avâ Beipa chô liana chata tlao a pasâhsa chi ta; a o liata hmobaohzy cha na hmiakô liata vaw cheih ei ta, nâma nata na chyhsa rôhnahpazy, na lahpinôzy nata na nôthozy chhaota kresawti dona ta hmâh eichi ta; chatawhcha tâkâri zy, ngôh zy, dawh zy, thua zy, tho zy, alô zy ta taopa khazoh, a hmô thei leipa, a thei thei leipa, a pahno thei leipazy cha palyupalih chi ta, Khazohpa, na hrona nata na lâpi zydua liata a ku ta châ vaotuhpa cha za leipa chi ta.

²⁴ “Chatanachata ano tawhna chata ku taipachhupa cha tuapa châ haw ta, he ropa he a vaw roh haw hih.

²⁵ He he bie ropa cha châ ta: MENE, MENE, TEKEL, U PHARSIN.

²⁶ He he a chhopasiana cha a châ: MENE, Khazohpa ta na khihnarâh cha reipati khai ha ta, a chhâna a patlôsa haw;

²⁷ TEKEL, khopathliapa ta y chi ta, tloh khao va chi;

²⁸ PERES, na khihnarâh cha pachhaipa ta y ta. Medai nata Persia hnohta piepa a châ haw,” tah ta.

²⁹ Chatanachata Belsaza chata bie pie ta. Daniel cha poh sailawpa pabusa ei ta, a rao liata ngôh bâlia pa-aosa ei ta, a khihnarâh liana chata ryureituhpa pathôhna a châ awpa a châ, tahpa ta phuah haw ei ta.

³⁰ Cha zâ liana chata Kaldia beipa Belsaza cha thiepa châ ta.

³¹ Daria, Medai chyhsa chata khihnarâh cha to haw ta, ano cha kô sycharu nata kô no rachhôhpa a châ.